Baghlayani Bible
1 राजा 7
सुलैमानो रे ओर काम
तेबे सुलैमाने आपणा मईल बी बणाया ओर तिजी खे पूरा करने दे तेरा साल लगे। तिने लबानोनो रा वन नाओं रा एक ओर मईल बणाया जेतेरी लम्बाई 150 फुट, चौड़ाई पचयात्तर फुट ओर ऊचाई पैंताल़ी फुट थी; इदे देवदारो रे खम्बेया रिया तीन लाईनी थिया जेते पाँदे तेतेरी छत टीकी री थी। एकी लाईनी दे पन्द्रा खम्बे थे, हर एकी खम्बे पाँदे देवदारो री कड़िया रा मूरा था। ओर पैंताल़ी खम्बेया पाँदे देवदारो रिया लकड़िया री छत थी, जेते खे साअरा देणे खे कड़िया थिया, जो खम्बेया खे एकी दूजे ते जोड़ो थिया। तीऊँ लाईनी दे कड़िया लगाईया ओर तीऊँ रिया दवारिया आमणे-सामणे बणिया। ओर सारे द्वार ओर दवारिया रिया कड़िया चौरस थिया ओर तीऊँ मईला रिया दवारिया आमणे-सामणे बणिया। तिने एक खम्बे वाल़ा बरांडा बी बणाया जेतेरी लम्बाई पचयात्तर फुट, ओर चौड़ाई पैंताल़ी फुट थी। बरांडे रे सामणे खम्बे ओर एक छज्जा था। तेबे तिने लोका रा न्याय करने खे न्याय रे सिंहासनो खे बी एक बरांडा बणाया, जेतेखे न्याय रा बरांडा बोलेया गया ओर तिने एक मेल्ले ते दूजे मेल्ले तक देवदारो रे तख़्ते लगाए।
तेसरे रणे रा मईल जो तेस बरांडे रे पीतरे एकी तरफा खे आँगणो दे बणेया, से बी तेते टंगो रा ई बणेया। तेबे तेस बरांडे जेड़ा सुलैमाने फिरौनो री बेटिया खे जो तिने ब्यायी ली थी, एक ओर मईल बणाया।
यो सारे कअर बारे पीतरे निऊँआ ते लई की छतो तक एड़े कीमती ओर कअड़े रे पात्थरा साथे बणे जो नापी की ओर आरेया साथे चीरी की त्यार कित्ते थे ओर बारले आँगणो ते लई की पीतरले आँगणो तक लगाए। तेतेरी निऊँ तो बड़े कीमती बड़े-बड़े मतलब पन्द्रा-पन्द्रा ओर बारा-बारा फुट लाम्बे पात्थरा री पाई थी। ओर ऊबे बी बड़े कीमती पात्थर थे, जो नापी की कअड़े रे पात्थर थे ओर देवदारो री लकड़ी बी थी। बड़े आँगणो रे चऊँ कनारले केरे कअड़े रे पात्थरा रे तीन रद्दे ओर देवदारो री लकड़िया री एक परत थी, जेड़ा कि यहोवे रे मन्दरो रे पीतरले आँगण ओर मईलो रे बरांडे रे लगी रे थे।
तेबे सुलैमान राजे दूत पेजी की सोर देशो ते हूराम बुलाया। से नप्ताली गोत्रो री केसी बिदुआ रा पाऊ था ओर तेसरा बाओ एक सोर जगा दे रणे वाल़ा ताँबे बगैरा रे पांडे बनाणे वाल़ा था, ओर हूराम बी पीतल़ी री कारीगरिया दे पूरी बुद्धि, निपुणता ओर समज राखो था। तेबे से सुलैमान राजे गे आई की तेसरा सारा काम करने लगेया। हीरामे पीतल़ गल़ाई की सताई फूट ऊच्चे दो खम्बे बणाए ओर एकी-एकी खम्बे रा केरा ठारा फूट था। यो पितरा ते खोखले थे, ओर एते धातुआ री मोटाई तीन ईंच थी। तिने खम्बेया रे सिरे पाँदे लगाणे खे पीतल़ गल़ाई की दो टकणियां बणाईया; एकी-एकी टकणियां री ऊचाई, साडे सात फुट थी। खम्बेया रे सिरो पाँदली टकणियां खे चार खाने रिया सात-सात जाल़िया ओर साँगल़ा रिया सात-सात चालरा बणिया। तिने खम्बे बी ईंयाँ बणाए कि खम्बेया रे सिरो पाँदली एक-एक टखणियां खे टखणे खे चऊँ कनारे जाल़िया री एक-एक चालरा पाँदे अनारा री दो पाल़िया थिया। जो टकणियां बरांडे रे खम्बेया रे सिरेया पाँदे बणिया, तिना दे छे-छे फुट ऊच्चे सोसणो रे फूल बणे दे थे। ओर एकी-एकी खम्बे रे सिरे पाँदे, तेसा गोल़ाईया गे जो जाल़िया साथे लगी री थी, एक ओर टकणी बणी ओर एकी-एकी टकणियां पाँदे जो अनार चऊँ तरफा खे पाल़िया-पाल़िया दे बणे थे, सेयो 200 थे। तिने सेयो खम्बे मन्दरो रे बरांडे दे खड़े कित्ते। तेबे तिने दाँणी तरफा खे खम्बा खड़ा करी की तेतेरा नाओं याकीन राखेया; तेबे खूँजे कनारे खम्बा खड़ा करी की तेतेरा नाओं बोअज राखेया। ओर खम्बेया रे सिरेया पाँदे सोसणो रे फूलो रा काम ऊआ, खम्बेया रा काम ईंयाँ ई पूरा ऊआ।
पीतल़ी रा कुण्ड
इजी ते बाद हूरामे पीतल़ी रा एक बड़ा कुण्ड बणाया, जो एक कूणे ते लई की दूजे कूणे तक पन्द्रा फुट चौड़ा था, तेतेरा आकार गोल़ था ओर तेतेरी ऊचाई साडे सात फुट थी ओर तेतेरे चऊँ कनारला केरा पैंताल़ी फुट था। ओर तेतेरे चऊँ कनारे कूणेया ते निठे डेड-डेड फुटो दे दस-दस कलिया बणिया, जो कुण्डो रे चऊँ कनारे थिया; जेबे से बणाया; तेबे यो कलिया बी दो पाल़िया दे बणाईया। ओर से औद बारा बणाए रे बल़दा पाँदे राखेया, जिना बीचा ते तीन उत्तर, तीन पच्छम, तीन दक्खण ओर तीऊँ पूर्वो रिया तरफा खे मूँ करी राखेया था ओर तिना ई पाँदे कुण्ड था ओर तिना सारेया रा पिछला इस्सा पीतरली तरफा खे था। तेतेरी मोटाई चार ईंच थी ओर तेतेरा कनारा कटोरे रे सिरे जेड़ा सोसणो रे फूलो जेड़ा बणेया था ओर तिदे 40,000 लीटर पाणी बी आओ था।
पीतल़ी रे पावे
तेबे हूरामे पीतल़ी रे दस पावे बणाए, एकी-एकी पावे री लम्बाई छे फुट, चौड़ाई छे फुट ओर ऊचाई साडे चार फुट थी। तिना पावेया री बणाऊट एड़ी थी; तिना दे फटिया थिया ओर फटिया रे बीचे जोड़ बी थे। ओर जोड़ा रे बीछीए री फटिया दे शेर, बल़द ओर करूब बणी रे थे ओर जोड़ा पाँदे बी एक-एक पावा बणेया ओर शेर ओर बल़दा निठे लटकदे ऊए चालरा बणी रिया थिया। एक-एक ठेले खे पीतल़ी रे चार टईर ओर पीतल़ी रिया धुरिया बणिया ओर एकी-एकी रे चारो कूणेया ते लगे रे आधार बी कअड़ी की बणाए जो अऊदिया निठो तक पऊँचो थे ओर एकी-एकी आधारो गे चालरा बणी रिया थिया। अऊदिया रा मूरा जो ठेले री काँगणिया रे पीतरे ओर पाँदे बी था से डेड फुट ऊच्चा था ओर पावे रा मूरा जेतेरी चौड़ाई टाई फुट थी, से पावे री बणाऊटी जेड़ा गोल़ बणेया; ओर पावे रे तेस मुरे पाँदे बी कुछ खुदेया दा काम था, ओर तिना री फटिया गोल़ नि, चौरस थिया। ओर चारो टईर फटिया निठे थे ओर एक-एक पावे री धुरिया बी थिया ओर एक-एक टईरो री ऊचाई टाई फुट थी। टईरा री बणाऊट, रथो रे टईरो जेड़ी थी ओर तिना री तारिया, चक्र, आरे ओर नाभे सारे पीतल़ गाल़ी की बणाई राखे थे। ओर एक-एक ठेले रे चऊँ कूणेया पाँदे चार आधार थे ओर आधार ओर ठेले दोनो एक ई टुकड़े दे बणी रे थे। ओर एक-एक ठेले रे सिरे पाँदे एक फुट ऊच्ची चऊँ कनारे गोल़ाई थी ओर ठेले रे सिरो पाँदले साअरे खे फटे ओर फटिया ठेले साथे जुड़े रे एक ई टुकड़े दे बणी रे थे। ओर साअरे रे पाटड़े ओर फटिया पाँदे जितणी जगा जेस पाँदे थी तिदे तिने करूब, शेर ओर खजूरी रे डाल़ खणी की परी ते ओर चऊँ कनारे चालर बी बणाए। ईंयाँ तिने दस ठेले बणाए; सारेया रा एक ई साँचा ओर एक ई नाप ओर एक ई आकार था। तिने पीतल़ी रिया दस अऊदिया बणाईया। एक-एक अऊदिया दे लगभग 800 लीटर पाणी समाई जाओ था ओर एक-एक औदी छे-छे फुट चौड़ी थी ओर दस ठेलेया बीचे एकी-एकी पाँदे, एक-एक अऊदी थी। तिने पाँज अऊदिया दक्खणा रिया तरफा खे ओर पाँज अऊदिया उत्तरो रिया तरफा खे राखी तिया ओर कुण्ड मन्दरो रे दाँणे कनारे, मतलब दक्खण-पूर्वो रिया तरफा खे राखी ता। हूरामे अऊदिया, फरूए ओर कटोरे बी बणाए। तेबे हूरामे सुलैमान राजे रे परमेशर यहोवे रे मन्दरो खे जितणा काम करना था, से सारा पूरा करिता, मतलब दो खम्बे ओर तिना टकणियां री गोल़ाई जो दुँईं खम्बेया रे सिरे पाँदे थी ओर दुँईं खम्बेया रे सिरे पाँदली गोल़ाईया खे टखणे खे दो-दो जाल़िया ओर दुँईं जाल़िया खे 400-400 अनार, मतलब खम्बेया रे सिरेया पाँदे जो गोल़ाईया थी, तिना खे टकणे खे एक-एक जाल़िया खे अनारा री दो-दो पाल़िया; दस ठेले ओर इना पाँदलिया दस अऊदिया, एक कुण्ड ओर तेते निठले बारा बल़दा रिया बारा मूर्तिया ओर आँडिया, फरूए, ओर कटोरे बणे। ये सारे नग जो हूरामे यहोवे रिया तँईं सुलैमान राजे खे बणाए, सेयो चमकाये रे पीतल़ी रे बणाए। राजे सेयो यरदन नदिया री तराईया दे मतलब सुक्कोत शईर ओर सारतान जगा रे बीचे चिकणी माट्टिया दे बनाणे खे दित्ती। ओर सुलैमाने सारे नग बऊत जादा ऊणे रिया बजअ ते बिना तोले छाडी ते, जेतेरिया बजा ते पीतल़ी रा बजन पता नि लगी सकेया। यहोवे रे मन्दरो दे जितणे नग थे सुलैमाने सारे बणाए, मतलब सूईने री बेदी ओर सूईने री से मेज जेते पाँदे चढ़ाणे री रोटी राखी जाओ थी, ओर शुद्ध सूईने रिया दीवटा जो पीतरले छोटे कमरे ते आगे पाँज दक्खणा रिया तरफा खे ओर पाँज उत्तरो रिया तरफा खे थिया राखी रिया ओर सूईने रे फूल, दिऊए ओर चिमटे ओर शुद्ध सूईने रे तसले, कैंचिया, कटोरे, तूपदान, कड़छे ओर पितरला मन्दर जेतेखे परम पवित्र जगा बोलो थे ओर मईल जेतेखे मन्दर बोलो थे, दुँईं रे दरवाजेया खे सूईने रे कब्जे बणे। ईंयाँ जो-जो काम सुलैमान राजे यहोवे रे मन्दरो खे कित्ते, से सारा पूरा करी ता। तेबे सुलैमाने आपणे बाओ दाऊदो रे जरिये पवित्र कित्ते रे सूईने-चाँदी ओर नग पीतरे पऊँचाई की यहोवे रे मन्दरो रे पण्डारो रे राखी ते।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.