Kulvi Outer Seraji Bible
भज़न 87
सीनाई धारे शोभा
कोराह खिंबा आल़ैओ भज़न
बिधाता च़िणीं आपणीं नगरी पबित्र धारा प्रैंदै,
सह झ़ूरा तैहा नगरी1 लै
ज़िधी याकबे आद-लुआद आसा बस्सै दै।
तूह ज़ुंण परमेशरे नगरी2 आसा, शुण,
तेरी शोभे बारै बोला एही बित्ती-बित्ती गल्ला।
मिसर, बाबेल, पलिश्ती, सूर अर कूश3
आसा इहै देश ज़ेतो तम्हां का थोघ आसा,
इना देशे लोग बोला इहअ,
“हाम्हैं आसा एरुशलेम नगरी हुऐ ज़ल्मैं दै।”
परम प्रधान परमेशरा दैणीं सियोन नगरी लै एही बर्गत कि
तेखअ बोल़णअ सोभी लोगा इहअ,
“हाम्हैं बी आसा इधी हुऐ ज़ल्मैं दै।”
बिधाता डाहणैं आपणैं लोगे नाअं बही दी लिखी,
अर तिन्नें ज़ल्म भूमी बी तिधी।
तिंयां बी लागणै सोभै नाच़दै-गांदै अर इहअ बोल्दै,
“म्हारी ज़िन्दगीओ मूल़ बी आसा एरुशलेम नगरी।”
Source notes (3)
- Footnote तैहा नगरी एरुशलेम
- Footnote परमेशरे नगरी एरुशलेम नगरी लै बोला तै परमेशरे नगरी
- Footnote कूश इथोपिया
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.