Kulvi Outer Seraji Bible
भज़न 118
बिधाता आसा सदा झणैल़ू
बिधातो शूकर करा,
किल्हैकि सह आसा भलअ अर सह झ़ूरा हाम्हां लै सदा।
सोभै इज़राईली बोला इहअ,
“बिधाते झ़ूरी आसा अटल़।”
हारणो खिंब बिधाते सोभै प्रोहत बोला इहअ,
“बिधाते झ़ूरी आसा अटल़।”
सोभै ज़ुंण बिधाते च़ाकरी करा तिंयां बोला,
“बिधाते झ़ूरी आसा अटल़।”
मंऐं पाई खरीए पलका बिधाता सेटा पकार,
तेऊ शूणीं मेरी अरज़ संघा किअ हुंह आज़ाद।
बिधाता आसा मुंह बाखा आप्पै, तैही निं हुंह डरदअ आथी।
संसारे मणछ निं मेरअ किछ़ै बगाल़ी सकदै।
सह आसा बिधाता ज़ुंण मेरी मज़त करा,
मुखा शुझणैं आपणीं आछी कि मेरै दुशमण हारै।
मणछे आसरै रहणैं का आसा
बिधाता सेटा शरण लणी भली।
बलबान प्रधाने आसरै रहणैं का आसा
बिधाता सेटा शरण लणी भली।
हुंह गोटअ देशा-देशे दुशमणै फेरा-फेर,
पर बिधाता दैनअ मुल्है इहअ बल कि तिंयां किऐ मंऐं सोभै खतम।
तिन्नैं गोटअ त हुंह च़ऊ बाखा,
पर बिधाता दैनअ मुल्है इहअ बल कि तिंयां किऐ मंऐं सोभै खतम।
तिंयां शाचै तै मुल्है फेरा फेर माहूँ ज़िहै,
पर तिंयां हिठै कांडै दी चैल़ी दी आगी ज़िहै छ़ेक्कै,
बिधाता दैनअ मुल्है इहअ बल कि तिंयां किऐ मंऐं सोभै खतम।
तिंयां आऐ तै मुंह मारदै इहै ठुर्ही कि हुंह पाणअ धरनीं लाम्मअ,
पर बिधाता किई मेरी मज़त।
बिधाता दैआ आप्पै मुल्है ज़ोर अर बल,
तेऊ बच़ाऊअ हुंह आप्पै।
बिधाते धर्मीं मणछे डेरै हणीं ज़िती करै ज़ोरै-ज़ोरै ज़ै-ज़ैकार करी इहअ बोल्दै लागै दै,
“अह हुअ बिधाते महान बला करै।
बिधाते महान बला करै ज़ितै हाम्हैं,
जुधा लै थिअ तेऊओ ई महान बल!”
हुंह निं मरदअ आथी, मुंह रहणअ ज़िऊंदै अर
मुंह खोज़णअ सोभी का कि बिधाता किहै-किहै महान काम किऐ।
बिधाता नैरअ हुंह बतेर्हअ पर
तेऊ निं मेरी मौत दैनी हणैं।
ओर्ही खोल्हा मुल्है भबने प्रऊल़,
मुंह करनअ भितरी डेऊई बिधातो शूकर।
बिधाते प्रऊल़ आसा अह ई,
एथ भितरी डेओआ सिधै धर्मीं मणछ।
हे बिधाता, मुंह करनी तेरी ज़ै-ज़ैकार, किल्हैकि तंऐं शूणीं मेरी अरज़,
तंऐं ई दैनी मुल्है ज़ीत।
ज़ुंण पात्थर मिस्त्री बृथा समझ़अ त,
तंऐं बणाअं सह ई पात्थर सोभी का खास।
अह किअ तंऐं बिधाता,
हाम्हां लै हुई अह बेघै नुआहरी गल्ल।
ऐहा धैल़ी आसा बिधाते ज़ीत हुई दी,
अह धैल़ी मनाऊंणी हाम्हां खुशी।
हे बिधाता, हाम्हां बच़ाऊ, बच़ाऊ हाम्हां!
ज़ीबाण, हाम्हां कर तूह सफल।
बिधाता लोल़ी ती तेऊ लै बर्गत दैनी ज़ुंण तेऊए नाओंऐं एछा!
हाम्हैं दैआ ताल्है बिधाते पबित्र ज़ैगा का बर्गत।
म्हारअ परमेशर आसा बिधाता,
तेऊ दैनअ हाम्हां लै प्रैश्शअ!
खज़ूरे डाल़ी हाथै च़की करा थैर मनाऊंणअ शुरू, संघा दैआ बेदी फेर फेरी।
हे बिधाता, तूह आसा मेरअ परमेशर, मुंह करनअ तेरअ शूकर।
मुंह करनी तेरी बड़ैई सारै दी।
बिधातो शूकर करा,
किल्हैकि सह आसा भलअ अर सह झ़ूरा हाम्हां लै सदा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.