Baghlayani Bible
1 इतिआस 9
यरूशलेम शईरो दे रणे वाल़ेया रा इन्तजाम
ईंयाँ सारे इस्राएली आपणे-आपणे खानदानो रे मुताबिक, जो इस्राएलो रे राजेया रे इतिआसो री कताबा रे लिखी राखे, गिणे। ओर यहूदी आपणे विश्वासघातो रिया बजा ते बानी की बेबीलोनो रे पऊँचाए।
बन्दुआईया ते वापस ऊई की जो लोक आपणी-आपणी निज जमीन, मतलब आपणे शईरो दे रओ थे, सेयो इस्राएली, पुरोईत, लेविये ओर मन्दरो रे सेवक थे।
यरूशलेम शईरो दे कुछ यहूदी; कुछ बिन्यामीनी, ओर कुछ एप्रैमी ओर मनश्शेई लोक रओ थे, मतलब यहूदा रे पाऊ पेरेसो रे कुलो बीचा ते अम्मीहूदो रा पाऊ ऊतै, जो ओम्रीये रा पाऊ ओर इम्रीए रा पोता ओर बानीए रा पड़पोता था। ओर शीलोईया बीचा ते तेसरा जेठा पाऊ असायाह ओर तेसरे पाऊ। जेरह रे कुलो बीचा ते यूएल ओर इना रे पाई रओ थे, ओर इस्राएलिया बीचा ते तेती 690 मर्द रओ थे।
फेर बिन्यामीनो रे कुलो बीचा ते सल्लू जो मशुल्लामो रा पाऊ, होदव्याह रा पोता ओर हस्सनूआ रा पड़पोता था। ओर यिबनायाह जो यरोहामो रा पाऊ था ओर एला जो उज्जीए रा पाऊ ओर मिक्रीए रा पोता था ओर मशुल्लाम जो शपत्याह रा पाऊ, रूएलो रा पोता ओर यिब्निय्याह रा पड़पोता था; ओर इना रे पाई जो आपणी-आपणी वंशावलिया रे मुताबिक मिली की 956 थे। यो सारे मर्द आपणे-आपणे पितरा रे कराने रे मुताबिक पितरा रे करानेया रे मूल़ थे।
गुलामिया ते वापस आए दे पुरोईत
यरूशलेमो दे रणे वाल़े पुरोईता बीचा ते यदायाह, यहोयारीब ओर याकीन, ओर अजर्याह जो परमेशरो रे मन्दरो रा परदान ओर हिल्किय्याह रा पाऊ था, ये मशुल्लामो रा पाऊ, ये सादोको रा पाऊ, ये मरायोतो रा पाऊ, ये अहीतूबो रा पाऊ था; ओर अदायाह जो यरोहामो रा पाऊ था, ये पशहूरो रा पाऊ, ये मल्किय्याह रा पाऊ, ये मासै रा पाऊ, ये अदीएलो रा पाऊ, ये यहजेरा रा पाऊ, ये मशुल्लामो रा पाऊ, ये मशिल्लीतो रा पाऊ, ये इम्मेरो रा पाऊ था; ओर इना रे पाई थे जो आपणे-आपणे पितरा रे करानेया रे 1,760 मर्द थे, सेयो परमेशरो रे मन्दरो री सेवा करने खे बऊत ई निपुण मर्द थे।
गुलामिया ते वापस आए दे लेवी
फेर लेविया बीचा ते जो यरूशलेमो दे रणे लगे, मरारिए रे कुलो बीचा ते शमायाह जो हश्शूबो रा पाऊ, अज्रीकामो रा पोता ओर हशब्याह रा पड़पोता था; ओर बकबक्कर, हेरेश ओर गालाल ओर आसापो रे कुलो बिचा ते मत्तन्याह जो मीका रा पाऊ ओर जिक्रीए रा पोता था; ओर ओबद्याह जो शमायाह रा पाऊ, गालालो रा पोता ओर यदूतूनो रा पोता था: ओर बेरेक्याह जो आसा रा पाऊ ओर एल्काना रा पोता था जो नतोपाईया रे गाँवो रे रओ था।
लेवी जो द्वारपाल थे
द्वारपाला बीचा ते आपणे-आपणे पाईया समेत शल्लूम, अक्कूब, तल्मोन ओर अहीमान, तिना बीचा ते बड़ा शल्लूम था। ओर से यबुओ तक पूर्वो कनारले राजे रे बड़े द्वारो गे द्वारपालो रा काम करो था। लेविया रे डेरेया रे द्वारपाल यो ई थे। ओर शल्लूम जो कोरे रा पाऊ, एब्यासापो रा पोता ओर कोरह रा पड़पोता था ओर तेसरे पाई जो तेसरे मूलमर्दो रे कराने रे मतलब कोरही थे सेयो एते कामो रे अधिकारी थे कि सेयो तम्बूए रे द्वारपाल ओ। तिना रे बुजुर्ग तो यहोवे रे डेरे अधिकारी ओर प्रवेश द्वारो रे रखवाल़े थे।
पुराणे बखतो रे एलीआजारो रा पाऊ पीनहास जेस साथे यहोवा रओ था, से तिना रा परदान था।
मेशेलेम्याह रा पाऊ जकर्याह मिलणे वाल़े तम्बूए रा द्वारपाल था। यो सब जो द्वारपाल ऊणे खे चूणे, सेयो 212 थे। यो जिना रे बुजुर्गा खे दाऊद ओर शमूएल दर्शीये विश्वासो जोगे जाणी की ठराए थे, सेयो आपणे-आपणे गाँवो रे आपणी-आपणी वंशावलिया रे मुताबिक गिणे।
तेबे सेयो ओर तिना री ल्वाद यहोवे रे मन्दर, मतलब तम्बूए रे मईलो रे बड़े द्वारो रा अक्क बारी-बारी राखो थे। द्वारपाल पूर्ब, पच्छमा, उत्तर, दक्खण, चारो दिशा रिया तरफा खे चौकसी करो थे। ओर इना रे पाई जो गाँवो रे रओ थे, तिना खे सात-सात दिना ते बाद बारी-बारिया ते तिना साथे रणे खे आऊणा पड़ो था। कऊँकि चारो परदान द्वारपाल जो लेविये थे, सेयो विश्वासो जोगे जाणी की परमेशरो रे मन्दरो दे कमरे रे ओर पण्डारो रे अधिकारी ठराए थे। सेयो परमेशरो रे मन्दरो रे नेड़े-तेड़े रात इजी खे बिताओ थे, कऊँकि तेथो री रखवाल़ी तिना गे सम्बाल़ी राखी थी ओर प्यागा-प्यागा से खोलणा तिना रा ई काम था।
लेविया री ओर जिम्मेदारी
तिना बीचा ते कुछ आराधना रे पांडेया रे रखवाल़े थे, कऊँकि यो पांडे गिणी की पीतरे पऊँचाणे ओर गिणी की बारे बी निकयाल़े जाओ थे। ओर इना बीचा ते कुछ रखवाल़े समानो रे ओर पवित्र जगा रे पांडेया रे ओर मैदे, शराब, तेल, लोबान ओर खुशबूदार द्रव्य रे अधिकारी ठराए थे।
पुरोईता रे पाऊआ बीचा ते कुछ खुशबूदार द्रव्य रा मिश्रण त्यार करने रा काम करो थे।
ओर मत्तित्याह नाओं रा एक लेवी जो कोरही शल्लूमो रा जेठा पाऊ था से विश्वासो जोगा जाणी की तवेया पाँदे बणाई री चीजा रा अधिकारी नियुक्त कित्तेया था।
तेसरे पाई मतलब कहातिया बीचा ते कुछ पेंटा वाल़ी रोटिया रे अधिकारी थे, ताकि हर एक रामो रे दिनो रे तिजी खे त्यार करेया करो। यो गायक थे जो लेवी पितरा रे कराने बीचा ते खास थे ओर मन्दरो रे रओ थे ओर बाकी सेवा रे कामो ते छूटे थे; कऊँकि सेयो दिन-रात आपणे कामो रे लगे रे रओ थे। यो ई आपणी-आपणी पीढ़िया रे लेविया रे पितरा रे कराने रे खास मर्द थे, यो सब यरूशलेम शईरो देई रओ थे।
शाऊल राजे रा खानदान
गिबोन शईरो दे गिबोनो रा बाओ यीएल रओ था, जेसरी लाड़िया रा नाओं माका था। तेसा रा जेठा पाऊ अब्दोन ऊआ, तेबे सूर, कीश, बाल, नेर, नादाब, गदोर, अह्यो, जकर्याह ओर मिक्लोत; ओर मिक्लोतो ते शिमाम पैदा ऊआ ओर यो बी आपणे पाईया सामणे आपणे पाईया साथे यरूशलेम शईरो रे रओ थे। नेरो ते कीश, कीशो ते शाऊल, शाऊलो ते योनातान, मल्कीशूअ, अबीनादाब ओर एशबाल पैदा ऊए। ओर योनातानो रा पाऊ मरीब्बाल ऊआ ओर मरीब्बालो ते मीका पैदा ऊआ। मीका रे पाऊ पीतोन, मेलेक, तह्रे ओर आहाज ऊए; ओर आहाजो ते यारा, ओर यारा ते आलेमेत, अज्मावेत ओर जिम्री ओर जिम्रिए ते मोसा, ओर मोसा ते बिना पैदा ऊआ ओर बिना रा पाऊ रपायाह ऊआ, रपायाह रा एलासा ओर एलासा रा पाऊ आसेल ऊआ। ओर आसेलो रे छे पाऊ ऊए जिना रे नाओं यो थे, मतलब अज्रीकाम, बोकरू, इश्माएल, शरायाह, ओबद्याह ओर हानान; आसेलो रे यो ई पाऊ ऊए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.