Kulvi Outer Seraji Bible
भज़न 120
बिधाता का मज़त मांगणा लै अरज़
खरीए पलका पाई मंऐं बिधाता सेटा पकार,
तेऊ शूणीं मेरी अरज़।
हे बिधाता, तूह डाह मुंह शल़ैघा घल़णै आल़ै अर
छ़ल़-कपट करनै आल़ै मणछा का बच़ाऊई।
ओ झ़ुठअ बोल़णैं आल़ै मणछो, बिधाता ताल्है किज़ै करनअ?
तम्हां लै तेऊ केतरी बडी सज़ा दैणीं?
तम्हैं बिन्हणै तिछै कतीरा करै,
संघा दहणैं आगीए नारे कूंडा दी।
तम्हां मांझ़ै बस्सणै का आसा मेशक देशे लोगा जैंदरी
अर कदार मुल्खे लोगा जैंदरी परदेसी ज़िहै बस्सणअ भलअ।
मुंह हुई तिन्नां मणछा संघै रहंदी खास्सी साला
ज़ुंण मेल़-ज़ोल़ा का नफरत करा।
हुंह, च़ाहा तिन्नां संघै मेल़-ज़ोल़ करनअ पर
तिंयां करा मेरै गल्ला करदी मुंह संघै झ़गल़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.