Baghlayani Bible
2 राजा 16
यहूदा दे आहाजो रा राज्य
रमल्याह रे पाऊ पेकह रे इस्राएलो दे राज्य करने रे सतारूए साले यहूदा रे राजा योतामो रे पाऊ आहाज राज करने लगेया। जेबे आहाज राज करने लगेया, तेबे से बीइ साला रा था ओर सोल़ा साला तक यरूशलेम शईरो दे राज करदा रया। ओर तिने आपणे मूलमर्द दाऊदो जेड़ा काम नि कित्तेया, जो तेसरे परमेशर यहोवे री नजरा रे सई था। पर तिने इस्राएलो रे राजेया जेड़े ई नीच काम कित्ते, बल्कि तिना जातिया रे बुरे कामो रे मुताबिक, जो यहोवे इस्राएली लोका रे सामणे ते देशो ते निकयाल़ी ते थे, तिने आपणा पाऊ बी आगी दे चढ़ाईता। से ऊच्ची जगा दे, ओर पाह्ड़िया पाँदे ओर सबी अरे डाल़ा निठे बलि चढ़ाया ओर तूप बाल़ेया करो था।
तेबे अरामो रे राजा रसीन ओर रमल्याह रे पाऊ इस्राएलो रे राजा पेकहे लड़ने खे यरूशलेम शईरो पाँदे अमला कित्तेया ओर तिने आहाज राजा केरी ला, पर तेस साथे युद्ध करी की तिना रे कुछ नि बणेया। तेस बखते अरामो रे राजा रसीने, एलत शईर अरामो रे वशो दे करी की, यहूदी तेथा ते निकयाल़ी ते; तेबे एदोमी लोक एलत जगा खे गये ओर आजके दिनो तक तेथी रओए। तेबे अहाजे दूत पेजी की अश्शूरो रे राजा तिग्लत्पिलेसेरो खे सन्देसा पेजेया, “माखे आपणा दास समजी की, बल्कि पाऊ समजी की अमला कर ओर माखे अरामो रे राजा ओर इस्राएलो रे राजे रे आथो ते बचा जो मेरे खलाफ आई रे।” अहाजे यहोवे रे मन्दरो दे ओर राजमईलो रे पण्डारा दे जितणा सूईना-चाँदी मिलेया, से अश्शूरो रे राजे गे पेंट करी की पेजीता। तेसरी मानी की अश्शूरो रे राजे दमिश्को पाँदे अमला कित्तेया ओर से लई की तेथो रे लोका खे बन्दी बणाई की, कीर जगा खे लईगा ओर रसीन राजा काई ता।
तेबे राजा आहाज अश्शूरो रे राजा तिग्लत्पिलेसेरो साथे मिलणे खे दमिश्को खे गया ओर तेथो री बेदी देखी की तेतेरी सारी बणाऊटा रे मुताबिक तिजी रा नक्शा ऊरिय्याह पुरोईतो गे नमूना करी की पेजीता। ठीक एस नमूने रे मुताबिक जो राजे दमिश्को ते पेजेया था, ऊरिय्याह पुरोईते राजा आहाजो रे दमिश्को ते आऊणे तक एक बेदी यरूशलेमो दे बणाई ती। जेबे राजा अहाज दमिश्को ते आया, तेबे तिने एक बेदी देखी ओर नेड़े जाई की तेते पाँदे बलि चढ़ाए। तेते नवीं बेदिया पाँदे बलिदान करी की तिने आपणा होमबलि ओर नज्जो री बलि बाल़ेया ओर अर्घ दित्तेया ओर मेलबलिया रा खून छिड़की ता। ओर पीतल़ी री जो बेदी यहोवे रे सामणे रओ थी, से तिने मईलो रे सामणे ते, मतलब आपणी बेदी, ओर यहोवे रे मन्दरो बीचा ते टाई की, तेसा बेदिया रे उत्तरो रिया तरफा खे राखी ती। तेबे आहाज राजे ऊरिय्याह पुरोईतो खे आज्ञा दित्ती, “प्यागा रे होमबलि ओर साँजा रे नज्जो री बलि, राजे रे होमबलि ओर तेसरे नज्जो री बलि ओर सबी आम माणूंआ रे होमबलि ओर अर्घ बड़ी बेदिया पाँदे बलिदान करने ओर होमबलि ओर मेलबलिया रा सारा खून तेते पाँदे छिड़केया करना। पर मां पीतल़ी री बेदिया रा इस्तेमाल यहोवे ते पूछणे खे करेया करना।” राजा आहाजो री एसा आज्ञा रे मुताबिक ऊरिय्याह पुरोईते कित्तेया। तेबे राजा आहाजे कुर्सिया री फटिया बाडी तिया ओर अऊदिया तिना पाँदा ते निकयाल़ी तिया ओर बड़ा अऊद तिना पीतल़ी रे बल़दा पाँदा ते जो तिजी ते थाले थे उतारी की, पात्थरा रे मेल्ले पाँदे राखी ता। रामो रे दिनो खे जो छांयी री जगा मईलो रे बणी री थी ओर राजे रे बारे जाणे रा बड़े द्वार, से तिने अश्शूर राजे रिया बजा ते यहोवे रे मन्दरो ते लग करी ता। आहाज राजे रे ओर काम जो तिने कित्ते, सेयो सब यहूदा रे राजेया रे इतिआसो री कताबा रे नि लिखी राखे? अंतो रे राजा आहाज मरीगा ओर से तेसरे बुजुर्गा साथे दाऊदो रे शईरो दे दबाईता। तेबे तेसरा पाऊ हिजकिय्याह तेसरी जगा पाँदे राज करने लगेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.