Kulvi Outer Seraji Bible
सपन्याह 3
एरुशलेम नगरीओ पाप
एरुशलेम नगरी लै आसा घोर आफ़त!
ज़ुंण भ्रष्ट, द्रोही अर आपणीं परज़ा प्रैंदै ज़ुल्म करा।
अह निं कोहिए शुणदी, नैरी करै बी निं एथ सधेर आथी,
अह निं बिधाता दी बी भरोस्सअ करदी नां
आपणैं परमेशरे भबनै डेऊई तेऊए च़ाकरी करदी।
ऐहा नगरीए कार-करिंदै क्रुंगा सिहा ज़िहै,
एते पांच़ आसा सान्हां शकारी निखल़ै दै रुहलै ज़िहै
ज़ुंण राच भैणै का आजी पठ छ़ेक्का खाई।
ऐहा नगरीए गूर आसा ठगणै आल़ै, तिन्नों भरोस्सअ निं करी सकदै।
प्रोहते लाई पबित्र ज़ैगा, बिधाते बधाना दी छ़ोत ज़ेता तिंयां होरी का खोज़ा,
आप्पू तिंयां तेते साबै ज़िन्दगी ज़िऊंदै ई आथी!
पर बिधाता आसा नगरी दी परज़ा जैंदरी,
सह आसा धर्मीं पांच़ अर तेऊ करनअ भलअ ई, सह निं कधि बूरअ करदअ।
सह करा हर धैल़ै मणछो नसाफ, पर कदुष्ट मणछ ज़ुंण पाप करदै रहा, तिन्नां निं शरम एछदी!
बिधाता बोला इहअ, “मंऐं किऐ सोभ देश खतम,
तिन्नें नगरीओ किअ मंऐं बनाश अर तिन्नें गहल़-कोट डाहै मंऐं उज़र करी।
तिन्नें नगरी डाही मंऐं पठ शुन्नीं करी, तेथ निं कोह ज़िऊंदअ बच़अ।
मंऐं सोठअ इहअ, ‘ऐबै हेरनअ एरुशलेम नगरीए मेरी परज़ा मेरअ अदर करी!
तिन्नां हेरनी मेरी चतैनगी ज़िहअ हुंह बोला तेही मनी।’
तै निं तिन्नें घअर उज़र हणैं अर मुंह निं तिन्नां लै सज़ा दैणें ज़रुरत पल़णीं।
पर तिंयां रहै तज़ी बी कदुष्ट कामां करदै लागी।”
तैही बोला बिधाता इहअ, “तूह रह तैहा धैल़ी न्हैल़अ लागी,
ज़ेभै मुंह ज़ोरा ज़ोरी मणछा का सोभ च़िज़ा दूर करनीं।
मंऐं आसा सोठी हेरअ द कि मुंह करनै सोभ देश अर सोभ राज़ कठा,
संघा दैणअ मुंह पूरअ ज़ोर लाई आपणअ सारअ कोप तिन्नां प्रैंदै तरैल़ी।
सारी पृथूई हणीं मेरै रोश्शे आगी करै दझ़ी खतम।
तेखअ करनी मुंह मणछे बोली-भाषा च़ोखी,
तेखअ हणैं तिंयां मुंह बिधाता सेटा पूज़ा अर अरज़ करनै जोगी।
मेरी छिंगी डाही दी परज़ा ज़ुंण कूश देशे दरैऊआ पार दूर आसा बस्सै दै,
तिंयां एछणैं मुंह सेटा लै अरज़ करदै संघा आणनीं तिन्नां मुंह सेटा भैंट।
तैहा धैल़ी निं तम्हां एरुशलेम नगरीए मेरी परज़ा
तेता लै शर्मिंदै पल़णअ हणअ ज़ुंण तम्हैं मुल्है द्रोह किअ।
मुंह करनै सोभ घमंडी अर शरेरै खतम, तेखअ निं तम्हां
मेरी पबित्र धारा मुल्है कधि द्रोह करनअ।
एरुशलेम, मुंह डाहणैं ताह दी तिंयां मानदार अर भोल़ै मणछ बच़ाऊई,
तिंयां रहणैं मेरै आसरै कि बिधाता सका तिन्नें फाज़त करी।
इज़राईला मांझ़ै ज़ुंण ज़िऊंदै हणैं बच़ै दै, तिन्नां निं झ़ुठअ बोल़णअ नां धोखअ करनअ।
तिंयां रहणैं राज्ज़ी-मौज़ी खांदै-पिंदै अर निहंचै सुत्ती।
तिन्नां डरैऊंणै आल़अ निं कोह हणअ।”
सियोन नगरीए लोगो, ज़ोरै-ज़ोरै बोला खुशीए गिहा!
इज़राईलीओ, ज़ोरै-ज़ोरै करा ज़ै-ज़ैकार!
एरुशलेम नगरीए लोगो, दिला का मनाऊंआं खुशी!
बिधाता किई थारी सज़ा माफ अर तेऊ किऐ थारै दुशमण खतम।
तम्हां इज़राईलीओ राज़अ बिधाता आसा तम्हां संघै।
खरीए धैल़ै छ़ेक्कै तम्हैं काटी, ऐबै निं डरने ज़रुरत ई आथी।
सह बगत गअ पुजी ज़ेभै एरुशलेम नगरी लै इहअ समाद एछणअ,
“ऐबै निं डरी आथी! ऐबै निं ज़ोर-ज़ाहण चुटणैं दैई!
थारअ परमेशर बिधाता आसा तम्हां संघै।
सह आसा बलबान अर तेऊ हेरनै तम्हैं बच़ाऊई।
तेऊ हणीं तम्हां करै खास्सी खुशी! सह झ़ूरा च़ुपच़ाप तम्हां लै।
तेऊ बोल़णीं गिह किल्हैकि सह आसा तम्हां करै खास्सअ खुश।”
बिधाता बोला इहअ, “ज़ुंण तम्हां मांझ़ै एता लै खास्सै दुखी रहा कि
तिन्नां निं मेरै तिह थैर मनाऊंणै भेटै, तम्हैं करनै मुंह कठा,
तेखअ निं तम्हैं कधि शर्मिंदै हणैं।
भाल़ा! तेभै दैणीं मुंह तिन्नां सोभी लै सज़ा ज़ुंणीं तम्हां लै दुख दैनै।
मुंह बच़ाऊंणै तिंयां ज़ुंण लाट्टै आसा,
मुंह आणनैं तिंयां बापस झाल़ी ज़ुंण दुशमणै दूर आसा निऐं दै।
मुंह करनअ इहअ कि सोभी देशे लोग थारै बारै ज़ाणें
थारी शान-शोभा अर मशूरी पजैल़णीं सारै संसारै।
तैहा धैल़ी झाल़णैं मुंह तम्हैं कठा संघा आणनैं घअरा लै बापस।
तम्हैं करनै मुंह सारै संसारै मशूर संघा करनै मुंह तम्हैं भिई भरै-पूरै।”
ईंयां गल्ला डाही बिधाता बोली।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.