Kulvi Outer Seraji Bible
भज़न 148
सोभै करा बिधाते ज़ै-ज़ैकार
बिधाते ज़ै-ज़ैकार।
स्वर्गै करा बिधाते ज़ै-ज़ैकार,
सोभै करा बिधाते ज़ै-ज़ैकार ज़ुंण उझै उछ़टै दी रहा।
बिधाते सोभै स्वर्गे दूत करा तेऊए ज़ै-ज़ैकार,
स्वर्गे सारी सैना करा तेऊए ज़ै-ज़ैकार।
सुरज़ अर ज़ोथ करा तेऊए ज़ै-ज़ैकार,
सरगै च़मकदै तारै बी करा तेऊए ज़ै-ज़ैकार।
सारअ भ्रमंड अर तेते सरगा प्रैंदै पाणीं करा
दुहै गल्ला बिधाते ज़ै-ज़ैकार।
भ्रमंडे सोभै गल्ला करा बिधाते ज़ै-ज़ैकार,
किल्हैकि तिंयां आसा तेऊए हुकमा करै बणी दी।
तेऊ किअ तिन्नां लै हुकम अर तिंयां सोभै गल्ला आसा डाही दी सदा तिन्नें ज़ैगा टकैल़ी,
तिन्नां लै आसा इहअ बधान दैनअ द, तेता का निं तिंयां ओर्ही-पोर्ही सिक्कदी।
पृथूईए सोभै गल्ला करा बिधाते ज़ै-ज़ैकार,
समुंदरे बडै-बडै ज़ीब अर समुंदरे थाल्लै रहणैं आल़ै होर ज़ीब,
सरगै बीज, शरू, हिंअं, बादल़ अर धूँईं,
पऊंण ज़ुंण बिधातो हुकम मना!
बडै-बडै पर्बत, धारा-धारठी,
फल़ा दैणैं आल़ै बूट, बडी-बडी केल़ुई!
घअरे डागै-धअण अर बणें ज़ीब,
लरुगी करै हांढणै-फिरनैं आल़ै ज़ीब अर च़ेल्लू-पखीरू!
पृथूई दै ज़ैगै-ज़ैगै राज़ै अर तिन्नें सोभै परज़ा करा बिधाते ज़ै-ज़ैकार,
सोभै सैणैं अर नसाफ करनै आल़ै पांच़!
खारकै मर्ध अर बेटल़ी,
लान्हैं अर प्रोढै बी!
सोभी लोल़ी बिधाते ज़ै-ज़ैकार किई।
तेऊओ नाअं आसा सोभी का बडअ अर महान!
तेऊओ प्रतप्प आसा सारी पृथूई अर स्वर्गै।
तेऊ बणाईं आपणीं परज़ा बलबान,
ताकि तेऊए सह आपणीं परज़ा ज़ै-ज़ैकार करे,
इज़राईली मणछ आसा तेऊए खास्सै पैरै।
सोभै करा बिधाते ज़ै-ज़ैकार।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.