2 इतिआस 12

मिस्रो रे राजा शीशको रा यहूदा पाँदे हमला

1पर जेबे रहूबियामो रा राज्य मजबूत ऊईगा ओर से आपू स्थिर ऊईगा, तेबे तिने ओर तेस साथे सारे इस्राएली लोके यहोवे री आज्ञा मानणा छाडी ती। 2तिने लोके यहोवे साथे जो विश्वासघात कित्तेया, इजी बजा ते राजा रहूबियामो रे पाँजुए साले मिस्रो रे राजा शीशके, 31,200 रथ ओर 60,000 कोड़ेया रे सवार लई की यरूशलेम शईरो पाँदे अमला कित्तेया ओर जो लोक तेस साथे मिस्रो ते आए, मतलब लूबी, सुक्किय्यी, कूशी यो अणगिणत थे। 4शीशके यहूदा रे गढ़वाल़े शईर लई ले ओर यरूशलेम शईरो रे नेड़े तक आया।

5तेबे शमायाह नबी राजा रहूबियामो गे आया ओर यहूदा रे परदाना गे जो शीशको री सेना रे डरो रे मारे यरूशलेम शईरो दे कट्ठे ऊए थे, आई की बोलणे लगेया, “यहोवा ईंयाँ बोलोआ कि तुसे आऊँ छाडीता रा, इजी री खातर मैं तुसे छाडी की शीशको रे आथो दे करीते दे।” 6तेबे इस्राएलो रे परदान ओर राजा दीन ऊईगे ओर बोलेया, “यहोवा तर्मी ए।” 7जेबे यहोवे देखेया कि सेयो दीन ऊईगे, तेबे यहोवे रा ये वचन शमायाह गे पऊँचेया, “सेयो दीन ऊईगे रे, मां सेयो नाश नि करने, मां तिना रा कुछ बचाव करना ओर मेरी जल़न शीशको रे जरीये यरूशलेम शईरो पाँदे नि पड़कणी। 8तेबे बी सेयो तेसरे वशो दे रणे, ताकि सेयो मेरी ओर देशा-देशा रे राज्य री बी सेवा रे फर्क जाणी लो।”

9तेबे मिस्रो रा राजा शीशक आपणी सेना साथे यरूशलेम शईरो पाँदे अमला करी की यहोवे रे मन्दरो रिया कीमती चीजा ओर राजमईलो रिया कीमती चीजा चकी की लईगा। से सब कुछ चकी की लईगा ओर सूईने रिया जो ढाला सुलैमाने बणाईया थिया, तिना खे बी से लईगा। 10तेबे रहूबियाम राजे तिना रे बदले पीतल़ी रिया ढाला बणवाईया ओर सेयो पईरेदारा रे परदानो रे आथो रे सम्बाल़ी तिया, जो राजमईलो रे द्वारो री रखवाल़ी करो थे। 11जेबे-जेबे राजा यहोवे रे मन्दरो रे जाओ था, तेबे-तेबे पईरेदार आई की तिना खे चकी की लई चलो थे ओर फेर पईरेदारा री कमरे रे वापस राखी देयो थे। 12जेबे रहूबियाम दीन ऊआ, तेबे यहोवे रा रोष तेस पाँदा ते उतरी गा ओर तिने तेसरा राज्य नाश नि कित्तेया ओर यहूदा री दशा थोड़ी ठीक बी थी।

रहूबियामो रा अन्तिम बखत

13तेबे राजा रहूबियाम यरूशलेम शईरो दे मजबूत ऊई की राज करदा रया। जेबे रहूबियाम राज करने लगेया, तेबे अकताल़ी साला रा था ओर यरूशलेम शईरो दे, मतलब तेस शईरो रे, जो यहोवे आपणे नाओं रा बणाई की राखणे खे इस्राएलो रे सारे गोत्रो बीचा ते चूणी ला था, सतारा साला तक राज करदा रया। तेसरी माया रा नाओं नामा था, जो अम्मोनी जवाणस थी। 14तिने सेयो काम कित्ते जो बुरे थे, मतलब तिने आपणा मन यहोवे खे टोल़णे दे नि लगाया। 15शुरूओ ते लई की अन्तो तक रहूबियामो रे काम क्या शमायाह नबी ओर इद्दो री कताबा रे वंशावलिया रे रीतिया पाँदे नि लिखी राखे? रहूबियाम ओर यारोबामो बीचे लड़ाई सदा ऊँदी रई। 16ओर रहूबियाम मरीगा ओर दाऊदो रे शईरो दे से दबाईता। ओर तेसरा पाऊ अबिय्याह तेसरी जगा पाँदे राज करने लगेया।