Kulvi Outer Seraji Bible
भज़न 19:14
Verse 14 is marked below, with the whole chapter around it. Read from the start
सारअ संसार खोज़ा इहअ कि बिधाता केतरअ महान आसा
गाज़ै-बाज़ै आल़ेए सैणैं लै राज़ै दाबेदो भज़न
सरग करा ऐहा गल्ला प्रगट कि परमेशर किहअ महान आसा,
एता भाल़ी जाआ थोघ लागी कि परमेशरै केही-केही कारीगीरी आसा किई दी!
एक धैल़ी खोज़ा दुजी धैल़ी का परमेशरे बारै गल्ला अर
राच करा दुजी राची का परमेशरो ज्ञैन प्रगट।
नां तिन्नें बोली-भाषा आथी अर
नां तिन्नें गल्ला शुण्हदी।
तज़ी बी पुजा सारी पृथूई दी तिन्नों समाद अर
तिन्नें गल्ला शुण्हिंआं सारै संसारै।
बिधाता आसा सुरज़ा लै खिम्भ बणाअं द,
सह निखल़ा दोत्ती तेता का लाल़ै ज़िहअ तैर्हुई अर
सह हआ शूरबीरा ज़िहअ ठुहर दैणा लै तैर।
सह शुझिआ सरगै एकी पुंझ़ा का
दुजै पुंझ़ै तैणीं हांढदअ अर
तेऊए तात्तै धुप्पै का निं कोहै लुक्की सकदअ।
बिधातो बधान
बिधातो बधान आसा शुचअ-पाक्कअ,
सह दैआ नऊंईं ज़िन्दगी।
तेऊए हुकम आसा शुचै-पाक्कै अर
तेता करै एछा आम मणछा अक्ल।
बिधातो बधान आसा भलअ,
ज़ुंण तेता मना तिंयां रहा खुश।
बिधाते हुकम आसा प्रैश्शै ज़िहै अर
तिंयां दैआ ज़िऊंणें बुध।
बिधाते डरा हेठै रहणअ आसा भलअ,
ज़ुंण सदा लै रहा।
बिधातो बधान आसा शुचअ अर
तेते हर गल्ला दी आसा नसाफ।
तिंयां आसा च़ोखै सुन्नैं का खास्सै लोभणैं आल़ै अर
काशणीं का निटरनै आल़ै मखीरा का खास्सै मिठै।1
मुंह तेरै दासा भेटा तेता करै ज्ञैन,
ज़ुंण बिधातो बधान मना, तेऊ भेटा तेतो पुआज़अ।
आप्पू दी खोट निं कोही का शुझदी!
हे बिधाता, तूह कर मेरै गुप्त पाप दूर!
मुंह बच़ाऊ इहै पाप करनै का ज़ेता मेरअ दिल बोला करना लै,
हुंह निं तेते बशै लोल़ी पल़अ।
तै हणअ हुंह नर्दोश अर
तैही रहणअ पाप करनै का बच़ी।
हे बिधाता, मेरी गल्ला अर मेरै बच़ारा करै लोल़ी त तूह खुश हुअ,
हे बिधाता, तूह ई आसा मेरी शरण लणें ज़ैगा अर मुंह बच़ाऊंणै आल़अ।
Source notes (1)
- Cross-reference भज. 119:72,103
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.