Baghlayani Bible
2 इतिआस 11
रहूबियामो रा राज्य
जेबे रहूबियाम यरूशलेम शईरो खे आया, तेबे तिने यहूदा ओर बिन्यामीनो रे कराने जो मिली की 180,000 अच्छे योद्धा थे कट्ठे कित्ते, ताकि इस्राएलो रे बाकी गोत्रा रे लोका साथे युद्ध करो जेते कि राज्य रहूबियामो रे वशो रे फेर आई जाओ। तेबे यहोवे रा ये वचन परमेशरो रे दास शमायाह गे पऊँचेया, “यहूदा रे राजा सुलैमानो रे पाऊ रहूबियामो ते ओर यहूदा ओर बिन्यामीन गोत्रा रे सारे इस्राएली लोका खे बोल कि, यहोवा ईंयाँ बोलोआ कि आपणे पाईया पाँदे अमला करी की युद्ध नि करो। तुसे आपणे-आपणे कअरो खे वापस ऊई जाओ, कऊँकि ये गल्ल मेरी तरफा ते ई ऊई री।” यहोवे रे इना वचना खे मानी की सेयो यारोबामो पाँदे बिना अमला कित्ते ई वापस ऊईगे।
रहूबियामो रा शईरा खे मजबूत करना
तेबे रहूबियाम यरूशलेम शईरो दे रणे लगेया, तिने यहूदा प्रदेशो खे बचाणे रिया तँईं यहूदा रे शईरा रे चऊँ कनारे दवाला बणवाईया, सेयो शईर यो ए, बेतलेहम, एताम, तकोआ, बेतसूर, सोको, अदुल्लाम, गत, मारेशा, जीप, अदोरैम, लाकीश, अजेका, सोरा, अय्यालोन ओर हेब्रोन शईर जो यहूदा ओर बिन्यामीनो दे ए, मजबूत कित्ते। तिने मजबूत शईर ओर बी मजबूत करी की तिना रे परदान ठराए ओर खाणे-पीणे रिया चीजा, तेल ओर शराबो रे पण्डार बी रखवाई ते। तेबे एकी-एकी शईरो दे तिने ढाला ओर भाल़े रखवाई की से बऊत मजबूत करीते। यहूदा ओर बिन्यामीन तो तेसरे कब्जे दे थे।
पुरोईता ओर लेविया रा यहूदा खे आऊणा
सारे इस्राएलो रे पुरोईत ओर लेविये बी आपणे सारे देशो ते उठी की तेसगे गये। ईंयाँ लेविये आपणिया काईणी ओर निज जमीन छाडी की, यहूदा ओर यरूशलेम शईरो रे आए, कऊँकि यारोबाम ओर तेसरे पाऊए सेयो निकयाल़ी ते थे कि सेयो यहोवे रिया तँईं पुरोईतो रा काम नि करो, यारोबामे तिना वेदिया पाँदे बलि चढ़ाणे खे आपणे ई पुरोईत चूणे जो तिने पाह्ड़िया पाँदे बणवाईया थिया। तिने पुरोईते यारोबामो रिया बणवाईया रिया बाकरा देवतेया ओर बाच्छूए री मूर्तिया री पूजा कित्ती। लेविया ते बाद इस्राएलो रे सारे गोत्रा बीचा ते जितणे मन लगाई की इस्राएलो रे परमेशर यहोवे खे टोल़ने वाल़े थे सेयो आपणे पितरा रे परमेशर यहोवे खे बलि चढ़ाणे खे यरूशलेम शईरो दे आए। तिने यहूदा रा राज्य पक्का कित्तेया ओर सुलैमानो रा पाऊ रहूबियाम तीऊँ साला तक मजबूत कराया, कऊँकि तीऊँ साला तक सेयो दाऊद ओर सुलैमानो री बाटा दे चलदे रये।
रहूबियामो रा टब्बर
तेबे राजा रहूबियामे एकी जवाणसा साथे ब्या करी ला, मतलब महलत जेसारा बाओ दाऊदो रा पाऊ यरीमोत ओर माये यिशै रे पाऊ एलीआबो री बेटी अबीहैल थी। महलते तीन पाऊआ खे जन्म दित्तेया, जिना रे नाओं यूश, शेमर्याह ओर जाहम थे। तिजी ते बाद तिने अबशालोमो री बेटी माका साथे ब्या करी ला ओर तेसा ते अबिय्याह, अत्तै, जीजा ओर शलोमीत पैदा ऊए। रहूबियामे ठारा राणिया साथे ब्या कित्तेया ओर साठ रखैला राखिया ओर तेसरे ठाई माठे ओर साठ बेटिया पैदा ऊईया। अबशालोमो री बेटी माका ते से आपणिया सबी राणिया ते ओर रखैला ते जादा प्यार करो था; राजा रहूबियामे आपणी लाड़ी माका रा पाऊ अबिय्याह जेठा ओर सबी पाईया बीचे परदान ये सोची की ठराया कि तेसखे राजा बणाओ। से सोची-समजी की काम कित्तेया ओर तिने आपणे सारे पाऊ लग-लग करी की यहूदा ओर बिन्यामीनो रे सबी देशो रे सारे गढ़वाल़े शईरो रे ठराईते ओर तिना खे खाणे-पीणे रिया चीजा बऊत जादा दित्तिया ओर तिना खे बऊत सारिया जवाणसा टोल़िया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.