भज़न 69

खरीए पलका बिधाता का मज़त

गाज़ै-बाज़ै आल़ेए सैणैं लै राज़ै दाबेदे शोशन्‍नीम रागा दी गिह

1हे बिधाता, मुंह बच़ाऊ डुबणै का,

पाणीं गअ गल़ै तैणीं पुजी,

2घणैं च़िक्‍करै जैंदरी लागअ हुंह उंधै ई डुबदअ,

धरनीं निस्सअ पाक्‍कअ थह ई भेटी!

हुंह पुजअ ऐबै डुघै पाणीं जैंदरी,

छ़ाल्‍ली आणअ हुंह तेतरी डबेऊई।

3हुंह थक्‍कअ हाक्‍का लाई,

अर ऐबै शुक्‍कअ मेरअ गअल़ बी।

ताह न्हैल़ी-न्हैल़ी फिरी मेरी आछी बी पाल्‍ली

कि तूह बिधाता जाणअ मेरी मज़त करदअ एछी।

4ज़ुंण मुंह संघै थोघै बाझ़ी ज़ीद डाहा,

तिंयां आसा गणी करै मेरै मुंडे शराल़ा का बी खास्सै।

मेरै तिंयां दुशमण बोला मेरै बारै झ़ुठअ,

तिंयां आसा खास्सै ज़ोरा आल़ै अर तिंयां च़ाहा मुंह मारी पाणअ।

तिंयां बोला मुल्है एही च़ीज़ बापस फरेऊई दैणा लै ज़ुंण मंऐं कधू च़ोरी ई निं आथी!

5हे बिधाता, ताखा आसा थोघ कि हुंह किहअ ऐडअ आसा,

ताखा किज़ू गल्‍ले च़ोरी लाई करी, ताखा आसा मेरै पाप-दोशो बी थोघ।

6स्वर्गे सारी सैने मालक बिधाता,

तूह करा इज़राईला दी राज़,

ज़ुंण ताह दी भरोस्सअ डाहा अर तेरी च़ाकरी करा,

तिन्‍नां जैंदरी निं मुंह शर्मिंदै दैई हणैं।

7ताह ई पिछ़ू हुअ हुंह बेइज़त अर

तैही पल़अ मुंह शर्मिंदै हणअ।

8मेरै आपणैं भाई-बंध बी करा इहअ दखाअ कि तिंयां निं मुंह बछ़ैणदै ई आथी,

तिंयां करा मुंह संघै परदेसी ज़िहअ बभार।

9तेरै पबित्र भबना लै झ़ूरा हुंह इहअ कि मेरै दिलै हआ आग लागी दी,

हे परमेशर, ज़ेभै होर ताह बेइज़त करा, तेभै हआ हुंह बी शर्मिंदअ।

10हुंह रहअ कई बारी लेरदअ लागी अर ब्रतू,

लोगै किअ हुंह तज़ी बी बेइज़त।

11मंऐं किअ खिंथल़ै बान्हीं शोग अर

लोग लागै मुल्है हास्सदै अर सुहांगा करदै।

12नगरीए प्रऊल़ी सेटा पाई तिन्‍नैं मेरै बारै सारै दी फुआह अर

शूरी-शराबी तोही गांठी मेरै सुहांगा करना लै गिह।

13पर बिधाता, हुंह करा ताह सेटा अरज़,

ज़िहअ ताह ठीक लागा तेभै दैऐ तूह एतो ज़बाब।

ताह हुअ ज़बाब दैणअ किल्हैकि तूह झ़ूरा खास्सअ,

अर तंऐं आसा ज़बान दैनी दी कि ताह हेरनअ हुंह बच़ाऊई।

14मुंह घणैं च़िक्‍करे गारी जैंदरी डुबणै निं दैई,

तूह डाह मुंह मेरै दुशमणा का बच़ाऊई,

डुघै पाणीं जैंदरी डुबणै का करै मेरी फाज़त।

15दरैऊए हर्हलै निं लोल़ी हुंह उंधै घर्होहल़अ,

नां हुंह डुघै पाणीं दी लोल़ी डुबअ अर

नां हुंह किधी दाभूअ लोल़ी कि मेरी मौत होए।

16हे बिधाता, तूह दै मुल्है ज़बाब, तूह आसा भलअ अर तूह करा झींण।

मुंह बाख दै धैन! तूह आसा खास्सअ झणैल़ू।

17तूह निं मुंह बाखा पिठ फरेऊई, हुंह तेरअ दास आसा आफ़ता दी पल़अ द।

ऐबै निं न्हैल़अ लागै, मेरी मज़त लअ करी।

18ऐबै लअ मुंह सेटा एछी मुंह बच़ाऊई

मुंह लोल़ी मेरै दुशमणा का छ़ुटकारअ भेटअ।

19ताखा आसा थोघ कि हुंह किहअ बेइज़त हुअ,

मेरै किहै-किहै सुहांग किऐ,

तिन्‍नां शर्मिंदै करनै आल़ै मेरै दुशमणो बी आसा ताखा थोघ।

20बेइज़ती आणअ हुंह इहअ हारी-मारी कि हुंह हुअ बेगरअ।

मेरी ती एही आशा कि कुंण एक ता झ़ूरदअ मुल्है

पर तेथ निं एक बी भेटअ अर

नां कुंण भलअ चिंजणै आल़अ निखल़अ।

21भुखे पलका पाअ मेरै दुशमणै मेरी रोटी दी बिश अर

ज़ेभै हुंह नचिशअ थिअ, तेभै दैनअ तिन्‍नैं मिल्‍लअ रस।

22तिन्‍नें रोटी लोल़ी ती तिन्‍नां ई लै फाही हुई,

तिन्‍नें धामा करै लोल़ी तै तिंयां सोभै बरैबाद हुऐ।

23तिंयां लोल़ी ए आछिए कांणै हुऐ!

अर तिंयां लोल़ी तै मुंह सदा कुंगल़ै रहै फिरी।

24आपणअ सारअ रोश्श काढ तूह तिन्‍नां प्रैंदै,

तेरै रोश्शा करै लोल़ी तिंयां दझ़ै।

25तिन्‍नें डेरै लोल़ी बरैबाद हुऐ अर

तिन्‍नें खिम्भा दी निं लोल़ी कोह ज़िऊंदअ रहअ।

26किल्हैकि तिंयां हआ तेऊ मणछा छेऊंदै लागै दै ज़हा लै तंऐं सज़ा दैई हआ हेरी दी,

ज़ुंण तेरी दाह ज़िरदै हआ, तिन्‍नां लै दैआ तिंयां होर बी दुख।

27तिन्‍नें पापो साब-कताब लऐ तूह डाही,

तिन्‍नां निं सज़ा दैणैं बाझ़ी छ़ाडी।

28तिन्‍नें नाअं काटै ज़िन्दगीए कताबा का पोर्ही,

तिन्‍नां निं धर्मीं मणछा संघै गणी आथी।

29पर हुंह आसा दाह-दुखा दी भर्हुअ द,

हे बिधाता, तूह बच़ाऊ मुंह संघा दै मुल्है छ़ुटकारअ।

30मुंह करनी गिह गांठी ज़ै-ज़ैकार,

अर तेरअ शूकर करी करनी मुंह तेरी बड़ैई।

31एता करै हणअ तूह बिधाता

बल्दे बल़ीदाना का बी खास्सअ खुश।

32एता भाल़ी हणैं रैनै-गरीब बी खुश,

ज़ुंण परमेशरे लोल़-तोप करा तिन्‍नां बी एछणी हिम्मत।

33बिधाता शूणां रैनै-गरीबे लेर-पकार,

आपणीं परज़ा निं सह कैद खानै बिस्सरी डाहंदअ।

34स्वर्ग, पृथूई, समुंदर अर

तेते सोभी ज़ीबा करनी परमेशरे ज़ै-ज़ैकार।

35तेऊ बच़ाऊंणअ एरुशलेम,

तेऊ बसाऊंणी यहूदा नगरी भिई।

तेऊए परज़ा हणीं भिई तैहा ज़ैगा बस्सी मालक।

36ज़ुंण बिधातो हुकम मना, तिन्‍नें आद-लुआद हणीं तैहा ज़ैगे बारस अर

ज़ुंण बिधाता लै झ़ूरा तिंयां बस्सणै तैहा ज़ैगा।