भज़न 115

बिधाता आसा ज़ै-ज़ैकार करनै जोगी

1हे बिधाता, म्हारी निं, ज़ै-ज़ैकार लोल़ी सिधी तेरी हुई,

सारी बड़ैई जोगी आसा सिधअ तूह ई किल्हैकि

किल्हैकि तेरी झ़ूरी अर सत्त आसा अटल़।

2देशा-देशे लोगा किल्है दैणअ हाम्हां लै इहअ बोल़णैं,

“थारअ परमेशर किधी आसा?”

3तूह म्हारअ परमेशर आसा स्वर्गै बेठअ द,

तूह करा ज़िहअ तूह च़ाहा तिहअ।

4तिन्‍नें1 देअ-देबी आसा सुन्‍नैं-च़ंदीए!

तिंयां आसा मणछै आपणैं हाथै बणाऐं दै!

5तिन्‍नें खाखा ता हआ पर तिंयां निं गल्‍ला करी सकदै,

तिन्‍नें आछी ता हआ पर शुझदअ निं तिन्‍नां का आथी!

6तिन्‍नें कान ता हआ पर तिंयां निं शूणीं सकदै,

तिन्‍नें नाक बी आसा बणाऐं दै पर तिंयां निं शिंघी सकदै!

7तिन्‍नां का हाथ ता आसा, पर तिंयां निं छ़ुंहीं सकदै,

ज़ांघा ता आसा पर तिंयां निं हांढी सकदै,

नां तिन्‍नें घुघल़ै का किज़ै बोल निखल़दअ!

8ज़ुंणी तिंयां मुहुर्ती बणाईं अर ज़ुंण तिन्‍नां दी भरोस्सअ डाहा,

तिंयां बी हुऐ तिन्‍नां मुहुर्ती ई ज़िहै बृथा अर गुग्गै।

9ओ इज़राईली मणछो, तम्हैं करा बिधाता दी भरोस्सअ,

थारी मज़त अर फाज़त करनै आल़अ आसा सह ई। 102

बिधाता दी डाहा भरोस्सअ, ज़ुंण तम्हैं हारणे आद-लुआद बिधाते प्रोहत आसा,

थारी मज़त अर फाज़त करनै आल़अ आसा सह ई।

11बिधाता दी डाहा भरोस्सअ ज़ुंण तम्हैं बिधाते भगत आसा,

थारी मज़त अर फाज़त करनै आल़अ आसा सह ई।

12बिधाता निं हाम्हां बिस्सरदअ आथी, तेऊ दैणीं हाम्हां लै बर्गत,

तेऊ दैणीं इज़राईली टोली अर

हारणे आद-लुआदा लै बर्गत।

13तेऊ दैणीं सोभी लै बर्गत ज़ुंण बी तेऊओ अदर करा,

च़ाऐ सह होछ़अ होए च़ाऐ सह कुंण बडअ मशूर होए।

14मेरी आसा बिधाता का एही अरज़ कि बिधाता लोल़ी तम्हां अर

थारी आद-लुआदा लै खास्सै शोहरू-माठै दैनै।

15ज़ुंणी बिधाता पृथूई अर सारअ भ्रमंड बणाअं,

तेऊ का लोल़ी तम्हां खास्सी बर्गत भेटी।

16स्वर्ग आसा बिधाता आप्पू लै डाहअ द,

हाम्हां मणछा लै आसा तेऊ पृथूई दैनी दी।

17मुल्दै निं बिधाते ज़ै-ज़ैकार करदै,

ज़ुंण मरी गऐ तिन्‍नें भलै निं बिधाते ज़ै-ज़ैकार हंदी।

18पर ज़ुंण हाम्हैं ज़िऊंदै आसा, हाम्हां करनअ तेऊओ शूकर,

आझ़ बी अर आजू सारी सदा।

बिधाते करा ज़ै-ज़ैकार।