Kulvi Outer Seraji Bible
लामण 5
झींण करना लै अरज़
बिधाता, आद कर कि हाम्हां लै केही-केही हुई-बिति!
हाम्हां बाखा भाल़, हाम्हैं किहै बेइज़त शोटै करी।
म्हारी दादा-बाबे ज़ैदात गिम्मी परदेसी,
म्हारै घअरै बस्सै किअ पराई ज़ाती कबज़अ।
हाम्हैं हुऐ बाबा बाझ़ी छ़ुटै-मुक्कै दै!
म्हारी ईजा हुई बिधबा।
झुटणा लै पाणीं बी लागा हाम्हां मोलै लणअ!
गेठै आगी ज़ाल़णा लै झ़ुका बी लागा हाम्हां ढब्बै दैई लणी!
म्हारै कैल़ै आसा बल्दा ज़िहअ गर्कअ जूँ डाहअ द पाई,
ऐबै थकै हाम्हैं, हाम्हां निं थोल़ी घल़ी बी बशैघ भेटदअ।
हाम्हैं मनी मिसर अर अश्शूरी देशे गलामी कि
तिंयां हाम्हां लै रज्ज़ी खाणां लै दैए अर हाम्हैं ज़िऊंदै बच़े।
म्हारै दादै-बाबै किअ पाप, पर ऐबै गऐ तिंयां मरी,
हाम्हैं आसा तिन्नें पापा पिछ़ू सज़ा भुगतदै लागै दै।
गलाम आसा हाम्हां प्रैंदै राज़ करदै लागै दै,
तिन्नां का निं हाम्हां कोह छ़ड़ैऊंणैं आल़अ आथी।
रोटी लोल़ै लागा हाम्हां आपणीं ज़ान खातरै दी पाई डेऊणअ!
दुशमण आसा बागै हर ज़ैगा हाम्हां मारदै ताखुई रहै दै।
भुखे आसा हाम्हां आगी ज़िहअ ज़अर आअ द,
म्हारी खाल बी फिरी बागा का तंदूरा ज़ेही काल़ी।
दुशमण सुत्तै ज़ोरा-ज़ोरी एरुशलेम नगरीए म्हारी बेटल़ी संघै!
यहूदा मुल्खै हर गराऊंऐं म्हारी कुंआरी शोहरी किई तिन्नैं भ्रष्ट!
म्हारै कार-करिंदै डाहै दुशमणै राश्शी करै बान्हीं छ़ड़ाऊई!
म्हारै सैणैं किऐ तिन्नैं बेइज़त।
खारकै मणछ आसा गलामा ज़िहै थरेटा दी नाज़ा पिशदै लागै दै,
लान्हैं आसा गर्कै झ़ुके भर्टू करै जुंघू लागै दै।
सैणैं निं ऐबै नगरीए प्रऊल़ी सेटा बेशदै आथी,
नां ज़ुआन शोहरू गिहा-बाता बोल्दै शुण्हदै!
म्हारी ज़िन्दगी का हुई ऐबै खुशी दूर,
म्हारी गिहा-बाता अर नाट पाणें ज़ैगा पल़अ हाम्हां लै शोग।
म्हारै मुंडो साफअ पल़अ धरनीं, सोभ गल्ला हुई हाम्हां लै उंबल़ी!
हाम्हैं किअ पाप अर तैही पल़ी हाम्हां लै आफ़त।
हाम्हैं हुऐ भितरा का बाख दुबल़ै,
इना गल्ला करै फिरी म्हारी आछी बी पाल्ली।
सियोन धार हुई पठ शुन्नीं अर बरैबाद,
एथ आसा ऐबै शैल़ी-शैल़ठै ठुल़्दै लागै दै।
हे बिधाता, तूह आसा राज़गाद्दी दी सदा बेठअ द,
तेरअ राज़ रहणअ पोस्ती दर पोस्ती इहअ ई।
ओ परमेशरा! तंऐं किल्है डाहै हाम्हैं सदा लै शोटी?
तंऐं कै हाम्हैं सदा लै हेरै बिस्सरी डाही?
हे बिधाता, हाम्हां फरेऊ आप्पू बाखा लै,
तै जाणैं हाम्हैं ताह सेटा लै बापस एछी।
हाम्हां कर भिई तिहै ई ज़ेही म्हारी पैहलै शोभा-शान ती।
तंऐं कै हाम्हैं सदा लै हेरै छ़ाडी?
तूह कै हाम्हां का पठी आसा रुश्शअ द?
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.