Baghlayani Bible
1 सेमुएल 23
दाऊदो रा कीला शईरो रे लोका खे बचाणा
एक दिन किने दाऊदो खे बोलेया कि पलिश्ती लोक कीला शईरो ते युद्ध करने लगी रे ओर खल्याण लुटणे लगी रे। तेबे दाऊदे यहोवे ते पूछेया, “क्या आऊँ जाई की पलिश्तिया खे काऊँ?” यहोवे दाऊदो खे बोलेया, “जा, पलिश्तिया खे काई की कीला शईरो रे लोका खे बचा।” पर दाऊदो रे माणूंए तेसखे बोलेया, “आसे तो एस यहूदा प्रदेशो दे बी डरदे रऊँए, जे आसे कीला शईरो दे जाई की पलिश्तिया री सेना रा सामणा करूँगे, तो क्या आसे बऊत जादा नि डरी जाणे?” तेबे दाऊदे यहोवे ते पूछेया ओर यहोवे तेसखे ज्वाब दित्तेया, “कीला शईरो खे जा, कऊँकि मां पलिश्तिया पाँदे तूँ विजयी करना।” तेबे दाऊद आपणे माणूंआ खे लई की कीले खे गया ओर तिने कई पलिश्ती काये, ओर तिना रे डांगर लई की आईगा। ईंयाँ दाऊदे कीला शईरो दे रणे वाल़े बचाए। जेबे अहीमेलेको रा पाऊ एब्यातार दाऊदो गे कीले खे नठी गा था, तेबे से आथो रे एपोद1 लई की गया था।
तेबे शाऊलो खे ये सन्देश मिलेया कि दाऊद कीला शईरो खे जाई रा। तेबे शाऊले बोलेया, “यहोवे से मेरे आथो दे करी ता रा, से तो बड़े द्वार ओर उचिया दवाला वाल़े शईरो दे कूसी की बन्द ऊईगा रा।” तेबे शाऊले आपणी सारी सेना लड़ाई करने खे बुलाई, ताकि कीला शईरो दे जाई की दाऊद ओर तेसरे लोका खे केरी देयो।
दाऊदो खे पता लगी गा कि शाऊल माखे नुकशाण पऊँचाणे री योजना करने लगी रा, इजी री खातर तिने एब्यातार पुरोईतो खे बोलेया, “एपोदो खे नेड़े ली आओ।” तेबे दाऊदे प्रार्थना करी की बोलेया, “ओ इस्राएलो रे यहोवा परमेशर, तेरे दासे पक्का सुणी राखेया कि शाऊल मेरी बजा ते कीला शईर नाश करने खे आऊणा चाओआ। क्या कीले रे परदान लोका आऊँ तेसरे वशो दे नि करी देणा? क्या जेड़ा तेरे दासे सुणी राखेया, तिंयाँ ई शाऊल आऊणा? ओ इस्राएलो रे यहोवा परमेशर, आपणे दासो खे ये बता।” यहोवे बोलेया, “आ, से आऊणा।” फेर दाऊदे पूछेया, “क्या कीले रे परदान लोका आऊँ ओर मेरे लोक तेसरे आथो दे करी देणे?” यहोवे बोलेया, “आ, तिना करी देणे।” तेबे दाऊद ओर तेसरे माणूं जो कोई 600 थे कीले ते निकल़ी गे ओर ओरे-पोरे जेती केथी जाई सको थे तेथी चली गे। जेबे शाऊलो गे ये दशेया कि दाऊद कीले ते निकल़ी की नठी गा रा, तेबे तिने तेती जाणे री इच्छा छाडी ती।
शाऊलो रा दाऊदो रा पीछा करना
तेबे दाऊद ओर तेसरे साथी तो उजाड़ जगा रे गढ़ो दे रणे लगे ओर पाह्ड़ी देशो रे जीप नाओं री उजाड़ जगा दे बी रणे खे गया। शाऊल तेसखे हर रोज टोल़दा रया, पर यहोवे से तेसरे आथो दे नि पड़ने दित्तेया। दाऊदो खे पता लगी गा कि शाऊल माखे काणे खे टोल़ने लगी रा। तेबे दाऊद जीप नाओं री उजाड़ जगा दे होरेश नाओं री जगा दे था कि शाऊलो रा पाऊ योनातान उठी की दाऊदो गे होरेश शईरो दे गया जेती से लूकी रा था, ओर यहोवे री चर्चा करी की तेसखे याओ दित्तेया। योनाताने तेसखे बोलेया, “डर नि, कऊँकि मेरा बाओ शाऊल ताखे कुछ नि करी सकदा ओर तूँ ई इस्राएलो रा राजा ऊणा ओर आऊँ तांते निठे अधिकारी ऊणा ओर एसा गल्ला खे मेरा बाओ शाऊल बी जाणोआ।” तेबे तिने दुँईं यहोवे री कसम खाई की आपू बीचे वाचा बानी, तेबे दाऊद होरेश शईरो दे रयी गा ओर योनातान आपणे कअरो खे चली गा।
तेबे जीप शईरो रे लोक गिबा दे शाऊलो गे जाई की बोलणे लगे, “दाऊद तो आपणे साथिया साथे आसा गे होरेश शईरो रे गढ़ो दे आ, मतलब तेसा हकीला नाओं री पाह्ड़िया दे लूकेया दा रओआ, जो यशीमोनो रिया दखणा रिया तरफा खे ए। इजी री खातर एबे, ओ राजा, तेरी जो इच्छा आऊणे री ए, तो आओ ओर तेसखे राजे रे आथो दे पकड़वाणे रा काम म्हारा ऊणा।” शाऊले बोलेया, “यहोवे री आशीष तुसा पाँदे ओ, कऊँकि तुसे मां पाँदे दया करी राखी।” तुसे जाई की ओर बी निश्चा करी लो ओर देख-भाल़ करी की जाणी लो ओर तेसरे अड्डे रा पता लगाई लो ओर पता लगाओ कि से तेती किने देखी राखेया, कऊँकि मांगे किने बताई राखेया कि से बड़ी उशयारिया दे काम करोआ। इजी री खातर जेती केथी से लूकेया दा रओआ तिना जगा खे बी देखी की पछयाणो, तेबे निश्चा करी की मांगे वापस आऊणा। तेबे मां तुसा साथे चलणा ओर से तेते देशो दे जेती केथी बी ओ, तो मां से यहूदा रे सारे गोत्रो दे टोल़ी लणा।
तेबे सेयो चली की शाऊलो ते पईले जीपो रिया सुनसाण जगा खे गये। पर दाऊद आपणे माणूंआ समेत माओन नाओं रिया सुनसाण जगा दे चली गा था, जो अराबा काअटिया रे यशीमोनो रिया दक्खणा रिया तरफा खे ए।
तेबे शाऊल आपणे माणूंआ खे साथे लई की तेसखे टोल़ने गया। इजी रा सन्देश सुणी की दाऊद पाह्ड़ो ते उतरी की माओन नाओं रिया सुनसाण जगा दे रणे लगेया। ये सुणी की शाऊले माओन नाओं रिया सुनसाण जगा दे दाऊदो रा पीछा कित्तेया। शाऊल तो पाह्ड़ो रे एक तरफा खे ओर दाऊद आपणे माणूंआ समेत पाह्ड़ो रे दूजी तरफा खे जाणे लगी रा था। दाऊद शाऊलो रे डरो रे मारे फटाफट जाणे लगी रा था ओर शाऊल आपणे माणूंआ समेत दाऊद ओर तेसरे माणूंआ खे पकड़ने खे केरा पाणा चाओ था, कि एकी दूते शाऊलो गे आई की तेसखे बोलेया, “फटाफट चली जा, कऊँकि पलिश्तिये देशो पाँदे अमला करी राखेया।” ये सुणी की शाऊल दाऊदो रा पीछा छाडी की पलिश्तिया रा सामणा करने खे चली गा, इजी बजा ते तेसा जगा रा नाओं “सेलाहम्महलकोत” मतलब दो इस्से करने वाल़ी चट्टान पड़ेया। तेथा ते दाऊद आपणे साथिया साथे माओन जगा ते चलीगा ओर एनगदी जगा रे गढ़ो दे रणे लगेया।
Source notes (1)
- Footnote एपोद पुरोईतो रा खास टाल्ला
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.