1 थिस्सलुनीकियों 2

पौलुसो रा प्रचारो रा काम

1ओ प्यारे साथी विश्वासियो! तुसे आपू ई जाणोए कि म्हारा तुसा गे आऊणा फाईदेमंद ऊआ। 2जेड़ा तुसे आपू बी जाणोए कि आसे पईले-पईले फिलिप्पियो नगरो रे दु:ख सईन कित्तेया और बुरा बर्ताव सईन करने ते बाद बी म्हारे परमेशरे आसा खे एड़ी इम्मत दित्ती कि आसे परमेशरो रा सुसमाचार तुसा रे नगरो रे लोका री तरफा ते पारी (भारी) बिरोद ऊँदे ऊए बी तुसा खे सुणाऊँ। 3कऊँकि म्हारा उपदेश ना तोखे राए, ना गल़त इरादे ते ए और ना ई ठग-बाजिया साथे ए।

4पर परमेशरे आसे एते जोगे समजी की आसा गे सुसमाचार सम्बाल़ेया, आसे तेड़ा ई बताऊँए। इजी खे आसे मांणूआ खे नि, पर परमेशरो खे, जो म्हारे मनो खे परखोआ, खुश करने खे उपदेश देऊँए। 5तुसे जाणोए कि आसे ना तो कदी चापलूसिया रिया गल्ला करुँ थे और ना ई आसे तुसा ते कुछ पाणे रिया तंईं कुछ लाल़च कित्तेया। इना गल्ला रा परमेशर गवा ए कि आसे एड़े लोक नि थे। 6हालाँकि आसा खे मसीह रे प्रेरित ऊणे री बजअ ते, तुसा ते मताद पाणे रा अक्क था, तेबे बी आसे मांणूआ ते आदर नि चाऊँ थे, ना तुसा ते और ना ई केसी ओरी ते।

7पर जिंयाँ माए आपणे बाल-बच्चे खे पाल़ो-पोषोई, तिंयाँ ई आसे बी तुसा बीचे रई कि नरमाई दखाई 8और तिंयाँ ई आसे तुसा री लालसा करदे ऊए, बस परमेशरो रा ई सुसमाचार नि, पर आपणा-आपणा प्राण तुसा खे देणे खे बी त्यार थे, कऊँकि तुसे म्हारे बड़े पारी प्यारे ऊईगे थे।

9कऊँकि ओ प्यारे साथी विश्वासियो! तुसे म्हारी मईणत और कष्टो खे याद राखोए कि आसे इजी री खातर रात-दिन काम-तंदा करदे ऊए तुसा बीचे परमेशरो रा सुसमाचार प्रचार कित्तेया, ताकि तुसा केसी पाँदे बी बोज ना ओ। 10तुसे आपू ई गवा ए और परमेशर बी कि तुसा सारे विश्वासिया साथे आसा रा बर्ताव, केड़ा पवित्र, धार्मिक और निर्दोष रया। 11जेड़ा तुसे जाणोए कि जेड़ा पिता आपणे बाल़का साथे बर्ताओ करोआ, तिंयाँ ई आसे बी तुसा बीचा ते हर एकी खे उपदेश करदे, शान्ति देऊँ थे और समजयाऊँ थे 12कि तुसा रा चाल-चलण एड़ा ओ कि परमेशरो खे आदरो जोगा ओ, जो तुसा खे आपणे राज्य रे और महिमा रे बुलाओआ।

13इजी री खातर आसे बी परमेशरो रा धन्यवाद लगातार करदे रऊँए कि जेबे आसा रे जरिए परमेशरो रे सुसमाचारो रा वचन तुसे सुणेया, तो से मांणूए रा नि, पर परमेशरो रा वचन समजी की तुसे मानेया जो सच्ची ये सुसमाचार परमेशरो री तरफा तेआ। एस उपदेशो रे जरिए परमेशर तुसा रे काम करोआ जो मसीह यीशुए पाँदे विश्वास राखोए। 14तेबेई तुसे, ओ प्यारे साथी विश्वासियो! परमेशरो री तिना मण्डल़िया री जी चाल चलणे लगे, जो यहूदिया प्रदेशो रे मसीह यीशुए रे ए, कऊँकि तुसा खे बी आपणे लोका ते तेड़ा ई दु:ख मिलेया, जेड़ा तिना खे यहूदिया ते मिलेया था। 15इने यहूदिये प्रभु यीशु और भविष्यबक्ता बी काई ते और आसे बी सताए, परमेशर तिना ते खुश निए और सेयो सबी मांणूआ रा बिरोद करोए। 16और सेयो दुजिया जातिया खे प्रभुए रे उद्धारो रिया गल्ला करने ते, आसा खे रोको ए। ईंयां सेयो आपणे पापो रा कअड़ा (घड़ा) परदे रओ। एबे आखरकार तिना पाँदे परमेशरो रा डराऊणा प्रकोप आईगा रा।

मण्डल़िया ते मिलणे री इच्छा

17ओ प्यारे साथी विश्वासियो! जेबे आसे थोड़ी देरा खे मनो ते नि, बल्कि तुसा रे सामणे ते लग ऊईगे थे, तो आसे बड़ी इच्छा साथे तुसा खे देखणे रिया तंईं ओर बी जादा कोशिश कित्ती। 18इजी री खातर आसे, खास कर मैं पौलुसे एक बार नि, बल्कि कई बार तुसा गे आऊणा चाया, पर शैताने आसे तुसा गे फेर आऊणे नि दित्ते। 19म्हारी उम्मीद, खुशी और तारीफो रा मुकुट कुण ए? क्या म्हारे प्रभु यीशु मसीह रे सामणे, तेसरे वापस आऊणे रे बखते, तुसेई नि ऊणे? 20म्हारी तारीफ और खुशी सच्ची तुसे ईए।