Baghlayani Bible
2 इतिआस 17
यहूदा दे यहोशापातो रा राज्य
आसा राजे री जगा पाँदे तेसरा पाऊ यहोशापात यहूदा रा नवां राजा बणेया ओर तिने यहूदा प्रदेश इतणा तागतबर बणाया जेते की से इस्राएलो रे खलाफ लड़ी सको थे। तिने यहूदा रे सब गढ़वाल़े शईरो रे सिपाईया रे दल ठराईते ओर यहूदा रे देशो रे ओर एप्रैमो रे तिना शईरा रे बी जो तेसरे बाओ आसे लई ले थे, सिपाईया री चौकिया बठयाल़ी तिया। यहोवा यहोशापातो साथे रया, कऊँकि से आपणे मूलमर्द दाऊदो री पुराणी चाल चलेया ओर बाल देवतेया री टोल़ा रे नि रया। बल्कि से आपणे बाओ रे परमेशरो री टोल़ा रे लगेया रा रओ था ओर तेसरी आज्ञा पाँदे ई चलो था ओर इस्राएलो जेड़े काम नि करो था। इजी बजा ते यहोवे राज्य यहोशापातो रे आथो रे मजबूत करी ता ओर सारे यहूदी तेसगे पेंट ल्याया करो थे ओर तेसगे बऊत सारा तअन ऊईगा ओर तेसरा मान-सम्मान बढ़ी गा। यहोवे री बाटा रे चलदे-चलदे तेसरा मन मगन ऊईगा, तेबे तिने यहूदा ते ऊच्ची जगा ओर अशेरा नाओं रिया मूर्तिया दूर कित्तिया।
बिधि-बिधानो री शिक्षा
यहोशापाते आपणे राज्य रे तीजे साले बेन्हैल, ओबद्याह, जकर्याह, नतनेल ओर मीकायाह नाओं रे आपणे परदानो खे यहूदा रे शईरो दे शिक्षा देणे खे पेजे। तिना साथे शमायाह, नतन्याह, जबद्याह, असाहेल, शमीरामोत, यहोनातान, अदोनिय्याह, तोबियाह ओर तोबदोनिय्याह, नाओं रे लेवी ओर तिना साथे एलीशामा ओर यहोराम नाओं रे पुरोईत थे। तेबे तिने यहोवे रे बिधानो री कताब साथे लई की यहूदा दे शिक्षा दित्ती, बल्कि सेयो यहूदा रे सारे शईरा रे प्रजा रे लोका खे सखांदे ऊए कूमे। यहूदा रे नेड़े-तेड़े रे देशो रे राज्य-राज्य दे यहोवे रा एड़ा डर समाई गा कि तिने यहोशापातो साथे युद्ध नि कित्तेया। कुछ पलिश्ती यहोशापातो गे पेंट ल्याये ओर कर समजी की चाँदी ल्याये ओर अरब देशो रे लोक बी 7,700 खाडू ओर 7,700 बाकरे लई की आए।
यहोशापातो री सेना री शक्ति
यहोशापात बऊत ई बढ़दा ओर तागतबर ऊँदा गया ओर तिने यहूदा रे किले ओर पण्डारो रे शईर त्यार कित्ते। ओर यहूदा रे शईरो दे तेसरा बऊत सारा काम ओ था ओर यरूशलेम शईरो दे तेसरे योद्धा, मतलब शूरवीर रओ थे।
इना रे पितरा रे करानेया रे मुताबिक इना री ये गिणती थी, मतलब यहूदी सेनापति तो यो थे, परदान अदना जेस साथे 300,000 सिपाई थे,
ओर तेसते बाद परदान यहोहानान, जेस साथे 280,000 सिपाई थे।
ओर तेसते बाद जिक्रीए रा पाऊ अमस्याह, जिने आपू खे आपणी इच्छा ते यहोवे खे अर्पण कित्तेया था, तेस साथे 200,000 सिपाई थे।
तेबे बिन्यामीनो बीचा ते एल्यादा नाओं रा एक शूरवीर, जेस साथे ढाल राखणे वाल़े 200,000 धनुर्धारी सिपाई थे।
ओर तेसते बाद यहोजाबाद, जेस साथे युद्धो रे अथियार बाने दे 180,000 सिपाई थे। यो सेयो ए जो राजे री सेवा दे तनो-मनो ते लगे दे रओ थे ओर यो तिना ते लग थे जो राजे यहूदा रे गढ़वाल़े शईरो दे ठराए थे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.