Baghlayani Bible
1 सेमुएल 24
दाऊदो रा शाऊलो खे जिऊँदा छाडणा
जेबे शाऊल ओर तेसरे सिपाई पलिश्तिया रा पीछा करी की वापस आए, तेबे तेसखे ये सन्देश मिलेया कि दाऊद एनगदिया रिया सुनसाण जगा दे लूकी रा। तेबे शाऊल सारे इस्राएली लोका बीचा ते 3,000 सिपाईया खे छाँटी की दाऊद ओर तेसरे माणूंआ खे बणो रे बाकरेया री चट्टानी बीचे टोल़ने लगेया। जेबे से बाटा दे पेडा रिया गवाईणी गे पऊँचेया जेती एक गुफा थी, तेबे शाऊल आपू पीतरे अल़का ऊणे खे गया ओर तेसा ई गुफा रे कूणे दे दाऊद ओर तेसरे माणूं बैठी रे थे। तेबे दाऊदो रे माणूंए शाऊलो खे देखी की तेसते बोलेया, “सुण, आज से ई दिन ए जेतेरे बारे दे यहोवे ताखे बोलेया था कि मां तेरे दुश्मण अराई देणे, ताकि तूँ तिना साथे मनमाना बर्ताव करी सके।” तेबे दाऊदे उठी की शाऊलो रे चोगे रा कुणा बाडीता, शाऊलो खे कुछ बी पता नि लगेया। तेबे दाऊद शाऊलो रे चोगे रा कुणा बाडणे ते पछताया। से आपणे माणूंआ खे बोलणे लगेया, “यहोवा नि करो कि आऊँ आपणे स्वामिये साथे जो यहोवे रा अभिषिक्त ए एड़ा काम करुँ कि तेस पाँदे आथ चलाऊँ, कऊँकि यहोवे से राजा बणाया ए।”
एड़िया गल्ला करी की दाऊदे आपणे माणूं समजयाए ओर सेयो शाऊलो खे काणे खे उठणे नि दित्ते। तेबे शाऊल उठी की गुफा ते निकल़ेया ओर आपणी बाटा रे गया। तिजी ते बाद दाऊद बी उठी की गुफा ते निकल़ेया ओर शाऊलो खे पीछा ते आका पाई की बोलणे लगेया, “ओ मेरे मालक, ओ मेरे राजा।” जेबे शाऊले पीछे मुड़ी की देखेया, तेबे दाऊदे जमीना रिया तरफा खे चूकी की माथा टेकेया। तेबे दाऊदे शाऊलो खे बोलेया, “जो माणूं बोलोए कि दाऊद तेरा नुकशाण चाओआ तूँ तिना री कऊँ सुणेया?”
देख, आज तैं आपणिया आखी साथे देखी राखेया कि यहोवे आज गुफा दे तूँ मेरे आथो दे करी ता था ओर किने-किने तो माखे ताखे काणे खे बोलेया था, पर माखे तां पाँदे तरस आया ओर मैं बोलेया कि मां आपणा मालक नि काणा, कऊँकि से यहोवे रा चुणेया दा राजा ए। तेबे ओ मेरे मालक, देख, तेरे चोगे रा कुणा मेरे आथो दे देख, मैं तेरे चोगे रा कुणा तो बाडी ला, पर तूँ नि काया, इजी ते निश्चा करी की जाणी लो कि मेरे मनो दे कोई बुराई या अपराध करने री सोच नि ए। मैं तेरा कोई अपराध नि करी राखेया, पर तूँ मेरे प्राण लणे खे मानो शिकार करदा रएया। यहोवा मेरा ओर तेरा न्याय करो ओर यहोवा तांते मेरा बदला लओ, पर मां तां पाँदे अमला नि करना। बुजुर्गा रे नसीअता रिया गल्ला रे मुताबिक, दुष्ट माणूंए ते ई दुष्टता ओई, पर मां तां पाँदे अमला नि करना। इस्राएलो रा राजा केसरा पीछा करने खे निकल़ी रा? ओर केस पीछे पड़ी रा? जेड़े मरे रे कुत्ते पीछे! एक पिस्सूए पीछे जो नुकशाण नि करी सकदा। इजी री खातर यहोवा न्यायी ऊई की मेरे ओर तेरे बारे दे सोची की मेरा मुकद्दमा लड़ो ओर न्याय करी की माखे तेरे आथो ते बचाओ। दाऊद शाऊलो ते इना गल्ला बोली ई चुकेया था कि शाऊले बोलेया, “ओ मेरे पाऊ दाऊद, क्या ये तेरा बोल ए?” तेबे शाऊल जोरे की रोणे लगेया। तेबे तिने दाऊदो खे बोलेया, “तूँ मांते जादा तर्मी ए, तैं तो मां साथे पलाई करी राखी, पर मैं तां साथे बुराई कित्ती। तैं आज ये प्रगट करी राखेया कि तैं मां साथे पलाई करी राखी कि जेबे यहोवे ताखे मोका दित्तेया कि आऊँ काया जाऊँ, तेबे तैं आऊँ नि काया। पला! क्या कोई माणूं आपणे दुश्मणो खे पाई की तेसखे सयी-सलामत जाणे देयोआ? इजी री खातर आज तैं जो मां साथे करी राखेया, इजी रा अच्छा फल़ यहोवा ताखे देयो। एबे माखे पता लगी गा कि तूँ जरूर एक दिन राजा बणी जाणा ओर इस्राएलो रा राज्य तेरे आथो दे मजबूत ऊणा। एबे मां साथे यहोवे री कसम खा कि तां मेरा कुल मांते बाद नाश नि करना ओर मेरे बाओ रे कराने बीचा ते मेरा नाओं नि मटयाणा।” तेबे दाऊदे शाऊलो साथे एड़ी ई कसम खाई। तेबे शाऊल आपणे कअरे चली गा ओर दाऊद आपणे माणूंआ साथे आपणे गढ़ो दे चली गा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.