Baghlayani Bible
बिधान 14
शोग मनाणे री वर्जित बिधि
तुसे आपणे परमेशर यहोवे रे लोक ए, इजी री खातर तुसे मरे दे माणूंआ खे शोग करने रिया तँईं ना तो आपणे शरीरो दे जख्म करने ओर ना ई दाड़िया रे बाल़ कटवाणे।1 कऊँकि तूँ आपणे परमेशर यहोवे खे चूणे रा पवित्र समाज ए ओर यहोवे तूँ तरतिया री सारी जातिया रे लोका बीचे आपणी निज सम्पत्ति ऊणे खे चूणी ला रा।2
शुद्ध ओर अशुद्ध डांगर
(लेवी बिधान 11:1-47)
तैं कोई नफरत करने वाल़ी चीज नि खाणी। जो डांगर तुसे खाई सकोए, सेयो यो ए, मतलब गाय-बल़द, मिन्टू, बाकरी, ईरण, बारासींगा, मृग, जंगल़ी बाकरी, साबर, नीलगाय ओर पाह्ड़ी पेड।
डांगरा बीचा ते जितणे चिरे या फटे रे खुरो वाल़े ओर जग्याल़ करने वाल़े डांगर ओए तिना रा मास तुसे खाई सकोए। फेर बी जग्याल़ करने वाल़े या चिरे रे खुरो वाल़ेया बीचा ते यो डांगर ऊँट, खरगोश ओर शापान नि खाणे, कऊँकि यो जग्याल़ तो करोए, पर चिरे खुरो वाल़े नि ऊँदे, इजी बजअ ते सेयो तुसा खे अशुद्ध ए। फेर सूंअर, जो चिरे खुरो वाल़ा तो ओआ पर जग्याल़ नि करदा, इजी बजअ ते से तुसा खे अशुद्ध ए। तुसे ना तो एसरा मास खाणा ओर ना ई एसरी लोथ छूँणी।
फेर जितणे पाणिए बीचले जीव ए तिना बीचा ते तुसे इना खे खाई सकोए, मतलब जितणेया रे पंख ओर छिलके ओए। पर जितणे जन्तु पंख या बिना छिलके ते ओए तुसे सेयो नि खाणे; कऊँकि सेयो तुसा खे अशुद्ध ए।
सारे शुद्ध पंछिया रा मास तो तुसे खाई सकोए। पर इना रा मास नि खाणा, मतलब उकाब, हड़फोड़, कुरर; गरूड़, ईल ओर कई किस्मा रे शाही; कई किस्मा रे सारे काओ; शुतुरमुर्ग, तहमास, जलकुक्कट ओर कईया किस्मा रे बाज; छोटा ओर बड़ा दुँईं जातिया रा उल्लू, घुग्घू; धनेश, ईल, हाड़गील; सारस, कई किस्मा रे बगुले, हुदहुद ओर चमगादड़।
सब पंखो वाल़े कीड़े तुसा खे अशुद्ध ए, सेयो नि खाणे। पर सारे शुद्ध पंखो वाल़े पंछिया रा मास तुसे खाई सकोए।
जो डांगर आपू मरी जाओ, तुसे से नि खाणा; तुसे तेसखे आपणे डेरे ते पीतरे रणे वाल़े केसी परदेशिए खे खाणे खे देई सकोए या केसी ओरी रे आथे बेची सकोए; पर तूँ तो आपणे परमेशर यहोवे खे पवित्र समाज ए। बाकरिया रे दूद पिंदे बच्चे खे नि पकाणा।
दसुआ इस्सा देणा
तैं हर साल आपणे डोरूआ री फसला रा दसुआ इस्सा जरूर लग करी की राखणा ओर जेते जगा खे तेरा परमेशर यहोवा आपणे नाओं री रणे रिया जगा ठराणे खे छाँटी लओ तिदे आपणे नज्ज, नया अंगूरा रा रस, शुद्ध तेलो रा दसुआ इस्सा, आपणे गाय-बल़द ओर पेडा बाकरिया रे जेठे आपणे परमेशर यहोवे री मौजुदगिया रे खाया करने, जेते कि तुसे तेसरा डर हमेशा मानणा सिखणा।
पर जे से जगा जेतेखे तेरा परमेशर यहोवा आपणा नाओं बणाई राखणे रिया तँईं चूणी लओगा बऊत दूर ओ ओर इजी बजअ ते ताखे तेथो रा सफर इतणा दूर ओ कि तूँ आपणे परमेशर यहोवे रिया आशीषा ते मिली रिया चीजा खे तेती नि लई जाई सके, तो तिना सबी चीजा खे बेची की, पैसे बानी की आथो रे लई की तेते जगा रे जाणा, जो तेरे परमेशर यहोवे चूणी लणी। तेती पेडा-बाकरिया, गाय-बल़द, अंगूरा रा रस, शराब या केसी बी किस्मा री कोई बी चीज कऊँ नि ओ, जो तेरा जिऊ चाओ, से तिना पैसेया साथे ई खरीदी की आपणे कराने समेत आपणे परमेशर यहोवे री मौजुदगिया रे खाई की मजे करने। आपणे डेरे ते पीतरले लेवी नि पूलणे कऊँकि तां साथे तेसरा कोई पाअग या इस्सा नि ऊणा।
तैं हर तीन साल बीतणे ते बाद तीजे सालो री फसला रा सारा दसुआ इस्सा निकयाल़ी की आपणे डेरे ते पीतरे कट्ठा करना, तेबे लेवी जिना रा तां साथे कोई निज पाअग या इस्सा नि ऊणा से ओर जो परदेशी, अनाथ ओर बिदुआ तेरे डेरे ते पीतरे ओ, सेयो बी आई की पेट परी की खाओ, जेते कि तेरा परमेशर यहोवा तेरी सारी मईणता रे कामो रे ताखे आशीष देओ।
Source notes (2)
- Footnote रोमी 9:4
- Footnote तीतुस 2:14, 1 पत 2:9
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.