Kulvi Outer Seraji Bible
भज़न 136
बिधाता झ़ूरा सदा
बिधातो शूकर करा, किल्हैकि सह आसा भलअ,
सह झ़ूरा हाम्हां लै सदा।
तेऊ बिधातो करा शूकर ज़ुंण सोभी देअआ का बडअ आसा,
सह झ़ूरा हाम्हां लै सदा।
तेऊ बिधातो शूकर करा ज़ुंण मालका प्रैंदै सोभिओ मालक आसा,
सह झ़ूरा हाम्हां लै सदा।
सह आसा बिधाता ई एक्कै ज़ुंण महान च़मत्कार करा,
सह झ़ूरा हाम्हां लै सदा।
बिधातो शूकर करा ज़ुंणी आपणीं महान समझ़ा करै सारअ भ्रमंड बणाअं,
सह झ़ूरा हाम्हां लै सदा।
बिधातो शूकर करा ज़ुंणी पाणीं प्रैंदै धरती छ़ैई,
सह झ़ूरा हाम्हां लै सदा।
तेऊ बणाऐं सुरज़ अर ज़ोथ,
सह झ़ूरा हाम्हां लै सदा।
सुरज़ डाहअ तेऊ कि सह धैल़ी दी राज़ करे,
सह झ़ूरा हाम्हां लै सदा।
ज़ोथ अर तारै लै दैनअ राची दी राज़,
सह झ़ूरा हाम्हां लै सदा।
तेऊ पाऐ मिसर देशे लोगे अर तिन्नें पशूए ज़ेठै मारी,
सह झ़ूरा हाम्हां लै सदा।
तेऊ आणै मिसरी लोगा मांझ़ा का इज़राईली बच़ाऊई,
सह झ़ूरा हाम्हां लै सदा।
तेऊ काढै तिधा का आपणीं बाहे महान ज़ोरा करै,
सह झ़ूरा हाम्हां लै सदा।
बिधातो करा शूकर ज़ुंणी लाल समुंदर ओर्ही-पोर्ही दूई बाखा लै किअ,
सह झ़ूरा हाम्हां लै सदा।
तेऊ टपाऊऐ इज़राईली जैंदरी बाती लाल समुंदरा पार राज्ज़ी-राम्बल़ै,
सह झ़ूरा हाम्हां लै सदा।
पर तेऊ घर्होहल़ै मिसर देशो माहा राज़अ अर तेऊए सारी सैना लाल समुंदरे डुघै पाणीं जैंदरी,
सह झ़ूरा हाम्हां लै सदा।
तेऊ बिधातो करा शूकर ज़ुंणी आपणीं परज़ा घोर उज़र रेगीस्ताना बाती नढैऊऐ,
सह झ़ूरा हाम्हां लै सदा।
बिधातो करा शूकर ज़ुंणी बडै-बडै मशूर राज़ै का ज़ित्तअ।
सह झ़ूरा हाम्हां लै सदा।
तिंयां बलबान मशूर राज़ै पाऐ तेऊ मारी,
सह झ़ूरा हाम्हां लै सदा।
अमोरी देशो राज़अ सिहोन,
सह झ़ूरा हाम्हां लै सदा।
बाशान देशो राज़अ ओग पाअ तेऊ मारी,
सह झ़ूरा हाम्हां लै सदा।
तिन्नें ज़ैगा दैनी तेऊ आपणीं परज़ा लै,
सह झ़ूरा हाम्हां लै सदा।
सह ज़ैगा दैनी तेऊ इज़राईली लै ज़ुंण तेऊए च़ाकरी करा,
सह झ़ूरा हाम्हां लै सदा।
तेऊ डाहै हाम्हैं म्हारी खरीए पलका आद,
सह झ़ूरा हाम्हां लै सदा।
तेऊ बच़ाऊऐ हाम्हैं म्हारै दुशमणा का,
सह झ़ूरा हाम्हां लै सदा।
सोभी ज़ीबो पेट भरा सह आप्पै,
सह झ़ूरा हाम्हां लै सदा।
तेऊ परमेशरो करा शूकर ज़ुंण स्वर्गै आसा बेठअ द,
सह झ़ूरा हाम्हां लै सदा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.