Baghlayani Bible
1 इतिआस 24
पुरोईता रिया जिम्मेवारिया
तेबे हारूणो री ल्वादा रे दल यो थे। हारूणो रे पाऊ तो नादाब, अबीहू, एलीआजार ओर ईतामार थे। पर नादाब ओर अबीहू आपणे बाओ रे सामणे ई मरीगे। तिना रे कोई पाऊ नि था, इजी री खातर पुरोईतो रा काम एलीआजार ओर ईतामार करो थे। दाऊदे एलीआजारो रे कुलो रा सादोक ओर ईतामारो रे कुलो रे अहीमेलेको री मतादा ते तिना खे आपणी-आपणी सेवा रे कामा रे मुताबिक दल-दल करी की बाँडे। एलीआजारो रे कुलो रे मुख्य मर्द ईतामारो रे कुलो रे मुख्य मर्दा ते जादा थे ओर सेयो ईंयाँ बाँडे मतलब एलीआजारो रे कुलो रे पितरा रे कराने रे सोल़ा ओर ईतामारो रे कुलो रे पितरा रे आठ मुख्य मर्द थे। तेबे सेयो चिट्ठी पाई की बराबर-बराबर बाँडे, कऊँकि एलीआजार ओर ईतामार दुँईं रे कुला रे पवित्र जगा दे हाकिम ओर परमेशरो रे हाकिम नियुक्त ऊए थे।
ओर नतनेलो रे पाऊ शमायाहे जो शास्त्री ओर लेवी था, तिने तिना रे नाओं राजा, परदान ओर सादोक पुरोईत ओर एब्यातारो रे पाऊ अहीमेलेक ओर पुरोईत ओर लेविया रे पितरा रे कराने रे मुख्य मर्दा रे सामणे लिखे; मतलब पितरा रा एक कराना तो एलीआजारो रे कुलो ते ओर एक ईतामारो रे कुलो बीचा ते लया।
पईली चिट्ठी तो यहोयारीबो रे ओर दूजी यदायाह, तीजी हारीम, चौथी सोरीम, पाँजी मल्किय्याह, छठी मिय्यामीन, साती हक्कोस, आठी अबिय्याह,1 नऊई येशुअ रे, दसी शकन्याह, ग्यारी एल्याशीब, बारी याकीमो रे, तेरी हुप्पा रे, चौदी येसेबाब, पन्द्री बिल्गा, सोल़ी इम्मेर, सतारी हेजीर, ठारी हप्पित्सेस, उन्नी पतह्माह, बीयूई यहेजकेल, इक्की याकीन, बाई गामूल, तेई दलायाह ओर चौबी माज्याह रे नाओं री निकल़ी। तिना री सेवकाईया खे तिना रा येई नियम ठराया कि सेयो आपणे तेस नियमो रे मुताबिक जो इस्राएलो रे परमेशर यहोवे री आज्ञा रे मुताबिक, तिना रे मूलमर्द हारूणे चलाया था, यहोवे रे मन्दरो रे कामा खे जाया करो।
ओर लेवी
बचे रे लेविया बीचा ते अम्रामो रे कुलो बीचा ते शूबाएल, शूबाएलो रे कुलो बीचा ते येहदयाह। बाकी रहब्याह, ओर रहब्याह रे कुलो बीचा ते यिश्शिय्याह मुखिया था। यिसहारिया बीचा ते शलोमोत ओर शलोमोतो रे कुलो बीचा ते यहत। हेब्रोनो रे कुलो बीचा ते जेठा यरिय्याह, दूजा अमर्याह, तीजा यहजीएल ओर चौथा यकमाम था। उज्जीएलो रे कुलो बीचा ते मीका ओर मीका रे कुलो बीचा ते शामीर था। मीका रा पाई यिश्शिय्याह, यिश्शिय्याह रे कुलो बीचा ते जकर्याह था। मरारिए रे पाऊ महली ओर मूशी ओर याजिय्याह रा पाऊ बिनो था। मरारिए रे पाऊ याजिय्याह ते बिनो ओर शोहम, जक्कूर ओर इब्री थे। महलीए ते एलीआजार जेसरे कोई पाऊ नि था। कीशो रे कुलो ते यरहमेल। ओर मूशीए रे पाऊ महली, एदेर ओर यरीमोत थे। आपणे-आपणे पितरा रे कराने रे मुताबिक येई लेविया री ल्वाद थी। इने बी आपणे पाई हारूणो री ल्वादा जेड़ी दाऊद राजा ओर सादोक ओर अहीमेलेक ओर पुरोईत ओर लेविया रे पितरा रे मुख्य मर्दा सामणे पर्चिया पाईया, मतलब मुख्य मर्दा रा कराना तेसरे छोटे पाईया रे पितरा रे कराने रे बराबर ठईरेया।
Source notes (1)
- Footnote लूक. 1:5
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.