Kulvi Outer Seraji Bible
भज़न 82
नसाफ करना लै अरज़
असापो भज़न
परमेशर आसा स्वर्गै पबित्र सभा दी नसाफ करदअ बेठअ द,
तैहा सभा दी आसा होर देअ-देबी1 बेठै दै अर तिधी बोला परमेशर तिन्नां लै इहअ:
“तम्हैं गलत नसाफ करनअ लाअ छ़ाडी कि नांईं?
तम्हां केभै तैणीं रहणअ कदुष्ट मणछे तरफदारी करदै लागी?
रैनै-गरीब अर छ़ुटै-मुक्कै दै लान्हैंओ नसाफ किल्है निं तम्हैं करदै?
ज़हा ज़रुरत आसा अर ज़हा आसरअ लोल़ी, तम्हैं किल्है निं तिन्नें मज़त करदै?
तिन्नां किल्है निं तम्हैं कदुष्ट मणछे हाथा का बच़ाऊंदै?
तम्हां निं परबाह ई आथी! तम्हैं किहै कमुर्ख आसा!
तम्हैं सोभै आसा पठी भ्रष्ट हुऐ दै,
सारै संसारै निं नसाफ रहअ ई आथी! 2
हुंह बोला इहअ, ‘तम्हैं आसा दईब अर
तम्हैं आसा मुंह परम प्रधान परमेशरे पूत,
तज़ी बी मरनै तम्हैं मणछा ज़िहै,
थारी ज़िन्दगी बी हणीं तिन्नें तिन्नां ई मांझ़ै कहा राज़ै ज़ेही खतम।’”
हे परमेशर, एछ, तूह कर संसारै आप्पै राज़,
संसारे सोभी देशे लोग आसा तेरै ई।
Source notes (2)
- Footnote देअ-देबी ज़ेता लै लोग इहअ ज़ाणा कि तिंयां आसा दईब
- Cross-reference जोह. 10:34
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.