Kulvi Outer Seraji Bible
भज़न 92
बिधाते स्तोती
बशैघे धैल़ी लै भज़न
हे बिधाता, ए परम प्रधान परमेशर, तेरअ शूकर करनअ अर
तेरी ज़ै-ज़ैकार करना लै भज़न बोल़णअ भाल़ किहअ भलअ आसा!
दोत्ती लागा तेरी अटल़ झ़ूरीए बारै खोज़णेंओ च़ाअ अर
राची इहअ कि तूह भाल़ किहअ भरोस्सैमंद आसा।
मुंह करनी तेरी दस तारा आल़ै साज़ अर
बींन बाज़ी करै ज़ै-ज़ैकार।
हे बिधाता, तंऐं किअ हुंह आपणैं महान कामां करै खुश,
तेरै इना महान कामां लै करा हुंह तेरी ज़ै-ज़ैकार।
तेरी आसा गल्ल ई बडी अर
तेरी सोठ आसा बेघै डाढी।1
ऐहा गल्ला निं कमुर्ख मणछ समझ़ी सकदअ,
अर ऐडअ मणछ निं एतो खैल डाहंदअ।
कदुष्ट खिला फूला घाह ज़िहै,
कबध खटणै आल़ेए हआ मौज़,
पर तिंयां हआ बादा का पठी बरैबाद।
पर हे बिधाता, तेरअ राज़ रहणअ हाम्हां प्रैंदै सारी-सदा।
ताह पाणै आपणैं दुशमण मारी, अर
कदुष्ट मणछ खद्रेल़णैं ओर्ही-पोर्ही।
पर मुल्है दैनअ तंऐं बणें म्हैशै ज़िहअ बल,
तंऐं छ़ांटअ हुंह आप्पू लै।
मंऐं भाल़अ आपणीं आछी कि मेरै दुशमण हारै, अर
मंऐं शूणअ आपणैं कानै कि कदुष्ट मणछा का केही लैल़ा-पकारा छ़ुटी।
धर्मीं मणछ फुलणैं-फल़णैं खज़ूरे लाम्मै बूटा ज़िहै,
तिंयां बझ़णै लाबानोन धारा लागी दी केल़ुई ज़िहै।
तिंयां आसा तेरै भबनै रोहै दै बूटा ज़िहै,
ज़ुंण तेरै खोल़ै फल़ा-फूला।
खास्सी प्रोढी अमरा बी रहा तिंयां बूट फल़ा दैंदै लागी अर
तिंयां रहणैं सदा हरै-भरै।
तिन्नां बोल़णअ तेरै बारै इहअ,
“बिधाता करा नसाफ! सह आसा मेरी शरण लणें टोल्ह,
तेऊ दी निं किछ़ै खोट आथी।”
Source notes (1)
- Cross-reference प्रका. 15:3; रोम. 11:33-34
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.