Kulvi Outer Seraji Bible
भज़न 145:18
Verse 18 is marked below, with the whole chapter around it. Read from the start
बिधाता आसा खास्सअ झणैल़ू
बिधाते ज़ै-ज़ैकार करना लै राज़ै दाबेदो भज़न
हे बिधाता, मुंह करनी सोभी सेटा तेरी बड़ैई,
मुंह रहणअ कबल्लै तेरअ शूकर करदै लागी।
धैल़ करनअ मुंह तेरअ शूकर,
मुंह रहणअ सदा तेरी ज़ै-ज़ैकार करदै लागी।
तूह बिधाता आसा महान अर तूह ई आसा बड़ैई करनै जोगी।
ज़ेतरअ हाम्हैं सोठी सका, तूह आसा तेता का बी खास्सअ महान।
ज़ुंण महान काम तंऐं किऐ, तेते बड़ैई रहणीं पोस्ती दर पोस्ती हंदी लागी,
तिन्नां खोज़णअ तेरै महान कामें बारै सोभी का।
तिन्नां खोज़णअ कि तूह किहअ महान अर ताखा किहअ प्रतप्प आसा,
मुंह डाहणअ तेरै महान कामां दी आपणअ धैन-मन्न लाई।
लोगा जैंदरी हणीं तेरै महान कामें बारै गल्ला लागी दी,
अर मुंह खोज़णअ तेरै बडै-बडै महान कामें बारै सोभी का।
लोगा करनी तेरी महान भलाईए बारै गल्ला अर
मुंह खोज़णअ गिह गांठी कि तूह किहअ झणैल़ू आसा।
तूह बिधाता आसा झ़ूरनै आल़अ अर झणैल़ू,
ताह निं धखी का रोश्शै एछदी अर तूह करा खास्सी झींण।
तूह आसा सोभी लै भलअ अर
तेरी झींण आसा पृथूईए सोभी ज़ीबा लै।
हे बिधाता, सोभी ज़ीबा करनी तेरी ज़ै-ज़ैकार,
अर सोभी लोगा करनअ तेरअ शूकर।
लोगा करनी एही गल्ला कि तेरअ राज़ किहअ महान आसा,
अर ताखा किहअ महान बल आसा,
ताकि तेरै महान कामें बारै सोभी मणछा का थोघ लागे अर
तेरअ महान राज़ अर तेतो प्रतप्प सोभी लै प्रगट होए।
तेरअ बधान आसा अटल़ अर
तूह आसा सदा लै राज़अ।
तूह निं आपणीं ज़बानी का कधि हुधदअ,
ज़िहअ तूह बोला, तूह करा तिहअ ई।
ज़हा खरी हुई पल़ी दी तेऊए करा तूह बिधाता ई मज़त,
ज़ुंण ठोहल़ लागी धरनीं बधल़ुअ, तेऊ झ़ैऊआ तूह हाथा ढाकी खल़ै।
सोभै ज़िऊंदै ज़ीब रहा तेरै आसरै,
ज़ेभै ज़रुरत हुई तेभै दैआ तूह तिन्नां सोभी लै खाणअ-पिणअ।
तूह दैआ तिन्नां लै खुल्है हाथै कि
सोभै ज़ीब ज़ेतरअ लोल़ी तेतरअ रज्ज़ी खाए।
हे बिधाता, तूह आसा तेरै सोभी कामां लै धर्मीं,
अर तेरै सोभी कामां दी हआ खास्सी झींण।
ज़ुंण शुचै दिलै ताह सेटा अरज़ करा,
तूह रहा आप्पू तिन्नां नेल़।
ज़ुंण तेरअ अदर करा, तिन्नां लै निं तूह किछ़ू गल्ले निऊल़ डाहंदअ,
तूह हेरा तिन्नें लेर-पकार शूणीं अर तिन्नां बच़ाऊई।
ज़ुंण ताल्है झ़ूरा, तिन्नें करा तूह फाज़त,
पर कदुष्ट मणछा करा तूह पठी बरैबाद।
मुंह करनी कबल्ली बिधाते ज़ै-ज़ैकार।
सोभै ज़िऊंदै ज़ीब करा बिधाते पबित्र नाओंए जुगै-जुगै तैणीं ज़ै-ज़ैकार।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.