प्रकाशितवाक्य 12

जवाणस और अजगर

1इना गल्ला ते बाद स्वर्गो रे एक नऊखा नजारा दिशेया। मैं देखेया कि एक जवाणस सूरज टखे रे थी और चाँद तेसा रे पैरा निठे था और तेसा रे सिरो पाँदे बारा तारेया रा मुकट था। 2से जवाणस गर्भवती थी और चिंगणे लगी री थी, कऊँकि तेसा खे जमणे रिया पीड़ा लगी री थिया और से बच्चा जम्मणे रिया पीड़ा रे थी। 3तेबे स्वर्गो रे एक ओर नऊखा नजारा दिशेया और देखो, एक बड़ा लाल अजगर था, जेसरे सात सिर और दस सींग थे और तेसरे सातो सिरो पाँदे सात राजमुकट थे। 4तेसरी पूँछे सर्गो रे तारेया रा तीजा इस्सा खिंजी की तरतिया रे पायी ता। और से अजगर तेसा जवाणसा सामणे, जो बच्चे खे पैदा करने वाल़ी थी, खड़ा ऊईगा, ताकि जेबे से बच्चा पैदा करो, तो से तेसा रे बच्चे खे खाई जाओ। 5तेसा रे पाऊ ऊआ, जो लोए रा राजदण्ड लये रे, सबी जातिया पाँदे राज्य करने वाल़ा था। और तेसा रा बच्चा परमेशरो गे और तेसरे सिंहासनो गे चकी की पऊँछाई ता। 6और से जवाणस तेसा सुनसाण जगा खे नठी गी, जेती परमेशरो री तरफा ते तेसा खे जगा त्यार करी राखी थी, ताकि से तेती एक ह्जार दो सौ साठ दिना तक पाल़ी जाओ।

7तेबे स्वर्गो रे लड़ाई शुरू ऊईगी। मीकाईल और तेसरे स्वर्गदूत अजगरो साथे लड़ने खे निकल़े, अजगर और तिना रे दूत बी तेस साथे लड़े। 8पर से अजगर आरी गा और से और तेसरे दूत स्वर्गो ते निकयाल़ी ते। 9तेबे से बड़ा अजगर, मतलब सेई पुराणा साप, जेसखे शैतान बोलोए और सारे दुनिया खे भरमाणे वाल़ा ए, तरतिया रे रूड़ाईता और तेसरे दूत बी तेस साथे रूड़ाईते।

10तेबे मैं स्वर्गो ते ये बड़ा शब्द आऊँदे ऊए सुणेया,

“एबे म्हारे परमेशरो रा उद्धार, सामर्थ, राज्य

और तेसरे मसीह रा अक्क प्रगट ऊई रा।

कऊँकि म्हारे पाईया पाँदे दोष लगाणे वाल़ा,

जो दिन-रात म्हारे परमेशरो सामणे,

तिना पाँदे दोष लगाया करोआ, रुड़ाई ता रा।

11और सेयो मिन्टूए रे खूनो री बजअ ते

और आपणी गवाईया रे वचनो री बजअ ते, तेस पाँदे जयवंत ऊए।

कऊँकि तिने आपणे प्राण प्यारे नि जाणे,

एथो तक की मौत बी सयी ली।

12इजी बजअ ते, ओ स्वर्गो

और तिना रे रणे वाल़ेयो मगन रओ,

ओ तरती और समुद्र, तुसा खे धिक्कार ए,

कऊँकि शैतान बड़े ई रोषो रे

तुसा गे उतरी की आईगा रा,

कऊँकि से जाणोआ कि तेसरा

थोड़ा ई बखत बाकि ए।”

13जेबे अजगरे महसूस कित्तेया कि आऊँ तरतिया पाँदे रुड़ाई ता रा, तो से जवाणस, जेसा रे पाऊ जम्मेया था, तेसा खे सताणे लगेया। 14तेबे तेसा जवाणसा खे बड़े उकाबो जेड़े दो पंख दित्ते, ताकि सापो गे ते उडी की सुनसाण जगा रे पऊँछी जाओ, जेती से एक बखत और बखतो और आदे बखतो तक पाल़ी जाओ। 15तेबे अजगरे तेसा जवाणसा पीछे आपणे मुंओ ते नदिया जेड़ा पाणी लटेया, कि तेसा खे एसा नदिया ते हड़ाई देओ। 16पर तरतिये तेसा जवाणसा री मताद कित्ती और आपणा मूँ खोली की, से नदी, जो अजगरे आपणे मुंओ ते बाह्ई थी, पी ती। 17नतीजन, अजगरो खे जवाणसा पाँदे रोष आईगा तेबेई तेसा री बाकि ल्वादा ते, जो परमेशरो रे ऊक्मो खे मानोए और प्रभु यीशुए री गवाई देणे रे टीके रे थे, लड़ने खे गया 18और से अजगर समुद्रो रे कनारे पाँदे जायी की खड़ा ऊईगा।