Kulvi Outer Seraji Bible
भज़न 85
सारै देशा लै बिधाता का अरज़
गाज़ै-बाज़ै आल़ेए सैणैं लै: कोराह खिंबा आल़ैओ भज़न
हे बिधाता, तंऐं दैनी आपणीं ज़ैगा लै बर्गत,
तंऐं किऐ याकबे आद-लुआद भिई भरै-पूरै।
तंऐं किऐ आपणीं परज़े पाप माफ अर
तिन्नें गलती बी निं तंऐं आद डाही।
ऐबै हुअ तिन्नां लै तेरअ रोश्श खतम अर
ऐबै गअ तेरअ कोप तिन्नां का दूर हई।
ए म्हारै परमेशर बिधाता, हाम्हां बच़ाऊंणै आल़अ आसा तूह ई,
ज़ीबाण, ऐबै निं हाम्हां लै रोश्शै आणी, हाम्हां दै ऐबै म्हारै घअरै पजैल़ी।
ताह कै हाम्हां का कबल्लै रहणअ रुश्शी?
तेरअ रोश्श कै पोस्ती-दर पोस्ती हाम्हां लै इहअ ई च़ाल्लअ रहई?
तंऐं कै हाम्हां लै नऊंईं ज़िन्दगी दैई निं लाई कि
हाम्हैं तैहा खुशी तेरी ज़ै-ज़ैकार करे?
ज़िहअ तूह आसा ऐबै झ़ूर हाम्हां लै तूह तिहअ ई
संघा बच़ाऊ हाम्हां।
हुंह आसा शूणअ लागअ द कि तूह परमेशर बिधाता किज़ै बोला,
तंऐं आसा हाम्हां आपणीं परज़ा लै ज़बान दैनी दी कि
ज़ै हाम्हैं आपणैं ऐडी बाता का पिछ़ू हटे, तै करनअ ताह म्हारअ मेल़-ज़ोल़।
ऐबै जाणैं तिंयां बच़ी ज़ुंण तेरी डरा हेठै रहा,
तूह बस्सणअ ऐबै आपणीं सारी शोभा संघी हाम्हां संघै।
ऐबै हणैं तेरी झ़ूरी अर सत्त कठा अर
भलाई अर मेल़-ज़ोल़ रहणैं एकी-दुजै का मल़्हैछुई।
धरती दी जाणअ ऐबै सत्त बझ़ी अर
तेरअ धर्मीं नसाफ होथणअ स्वर्गा का उंधै।
हे बिधाता, ताह हेरनी ऐबै हाम्हां लै बर्गत दैई अर
म्हारी ज़ैगा-ज़िम्मीं दी हणीं ऐबै खास्सी फसल।
बिधाता आजू हांढणअ ऐबै धर्म,
ताकि सह तेऊए गंईं बशैल़णा लै बात सरली करे।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.