Baghlayani Bible
2 राजा 14
यहूदा दे अमस्याह रा राज्य
इस्राएलो रे राजा यहोआहाजो रे पाऊ यहोआशो रे राज्य रे दूजे साले यहूदा रे राजा योआशो रा पाऊ अमस्याह राजा बणेया। जेबे से राज्य करने लगेया तेबे से पच्चीया साला रा था ओर यरूशलेम शईरो दे ऊणत्ती साल तक राज्य करदा रया। तेसरी माया रा नाओं यहोअद्दान था, जो यरूशलेम शईरो री थी। तिने से कित्तेया जो यहोवे री नजरा रे ठीक था, तेबे बी आपणे मूलमर्द दाऊदो जेड़ा नि कित्तेया; तिने ठीक आपणे बाओ योआशो जेड़े काम कित्ते। तिने बी ऊच्चिया जगा नि टाल़िया; लोक तेबे बी तिना पाँदे बलि चढ़ाओ थे ओर तूप बाल़ो थे। जेबे राज्य तेसरे आथो दे पक्का ऊईगा, तेबे तिने आपणे सेयो कर्मचारी काईते, जिने तेसरा बाओ राजा काया था। पर तिना खूनिया रे पाऊ तिने नि काये, कऊँकि यहोवे री ये आज्ञा मूसे री बिधानो री कताबा दे लिखी राखी: “पाऊए रिया बजा ते बाओ नि काया जाओ ओर बाओ रिया बजा ते पाऊ नि काया जाओ; जिने पाप करी राखेया ओ, सेई तेस पापो रिया बजा ते काया जाओ।”
तिने अमस्याहे लूणो रिया काअटिया दे 10,000 एदोमी मर्द काईते ओर सेला शईरो साथे युद्ध करी की से लई ला ओर तेतेरा नाओं योक्तेल राखेया ओर से नाओं आजो तक चलोआ।
तेबे अमस्याहे इस्राएलो रे राजा योआशो गे, जो येहूए रा पोता ओर यहोआहाजो रा पाऊ था, दूता गे सन्देसा पेजेया, “आओ, आसे एकी-दूजे रा सामणा करूँए।” इस्राएलो रे राजा योआशे यहूदा रे राजा अमस्याह गे ये सन्देसा पेजेया, “लबानोनो पाँदलिए झड़बेरिये लबानोनो रे एक देवदारो गे सन्देसा पेजेया, ‘आपणी बेटी मेरे माठे खे ब्यायी दे’ तदुए खे लबानोनो रे बणो रा एक जानवर तिसिये गया ओर तिने से झड़बेरी केसी ती। तैं एदोमी जीती तो राखे इजी री खातर तूँ कमण्ड करने लगी रा। तेते पाँदे ई बडयाईया करी की कअरे रई जा; तूँ आपणा नुकशाण करने खे आपणा आथ एती कऊँ बढ़ाणे लगी रा, जेते कि तां ओर यहूदा रे प्रदेशो रा बी नुकशाण करवाणा।” पर अमस्याह नि मानेया। तेबे इस्राएलो रे योआश राजे अमला कित्तेया ओर तिने ओर यहूदा रे राजे यहूदा प्रदेशो रे बेतशेमेशो दे एकी-दूजे रा सामणा कित्तेया। यहूदा इस्राएलो ते आरी गा ओर यहूदा रे सब सिपाई आपणे-आपणे डेरे खे नठे। तेबे इस्राएलो रे राजे यहोआशे यहूदा रे राजा अमस्याह खे जो अहज्याह रा पोता ओर योआशो रा पाऊ था, बेतशेमेशो दे पकड़ी ता ओर तेसखे यरूशलेम लईगा। तेबे एप्रैमिये बड़े द्वारो ते कूणे वाल़े बड़े द्वारो तक 400 आथ यरूशलेम शईरो री दवाल टाल़ी ती। ओर जितणा सूईना, चाँदी ओर जितणे पांडे यहोवे रे मन्दरो दे ओर राजमईलो रे पण्डारो दे मिले, सेयो सब ओर लोका खे बन्दुआ बणाई की सामरिया खे वापस ऊईगा।
योआशो रे ओर सारे काम जो तिने कित्ते ओर तेसरी वीरता ओर तिने किंयाँ यहूदा रे राजा अमस्याह साथे युद्ध कित्तेया, ये सब इस्राएलो रे राजेया रे इतिआसो री कताबा दे लिखी राखे। अन्तो दे योआश मरीगा ओर से इस्राएलो रे राजेया बीचे सामरिया दे दबाईता ओर तेसरा पाऊ यारोबाम तेसरी जगा पाँदे राज करने लगेया।
यहूदा रे राजा अमस्याह री मौत
यहोआहाजो रे पाऊ इस्राएलो रे राजा यहोआशो रे मरने ते बाद योआशो रा पाऊ यहूदा रा राजा अमस्याह पंद्रा साल जिऊँदा रया। अमस्याह रे ओर काम यहूदा रे राजेया रे इतिआसो री कताबा दे लिखी राखे। जेबे यरूशलेम शईरो दे तेसरे खलाफ राजद्रोह री सभा कित्ती, तेबे अमस्याह लाकीशो खे नठी गा। तेबे तिने तेसरा लाकीशो तक पीछा करी की से तेती काई ता। तेबे से कोड़ेया पाँदे राखी की यरूशलेम शईरो दे पऊँचाया ओर तेती तेसरे बुजुर्गा बीचे दाऊदो रे शईरो दे से दबाईता।
तेबे सारी यहूदी प्रजे अजर्याह खे लई की, जो सोल़ा साला रा था, तेसरे बाओ अमस्याह री जगा पाँदे राजा नियुक्त करी ता। राजा अमस्याह मरी की आपणे बुजुर्गा साथे मिलीगा, तेबे तेसते बाद अजर्याहे एलत मजबूत कित्तेया ओर यहूदा रे वशो दे फेर करी ता।
इस्राएलो दे दूजे यारोबामो रा राज्य
यहूदा रे राजा यहोआशो रे पाऊ अमस्याह रे राज्य रे पन्द्रुए साले इस्राएलो रे राजा योआशो रा पाऊ यारोबाम सामरिया दे राज्य करने लगेया ओर अकताल़ी साला तक राज करदा रया। तिने से कित्तेया, जो यहोवे री नजरा रे बुरा था; मतलब नबातो रे पाऊ यारोबाम, जिने इस्राएलो ते पाप करवाया था, तेसरे पापो रे मुताबिक से करदा रया ओर तिने सेयो बुरे काम नि छाडे। तिने इस्राएलो रे बन्ने हमातो री काट्टिया ते लई की मैदानो दे अराबा रे तालो तक जेड़ा का तेड़ा करी ता, जेड़ा कि इस्राएलो रे यहोवा परमेशरे अमित्तै रे पाऊ आपणे दास गथेपेरो दे रणे वाल़े योना भविष्यबक्ता रे जरीये बोलेया था। कऊँकि यहोवे इस्राएलो रा दु:ख देखेया कि बऊत ई कठण ए, क्या बन्दी, क्या गुलाम कोई बी बचेया दा नि रया ओर ना कोई इस्राएलो री मताद करने वाल़ा था। यहोवे नि बोलेया था कि मां इस्राएलो रा नाओं तरतिया पाँदा ते मिटाई देणा। तेबे तिने यहोआशो रे पाऊ यारोबामो रे जरीये तिना खे छुटकारा दित्तेया। राजा यारोबामो रे ओर सब काम जो तिने कित्ते, ओर केड़ी वीरता साथे तिने युद्ध कित्तेया ओर दमिश्क ओर हमात, जो पईले यहूदा रे राज्य रे थे इस्राएलो रे वशो रे फेर करीते, ये सब इस्राएलो रे राजेया रे इतिआसो री कताबा दे लिखी राखे। अंतो दे यारोबाम बी मरीगा ओर से तेसरे बुजुर्गा साथे इस्राएलो रे राजेया साथे सामरिया शईरो दे दबाईता। ओर तेसरा पाऊ जकर्याह तेसरी जगा पाँदे राज करने लगेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.