Kulvi Outer Seraji Bible
भज़न 128
बिधाता दैआ तिन्नां लै बर्गत ज़ुंण तेऊए साबै ज़िन्दगी ज़िऊआ
हांढा लै गिह
बिधाता दैआ तिन्नां लै बर्गत ज़ुंण तेऊए हुकम मना अर
तेते साबै आपणीं ज़िन्दगी ज़िऊआ।
तिन्नें खेचै हणीं खास्सी पज़ैआ अर
तिंयां रहणैं राज्ज़ी-मौज़ी अर सफल हंदै।
तिन्नें आपणीं लाल़ी हणीं तिन्नें टबरा लै फल़दी दाखे बेला ज़ेही,
तिन्नें शोहरू हणैं तिन्नां लै जैतूने बूटा ज़िहै।
ज़ुंण बी बिधाते डरा हेठै रहा,
तिन्नां लै दैआ सह ज़रूर एही ई बर्गत।
बिधाता लोल़ी तिन्नां लै सियोन धारा का बर्गत दैनी!
तिन्नां का शुझणीं एरुशलेम नगरी सारी अमरा राज्ज़ी-राम्बल़ी।
तिन्नें अमर हणीं एही लाम्मी कि तिन्नां न्हैल़णै आपणैं पोचै-पल़पोचै बी हंदै!
इज़राईली लै लोल़ी मेल़-ज़ोल़ रहअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.