Baghlayani Bible
1 सेमुएल 18
दाऊद ओर योनातानो री दोस्ती
जेबे दाऊद राजा शाऊलो साथे गल्ला करी चुकेया, तेबे दाऊद शाऊलो रे पाऊ योनातानो ते मिलेया ओर छोड़ ई सेयो दोस्त बणी गे, ओर योनातान दाऊदो ते बऊत जादा प्यार करने लगेया। तेस दिनो ते शाऊले दाऊदो खे आपू गे ई रणे खे बोलेया ओर से तेसरे बाओ रे कअरे फेर वापस नि जाणे दित्तेया। तेबे योनाताने दाऊदो साथे कसम खाई की बोलेया की आसे हमेशा खे दोस्त रणे, कऊँकि से तेसते बऊत जादा प्यार करो था। तेबे योनाताने आपणा चोगा जो तिने पईनी राखेया था, खोली की आपणे टाल्लेया समेत दाऊदो खे देईता, ओर तिने आपणी तलवार, धनुष, कमरबंद बी दाऊदो खे देई ते।
शाऊले दाऊद जेती-जेती बी पेजेया से तेथी गया ओर जो बी शाऊले बोलेया दाऊदे समजा ते से सई रितिया ते कित्तेया। इजी बजा ते शाऊले दाऊद सेना रा परदान नियुक्त कित्तेया। सारी प्रजा रे लोक ओर कर्मचारी तेसते खुश थे।
शाऊलो रा दाऊदो ते जल़न करना
ओर तेस दिने जेबे दाऊद तेस पलिश्ती गोलियतो खे काई की शईरो खे वापस आऊणे लगी रा था ओर इस्राएलो रे सारे सिपाई बी आऊणे लगी रे थे, तेबे इस्राएलो रिया सब जवाणसा शईरो ते निकल़ी की डफली ओर बीणा लई की, खुशिया साथे गांदिया ओर बजांदिया ऊईया, शाऊल राजे रे स्वागतो खे निकल़िया। तिने जवाणसे जीतणे रिया खुशिया दे ये गाणा गाया, “शाऊले तो ह्जार, पर दाऊदे दस ह्जार काये।”
तेबे राजा शाऊल बऊत रोषे ऊआ ओर ये गल्ल तेसखे बऊत बुरी लगी, तिने आपणे आपू ते बोलेया, “सेयो बोलणे लगी रे कि दाऊदे दस ह्जार काये।” पर मैं सिर्फ ह्जारो काये, ओर छोड़ ई तिना से आपणा राजा बनाणे खे बी सोचणा। तेबे तेस दिनो ते बाद शाऊल दाऊदो ते जल़ने लगेया।
ओर दूजे दिने परमेशरे एक बुरी आत्मा पेजी ताकि से राजा शाऊलो खे आपणे वशो दे करो, ओर से आपणे कअरो रे पीतरे भविष्यबाणी करने लगेया, दाऊद हर दिनो जेड़ा शाऊलो खे बीणा बजाणे लगी रा था। राजा शाऊले आपणे आथो दे आपणा भाल़ा लई राखेया था। तेबे शाऊले ये सोची की कि मां एड़ा बाणा कि भाल़ा दाऊदो खे चीरी की पीतो दे तसी जाओ, तेबे तिने भाल़ा दो बार चलाया, पर दाऊद तेस सामणे ते दुँईं बार अटी गा।
यहोवा दाऊदो री मताद करो था ओर तेस साथे रओ था, ओर शाऊलो खे छाडी चुकेया था। इजी री खातर शाऊल दाऊदो ते डरने लगेया। इजी बजा ते शाऊले दाऊद आपू गे ते दूर करी की एक ह्जार सिपाईया पाँदे परदान बणाया। ओर युद्धो दे दाऊद आपणे सिपाईया री अगुआई करने लगेया। ओर दाऊद आपणी अक्ला ते जो बी करो था तिदे से सफल ओ था, कऊँकि यहोवा तेसरी मताद करो था। जेबे शाऊले देखेया कि दाऊद बऊत सारे युद्ध जीती गा, तेबे से तेसते ओर बी डरने लगेया। पर इस्राएल ओर यहूदा रे सारे लोक दाऊदो ते प्यार करो थे, कऊँकि से लड़ाईया दे तिना रा परदान ऊई की तिना खे तिना रे दुश्मणा रे खलाफ अगुवाई करो था।
शाऊलो री बेटी मीकला रा दाऊदो साथे ब्या
तेबे एक दिन शाऊले ये सोची की कि दाऊद मेरे आथे नि पर पलिश्तिया रे ई आथे मरो, तेसखे बोलेया, “सुण, मां आपणिया बडिया बेटिया मेरबा रा ब्या तां साथे करी देणा, इतणा कर कि मेरिया तँईं वीरता साथे यहोवे रिया तरफा ते युद्ध कर।” दाऊदे शाऊलो खे बोलेया, “आऊँ क्या ए ओर मेरी जिन्दगी क्या ए ओर इस्राएलो रे मेरे बाओ रा कुल क्या ए कि आऊँ राजे रा जवांई ऊई जाऊँ?” जेबे बखत आई गा कि शाऊलो री बेटी मेरबा रा ब्या दाऊदो साथे करेया जाओ, पर शाऊले आपणे वादे रे मुताबिक ना करी कि मेरबा रा ब्या महोला शईरो दे रणे वाल़े अद्रीएलो साथे करी ता।
पर शाऊलो री छोटी बेटी मीकल दाऊदो ते प्यार करने लगी ओर जेबे एसा गल्ला रा पता शाऊलो खे लगेया, तेबे से खुश ऊआ। शाऊले सोचेया, मां दाऊदो साथे मीकला रा ब्या करी देणा। पर से दाऊदो खे फन्दा बणी जाणी ओर पलिश्तिया से काई देणा, तेबे तिने दाऊदो ते दूजी बार बोलेया, “तूँ आज ई मेरा जवांई बणी जा।” तेबे शाऊले आपणे कर्मचारिया खे आज्ञा दित्ती, “दाऊदो साथे लूकी की एड़िया गल्ला करो कि सुण, राजा तांते बऊत खुश ए ओर तेसरे सारे कर्मचारी बी तांते प्यार करोए, इजी री खातर एबे तूँ राजे रा जवांई ऊई जा।” तेबे शाऊलो रे कर्मचारिये दाऊदो साथे एड़िया ई गल्ला कित्तिया। पर ये सब सुणी की दाऊदे बोलेया, “राजे रा जवांई बणना आसान नि ए मांगे इतणा तअन नि ए कि राजे री बेटिया खे देई सकूँ। आऊँ तो एक सादारण गरीब माणूं आ।” जेबे शाऊलो रे कर्मचारिये तेसखे बताया कि दाऊदे एड़िया-एड़िया गल्ला कित्तिया, तेबे शाऊले तिना खे बोलेया, “तुसे दाऊदो खे ईंयाँ बोलणा, राजे खे दाजो दे कुछ नि चाईयो। से पलिश्तिया रिया सिर्फ 100 खलड़िया चाओआ। राजा आपणे पलिश्ती दुश्मणा ते बदला लणा चाओआ।” शाऊलो री इच्छा येई थी कि दाऊद पलिश्तिया रे आथो ते काया जाओ। जेबे शाऊलो रे कर्माचारिये दाऊदो खे यो गल्ला बताईया, तेबे से राजे रा जवांई ऊणे खे खुश ऊआ। ओर तेस ई बखते दाऊद आपणे कुछ सिपाईया खे साथे लई की पलिश्तिया ते युद्ध करने खे गया, ओर तिना रे 200 सिपाई काये; तेबे दाऊद तिना रिया खलड़िया ली आया ओर सेयो राजे खे गिणी-गिणी की दित्तिया, ताकि से राजे रा जवांई ऊई जाओ। तेबे शाऊले आपणी बेटी मीकल तेसखे ब्यायी ती। शाऊलो खे ये पता लगी गा कि यहोवा दाऊदो साथे ए ओर मेरी बेटी मीकल बी तेसते प्यार करोई, इजी री खातर शाऊल दाऊदो ते पईले ते बी जादा डरीगा ओर शाऊल जदुए तक जिऊँदा रया दाऊदो रा दुश्मण बणेया दा रया। पलिश्तिया रे परदान ओर सिपाई इस्राएली लोका साथे युद्ध करने खे आओ थे, पर जेबे-जेबे सेयो युद्ध करने खे आओ थे, तेबे-तेबे दाऊद शाऊलो रे अधिकारिया ते जादा अक्ला ते काम करो था। इजी ते तेसरा नाओं बऊत जादा फैलीगा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.