Baghlayani Bible
2 इतिआस 16
अरामो रे राजे साथे आसा राजे रा मलाप
आसा राजे रे राजो रे छत्तिए साले इस्राएलो रे राजा बाशे यहूदा पाँदे अमला कित्तेया ओर रामाह शईर आपणे कब्जे दे लई की से इजी खे किले बणाई की मजबूत कित्तेया, ताकि यहूदा रे राजा आसा गे कोई आई-जाई नि सको। तेबे आसा राजे यहोवे रे मन्दरो ओर राजमईलो रे पण्डारो ते सूईना-चाँदी निकयाल़ी की दमिश्को दे रणे वाल़े अरामो रे राजा बेन्हददो गे दूत पेजी की ये बोलेया, “जिंयाँ मेरे ओर तेरे बाओ बीचे तिंयाँ ई मां ओर तां बीचे बी वाचा बणी दी रणी चाईयो, देख आऊँ तांगे सूईना चाँदी पेजुँआ, इजी री खातर आओ, इस्राएलो रे राजा बाशा साथली आपणी वाचा खे तोड़ी दे, ताकि से मांते दूर ओ।” बेन्हददे आसा राजे री ये गल्ल मानी की, आपणे दलो रे परदाना ते इस्राएली शईरो पाँदे चढ़ाई करवाई की इय्योन, दान, आबेल्मैन ओर नप्तालिया रे सारे पण्डार वाल़े शईर जीती ले। ये सुणी की बाशे रामाह खे मजबूत करना छाडीता ओर तेती किले बनाणा छाडीता। तेबे आसा राजे पूरा यहूदा प्रदेश साथे लई की रामाह शईरो रे पात्थर ओर लकड़ी जिना साथे बाशा काम करो था चकी की लईगा ओर तिना साथे तिने गेबा ओर मिस्पा शईर मजबूत कित्ते।
नबी हनानिये रा सन्देशा
तेस बखते हनानी दर्शी यहूदा रे राजा आसा गे जाई की बोलणे लगेया, “तैं जो आपणे परमेशर यहोवे पाँदे परोसा नि राखेया बल्कि अरामो रे राजे पाँदे ई परोसा राखेया, इजी बजा ते अरामो रे राजे री सेना तेरे आथो ते बची गी री। क्या कूशी ओर लूबिया री सेना बड़ी नि थी ओर क्या तिदे बऊत सारे रथ ओर सवार नि थे? तेबे बी तैं यहोवे पाँदे परोसा राखेया था, इजी बजा ते तिने सेयो तेरे आथो दे करीते। देख, यहोवे री नजर सारी तरतिया पाँदे इजी खे फिरदी रओई, ताकि जिना रा मन तेसरी तरफा खे निष्कपट रओआ, तिना री मतादा दे आपणी सामर्थ दखाओ। तैं ये काम मूर्खता साथे करी राखेया, इजी री खातर एबे तूँ लड़ाईया दे फसेया रा रणा।”
तेबे आसा राजा दर्शिये पाँदे गुस्से ऊआ ओर से जंजीरा दे बानी की तेसरे पैर लकड़िया दे ठोकी ते, कऊँकि से तेसरिया इना गल्ला ते गुस्से था। ओर से तेस बखतो ते ई प्रजा रे कुछ लोका साथे सख्ताईया रा बर्ताओ बी करने लगेया।
आसा राजे री मौत
शुरूओ ते लई की अन्तो तक आसा राजे रे काम यहूदा ओर इस्राएलो रे राजेया री कताबा रे लिखी राखे। आपणे राज्य रे उँताल़िये साले आसा खे पैरो री बमारी ऊई ओर से बमारी बऊत बढ़ी गी, तेबे बी तिने बमार ऊई की यहोवे री नि बल्कि बैदा री शरण लई। अन्तो रे आसा राजा आपणे राज्य रे अकताल़िये साले मरी की आपणे बुजुर्गा साथे जाई की मिलीगा। तेबे से तेसरी कब्रा देई जो तिने दाऊदो रे शईरो दे चट्टानी दे खणाई थी, दबाईता ओर से खुशबूदार तेल ओर खुशबूआ रे कामो दे कई प्रकारा रे मसालेया साथे परे रे एकी बछौणे पाँदे लटयाल़ी ता ओर तेसरिया तँईं बऊत सारा खुशबूदार तेल बाल़ेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.