Kulvi Outer Seraji Bible
भज़न 16
विश्वास अर आशा
राज़ै दाबेदो खास भज़न
हे परमेशर, मेरी फाज़त कर तूह ई
मंऐं आसा ताह सेटा शरण लई दी।
हे बिधाता, हुंह बोला ताखा इहअ, “मेरअ मालक आसा तूह ई!
ताह सुआई निं मुल्है होर किछ़ै भलअ आथी।”
धरती दी आसा तेरै धर्मीं मणछ ई महान असली मनणै जोगी!
मुंह रहणअ तिन्नां ई संघै राज्ज़ी-मौज़ी।
ज़ुंण बगैनै देअ-देबी पूज़ा,
तिन्नां लै पल़णीं आफ़ता प्रैंदै आफ़त।
हुंह निं तिन्नां देअआ लै बल़ीदान अर लोहूओ अर्घअ दैंदअ
अर नां तिन्नां सेटा माथअ टेक्कदअ।
हे बिधाता, मेरी ज़ैदात आसा तूह
अर तूह दैआ मुल्है ज़ेही मुंह गरज़ पल़ी तेही,
आजू बी आसा मेरी ज़िन्दगी तेरै ई हाथै।
ज़ुंण ज़ैगा तंऐं मुल्है बांडी दैनी, तिधी आसा मेरी मौज़
अर आजू बी हणअ मेरै मज़अ ई।
हे बिधाता, मुंह करनी तेरी ज़ै-ज़ैकार
किल्हैकि मुल्है भली सलाह दैआ तूह ई,
राची बी रहा हुंह सोठदअ लागी कि मुंह किहअ लागा करनअ।
मुंह रहा इहअ धैस्स लागी कि तूह बिधाता आसा हर बगत मुंह संघै,
मुंह निं कोहै डरैऊई सकदअ किल्हैकि तूह आसा मुंह सेटा आप्पै।
तैही रहा मेरअ मन्न खुश अर हुंह करा तेरअ शूकर,
हुंह आसा निहंचै कि ताह करनी मेरी ज़िन्दगीए फाज़त।
तंऐं निं हुंह जम्परी डाही,
मंऐं आसा तेरी च़ाकरी तत्त-दिला का किई दी,
ताह निं हुंह डुघी घोरी चिजणैं दैणअ।
तंऐं रहैऊई मुखा सह बात ज़ुंण ज़िन्दगी बाखा डेओआ,
ताह नेल़ रहणैंओ धैस्स करा मुंह खुश अर
ताह संघै रही एछा मुंह सदा लै नंद। 1
Source notes (1)
- Cross-reference शधा. 2:25-28
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.