Kulvi Outer Seraji Bible
सैणीं गल्ला 13
अक्ली आल़ै मणछे संगत दैआ अक्ल
ज़ेभै ईज-बाब नैरदै लागै, अक्ली आल़ै लान्हैं समझ़ा तैहा गल्ला,
पर नशूण अर हठू निं मंदै ई आथी।
भलै मणछा जाआ भली च़िज़ो भलअ पुआज़अ भेटी,
पर घाती मणछ हआ उपद्रभ करने भुखै।
सोठी-समझ़ी बोल़णैं आल़अ ता करा आपणीं ज़िन्दगीए फाज़त,
पर ज़ुंण टाभ बाहा, सह करा आपणीं बरैबादी।
ज़ैऊंकर मणछ च़ाहा ता खास्सअ, पर तेऊ निं किछ़ भेटदअ,
पर मैन्थी मणछा भेटा ज़िहअ सह च़ाहा तिहअ ई रज्ज़ी।
मानदार मणछ करा शल़ैघी का ज़ीद,
पर कदुष्ट मणछा लागा शर्मिंदै अर बेइज़त हणअ।
धर्मीं ज़िन्दगी करा नर्दोश मणछे फाज़त,
पर कदुष्ट मणछा करा तेऊओ पाप तेऊ आप्पू ई बरैबाद।
कई मणछ करा सेठ हणैंओ दखाअ, पाल्लै निं हंदअ तिन्नां का किछ़ै!
पर कई का हआ सोभै गल्ला बतेर्ही, पर तिंयां करा इहअ दखाअ कि तिंयां आसा गरीब।
सेठ मणछा लागा आपणीं ज़िन्दगी बच़ाऊंणा लै ढब्बै बी दैणैं,
पर दाल़जी मणछ निं एही धमकी बाखा धैन बी दैंदअ।
धर्मीं मणछ हआ प्रैश्शै ज़िहै,
पर कदुष्ट मणछ हआ हिठै दै लाटू ज़िहै।
घमंड करी हआ झ़गल़ै ई,
पर अक्ली आल़अ मणछ शूणां दुजे सलाह।
धोखै करै खटअ द धन हआ खतम बी छ़ेक्कै,
पर ज़ेथ मैन्थ हुई लागी दी, सह रहा बढदअ लागी।
ज़ेभै आशा खतम हआ, तेभै चुटा दिल बी,
पर ज़ेभै मानत पूरी हआ, सह ज़ाण्हिंआं ज़िन्दगी दैणैं आल़ै हरै बूटा ज़िहअ।
ज़ुंण भली सलाह1 निं मंदअ, सह आणा आप्पू लै आफ़त,
पर ज़ुंण तेतो मोल समझ़ा, सह करा आपणीं फाज़त।
अक्ली आल़ै मणछे शिक्षा हआ एही सोबल़ ज़ुंण ज़िन्दगी दैआ,
तेता करै भेटा तेभै मज़त ज़ेभै तम्हां मरनै जोगी फाही हआ हुई दी।
सुंबल़ी बुधा आल़ै मणछो हआ अदर,
पर कबुधी मणछ हांढा तैहा बाता ज़ेथ बरैबादी हआ।
ज़हा सोर-समझ़ हुई, सह करा काम करनै का आजी बच़ार,
पर ऐडअ मणछ करा आपणीं कबुध प्रगट।
समादा पजैल़णैं आल़अ दूत ज़ै कदुष्ट होए, सह पाआ होर बी झाख,
पर शुचअ-पाक्कअ मणछ करा मेल़-ज़ोल़।
ज़ुंण मणछ नांईं शिखल़दअ, तेऊ पल़ा दाल़ज, संघा लागा तेऊ शर्मिंदै हणअ।
ज़ुंण नैरी-समझ़ाऊई करै समझ़ा, तेऊओ हआ अदर।
ज़ेभै तम्हैं ज़िहअ च़ाहा तिहअ ई हआ, सह गल्ल ज़ाण्हिंआं सोभी का मिठी,
पर कदुष्ट कामां का पिछ़ू हटणअ ज़ाण्हिंआं ऐडै मणछा का बूरअ।
ज़ुंण अक्ली आल़ै मणछे संगत करा, तेऊ संघै एछा तेऊ आप्पू बी अक्ल,
पर ऐडै मणछे संगत पाआ आफ़ता दी।
पापी मणछे निं आफ़त पिछ़अ छ़ाडदी,
पर धर्मीं मणछा भेटा तेतो फल भलअ ई।
भलअ मणछ डाहा आपणैं पोचै-पल़पोचै तैणीं धन झाल़ी,
पर पापी मणछे ज़ैदात डेओआ तेऊए आपणीं पोस्ती बी ज़ैदात धर्मीं लै।
रैनै-गरीबे खेचै जाआ राम्बल़ी साल-फसल हई,
पर कदुष्ट मणछ निं तिन्नां बऊंणैं-बचऊणैं दैंदै।
ज़ुंण आपणैं शोहरू-माठै लै झ़ूरा, सह डाहा तिन्नां नैरी बी,
पर ज़ुंण नांईं झ़ूरदअ, सह दैआ तिन्नां कज़ेही करनै।
धर्मीं मणछा का हआ खाणां लै बतेर्हअ नाज़,
पर कदुष्ट मणछा हआ बैल़ी खाई क्लारी भेटणीं कठण।
Source notes (1)
- Footnote भली सलाह परमेशरे बैण
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.