भज़न 25

बिधाता का अरज़

राज़ै दाबेदो भज़न

1हे बिधाता, मंऐं दैनी आपणीं ज़िन्दगी ताल्है,

2हे परमेशर, मुंह आसा तेरअ ई भरोस्सअ।

तूह बच़ाऊ मुंह हारने बेइज़ती हणैं का,

मेरै दुशमणा निं मेरी हारने खुशी दी नाच़-खेल्ह करनै दैई।

3ज़ुंण ताह दी भरोस्सअ करा, तिंयां निं कधि हारी सकदै,

पर ज़ुंण छ़ेक्‍कै धोखअ दैआ, तिंयां हणैं शर्मिंदै।

4हे बिधाता, तूह रहैऊ मुखा आपणीं बात,

मुंह सखाऊ तेथ हांढणअ।

5मुखा शखैल़ आपणैं सत्ता दी ज़िन्दगी ज़िऊंणीं,

मेरअ परमेशर आसा तूह ज़ुंण मुंह बच़ाऊआ।

हुंह रहा सदा तेरै ई भरोस्सै।

6हे बिधाता, ज़ीबाण, ऐहा गल्‍ला कर आद कि

तूह आअ जुगा-जुगा ओर्ही सबर अर झींण करदी।

7हे बिधाता, मेरै खारकी अमरा किऐ दै पाप अर गलती कर माफ।

तूह कर ऐहा गल्‍ला प्रगट कि तूह झ़ूरा सदा अर

झींण करी डाह मुंह आद।

8किल्हैकि तूह बिधाता आसा धर्मीं अर झणैल़ू,

तूह खोज़ा पापी मणछा का कि किहअ लागा तेरी बाता हांढणअ।

9भोल़ै मणछा का सखाऊआ तूह भलअ करनअ अर

इहअ कि तूह किज़ै च़ाहा।

10ज़ुंण ताह बिधाते करार अर बधान मना,

तिन्‍नां लै हआ सदा तेरी झींण अर सत्त।

11हे बिधाता, तूह कर आपणीं ज़बान आद,

संघा कर मेरै पाप माफ, ज़ुंण बेघै खास्सै आसा।

12ज़ुंण ताह बिधाते डरा हेठै रहा,

ताह रहैऊंणीं तिन्‍नां का सह भली बात ज़ेथ तूह च़ाहा कि तिंयां हांढे।

13तिंयां हणैं सेठ अर

तिन्‍नें आद-लुआद हणैं ज़िम्मींए मालक।

14तूह बिधाता हआ तिन्‍नां मणछो साथी ज़ुंण तेरी डरा हेठै रहा,

आपणीं करार बी करा तूह तिन्‍नां ई संघै पाक्‍की।

15हे बिधाता, मेरी आछी हआ कबल्‍ली ताह बाखा लागी दी,

किल्हैकि मुंह बच़ाऊआ तूह ई आफ़त पाणै आल़ै ज़ज़ाल़ा का।

16हे बिधाता, मुंह बाखा फिर, मुल्है कर झींण,

किल्हैकि हुंह आसा कल्ही अर मुल्है आसा आफ़त पल़ी दी।

17मुंह लागअ खास्सअ हैल़अ फिरदअ,

तूह बच़ाऊ मुंह इना सांगटा का।

18मेरै दुख-सांगटा बाखा दै भाल़णीं अर

मेरै पाप कर माफ।

19मेरै दुशमण भाल़ किहै खास्सै हुऐ अर

तिंयां भाल़ मुंह संघै केही ज़ीद डाहा।

20हे बिधाता, मेरी फाज़त कर तूह, तिन्‍नां का बच़ाऊ मेरी ज़िन्दगी।

मुंह निं शर्मिंदै दैई हणैं किल्हैकि

मंऐं आसा ताह सेटा शरण लई दी।

21हे बिधाता, हुंह करा दिला का ज़िहअ तूह बोला तिहअ ई,

मेरअ भरोस्सअ आसा ताह दी किल्हैकि मुखा आसा थोघ कि ताह हेरनअ हुंह बच़ाऊई।

22हे बिधाता, तेरै आपणैं इज़राईली मणछा डाह तूह

सोभी आफ़ता का बच़ाऊई!