Kulvi Outer Seraji Bible
भज़न 102
खरीए पलका प्राथणां
खरीए पलका रैनै-गरीब मणछे अरज़, आपणैं दिलो दुख खोज़ा सह बिधाता सेटा खुल्ही करै।
हे बिधाता, हुंह पाआ ताह सेटा लेर-पकार!
ज़ीबाण, मेरी अरज़ शुण।
खरीए पलका निं
मुंह बाखा पिठ फरेऊई आथी
मेरी गल्ला शुण अर ज़ेभै हुंह ताह सेटा पकार पाए,
तेभै निं बल़ैग पाई आथी।
मेरी ज़िन्दगी च़ाल्ली धूँआं ज़ेही मुक्की,
अर मेरी देही आसा ज़ेही आगी जैंदरी दझ़दी लागी दी।
हुंह शुक्कअ-मुक्कअ इहअ ज़िहअ घाह मछैंआं,
मेरी हुई भुख चिश बी खतम।
धक्की-धक्की शुक्कअ हुंह इहअ कि
मेरी देही लागै सिधै हाडकै शुझदै।
हुंह हुअ बणें च़ेल्लू ज़िहअ रेगीस्तानै,
ज़िहअ हुहल़ू दूर रेगीस्तानै कल्ही हआ छ़ुटअ द।
हुंह रहा च़ैन्नै लाम्मअ पल़ी बिहुदअ,
हुंह हुअ हिंऊंल़ी च़ेल्ली ज़िहअ ज़ुंण कणोडै दी कल्ही आसा बेठी दी।
मेरै बैरी लागा धैल़ मेरै सुहांगा करदै,
तिंयां करा मुंह ठठ्ठै लै, संघा दैआ मुल्है फिटक।
किल्हैकि तेरै रोश्शो कोप पल़अ मुल्है इहअ,
मुंह पल़ा छ़ार रोटी ज़िहअ खाणअ अर
आशू राल़िआ झुटणें पाणीं जैंदरी,
तंऐं शोट्टअ हुंह उछ़टै च़की दूर।
मेरी ज़िन्दगी आसा उडदी छ़ैल्ली ज़ेही,
अर शुक्कै दै घाहा ज़ेही।
पर बिधाता, तूह आसा सदा लै राज़अ,
तूह रहणअ पोस्ती दर पोस्ती इहअ ई।
ताह जाणअ उझ़ुई संघा करनी ताह सियोन नगरी लै झींण,
ऐबै गअ तैहा नगरी लै झींण करनैओ बगत एछी,
तेता लै आसा अह ई बगत।
किल्हैकि सह नगरी आसा पठी बरैबाद हुई दी,
तज़ी बी झ़ूरा तैहा नगरी लै तेरै च़ाकरी करनै आल़ै खास्सै,
सह आसा पठी ढूल़ी-पल़ी गई दी
तेता भाल़ी फिरा तिन्नां खास्सी झींण।
देशा-देशे लोगा रहणीं बिधाते नाओंए डअर,
पृथूईए सोभी राज़ै छ़ुटणअ तेरै प्रतप्पा भाल़ी दर्छ़णअ।
ज़ांऊं ताह सियोन नगरी भिई बसाऊंणी,
तेथ शुझणअ तेरअ प्रतप्प सोभी का।
ताह हेरनी छ़ुटै-मुक्कै दै लान्हें अरज़ शूणीं,
ताह हेरनअ तेतो ज़बाब तिन्नां लै दैई।
ईंयां गल्ला डाहणीं आगली पोस्ती लै लिखी कि बिधाता किज़ै आसा किअ द,
ताकि ज़ुंण अज़ी हुऐ ज़ल्मैं निं आथी, तिंयां बी बिधाते ज़ै-ज़ैकार करे।
तूह बिधाता लागअ उझै आपणीं पबित्र ज़ैगा का भाल़अ,
तंऐं भाल़अ उझै स्वर्गा का धरती लै।
ज़ुंण गलामी दी कैद आसा, तंऐं हेरी तिन्नें लेर-पकार शूणीं,
ज़ुंण मारी तै लाऐ दै, तिंयां किऐ तंऐं शांघल़ी-लोहै का आज़ाद।
ताकि सियोन नगरी तेरै नाओंए बारै गल्ला होए,
एरुशलेम नगरी तेरी ज़ै-ज़ैकार होए।
देशा-देशे लोगा अर राज़ै हणैं
तेरी ज़ै-ज़ैकार करना लै कठा।
तंऐं बिधाता किअ हुंह खारकी अमरा दुबल़अ अर
तंऐं किई मेरी अमर होछ़ी।
हे परमेशर, मुंह निं आधी अमरा मारी आथी,
हुंह लोल़ी खास्सी प्रोढी अमरा तैणीं रहअ।
हे मेरै मालक, सदा ज़िऊंदअ रहा तूह एक्कै।
सोभी का आजी बणाईं तंऐं ई पृथूई अर
सारअ भ्रमंड बणाअं तंऐं आपणैं हाथै।
धरती संघी सारअ भ्रमंड हणैं एकी धैल़ै खतम पर तूह रहणअ सदा,
तिंयां हणैं झिकल़ै ज़िहै पराणैं,
तिंयां बदल़णैं ताह झिकल़ै ज़िहै पोर्ही
संघा बणाणैं ताह तिंयां नऊंऐं।
पर आप्पू आसा तूह सदा ज़िहअ आसा तिहअ ई,
तेरी अमर निं कधि खतम हंदी।
म्हारी आद-लुआद रहणीं राज्ज़ी राम्बल़ी,
तिंयां रहणैं तेरी छ़ैआ-छ़तरा हेठै,
तिन्नें आद-लुआद1 बी रहणीं आजू तेरै प्रतप्पा करै राज्ज़ी-राम्बल़ै।
Source notes (1)
- Footnote तिन्नें आद-लुआद इज़राईले आद-लुआद
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.