Kulvi Outer Seraji Bible
पांच़ 5
दबोरा अर बराके गिह
तेऊ जुधा ज़ितणें तैहा ई धैल़ी गांठी दबोरा अर अबनोमे शोहरू बराकै बिधाता लै अह गिह:
हे बिधाता, हाम्हैं करा तेरी ज़ै-ज़ैकार!
इज़राईली परज़ा तैर्हुई जुधा लै दिला का आप्पै,
इज़राईली सैणैं हुऐ ज़िहअ तंऐं बोलअ तिहअ करना लै तैर।
ओ राज़ैओ, शूणां!
सोभै बज़ीर दैआ धैन,
इज़राईले परमेशर बिधाता लै बोल़णीं मुंह
आप्पै रागा-बाज़ा संघै गिह।
हे बिधाता, ज़ांऊं तूह सेईर धारा का आअ,
ज़ांऊं तूह एदोम मुल्खा का हांढदअ लागअ,
धरती दी हुई ज़ाज़री अर सरगा का रिंगअ पाणीं हर्हल!1
सीनाई धारे परमेशरा सेटा लागै बडी-बडी धारा झ़लारै
इज़राईले परमेशर बिधाते सम्हनै लागी बडी-बडी धारा गल़दी।
अनाते शोहरू शमगारे ज़मानैं अर
ज़ाएले ज़मानै हुई सल़का शुन्नीं अर
मसाफर लागै बणां-बूटा डेऊणैं बाता हांढदै।
इज़राईले होछ़ै-होछ़ै गराअं हुऐ पठ शुन्नैं,
तिंयां ती मुंह दबोरा एछणैं तैणीं रित्ती
कि हुंह आई ज़ेही सोभी इज़राईलीए ईज।
देशै रहा तै जुध हंदै,
ज़ांऊं इज़राईली नऊंऐं-नऊंऐं देअआ पूज़दै लागै!
च़ाल़्ही हज़ार इज़राईली मांझ़ै बी निं
कहा एकी ज़ण्हैं का बी ढाल़ अर बर्छ़ी भाल़ी!
हे बिधाता, हुंह करा तेरी ज़ै-ज़ैकार,
हुंह आसा दिला का इज़राईली सैणैं अर शूरबीरा संघै
ज़ुंण दिला का आप्पै जुधा लै तैर्हुऐ।
शेती गाधी प्रैंदै शुंआर अर गाद्दी दी बेठै दै मणछो, शूणां,
पैदल हांढणै आल़ै मणछो, तम्हैं दैआ धैन।
शूणां, पाणींए कुहै फेर डागै-धणा जा-फऊण रागा लाणैं आल़ै बी आसा
एही गल्ला लागै दै कि बिधाता केही ज़ीत दैनी अर
इज़राईली किहै ज़ितै!
तेखअ होथी बिधाते परज़ा उंधै आपणीं-आपणीं नगरी2 लै।
गिह बोल दबोरा, गिह बोल!
गिह बोल, गिहा बोल्दी लाग आजू हांढदी!
अबनोमे शोहरू बराका,
इना कैदी निंऊं आप्पू संघा गलाम बणाईं।
ज़ुंण महान मणछ तै रहै दै, तिंयां आऐ आपणैं सैणैं सेटा लै उंधै,
बिधाते परज़ा आई शूरबीरा संघै जुधा करदी।
एप्रैम ज़िधी एकी ज़मानै अमोलकी तै बस्सै दै,
तिधा का आअ छ़ुंढ।
होर आऐ बिन्यामीना का, माकीर टोली अर
ज़बलून गोत्रा का आऐ सैनापति अर दलपति।
इस्साकार गोत्रे सैणैं बी आऐ दबोरा संघै,
हाँ, इस्साकार बी आअ बराक बी आअ,
तिंयां आऐ तेऊ पिछ़ू उंधै सऊंऐं मुल्खा तैणीं।
पर रूबेन गोत्रा आल़ै रहै दबिधा दी पल़ी अर
तिंयां निं मज़ती लै एछी बोल़ै।
रूबेन, तूह किल्है रहअ आपणीं भेडा-बाकरीए शाल़ा भितरी हेल़्ही जैंदरी बेशी?
भेडा लै फुआले शल़ेल़्हा शुण?
हाँ, रूबेन गोत्रा आल़ै रहै दबिधा दी पल़ी अर
तिंयां निं मज़ती लै एछी बोल़ै।
गलाद गोत्रा आल़ै रहै पुर्बा बाखा जरदण पार,
दान गोत्र रहअ आपणैं ज़हाज़ा दी,
आशेर गोत्रा आल़ै रहै समुंदरे बाढै
ज़हाज़ा खरैल़णें आडै।
पर ज़बलून अर नप्ताली गोत्र निं
जुधा लै आपणीं ज़िन्दगी डेऊणैं का बी डरै।
मगिदो छ़ोआ सेटा आऐ
तनाक ज़ैगा राज़ै जुधा लै,
कनान देशे कई राज़ै किअ ज़बर जुध,
पर तिन्नां निं सुन्नैं-च़ंदीओ किछ़ै नफअ हुअ।3
सरगा का पल़ै तारै बी जुधा लै चुटी,
ज़ांऊं तिंयां सरगै ओर्ही-पोर्ही रिंगै,
तिन्नैं किअ सिसरा संघै जुध।
किशोन गाड ज़ुंण पराणैं ज़मानैं ओर्ही आसा,
तैहा घर्होहल़ी सिसरे सैना दूर।
मुंह रहणअ हैअ डाही आजू हांढदै लागी।
घोल़ै हांढणे छ़ेल़ लागी ती ज़ोरै-ज़ोरै शुण्हदी,
तिंयां थिऐ बागी ज़िहै छ़ेक्कै ठुर्हदै लागै दै।
बिधातो स्वर्ग दूत बोला इहअ,
“मरोज़ा लै बी दैआ फिटक, ज़ुंण तिधी आसा बस्सै दै तिन्नां लै बी फिटक।
तिंयां निं शूरबीरा संघै जुधा करना लै
बिधाते मज़त करदै आऐ!”
सोभी का खास्सी बर्गत आसा
कैनी टोली का हेबरे लाल़ी ज़ाएला लै,
सह आसा खिम्भे डेरै दी रहणैं आल़ी सोभी बेटल़ी का खास्सी भागा आल़ी।
सैनापति सिसरा मांगअ तैहा का पाणीं पर तैहा दैनअ दुध,
तैहा आणअ किम्मती भांडै दी काच़अ घिऊ।
तैहा हाथै च़की खिम्भा टकैल़णें तिछी खुंढी
अर दुजै हाथै च़कअ ठोल्लू
तैहा टोक्की खुंढी तेऊए काना पिछ़ू एही ज़ोरै कि
सह खुभी दुजी बाखा उंधै धरनीं!
सह पल़अ तेसे खूरा सेटा उटी बाखा,
सह रहअ तेसे खूरा सेटा चाछल़दअ लागी,
सह रहअ तैहा बेटल़ीए तिधी लाम्मअ पल़ी,
सह हुअ तिधी मरी हक्क।
सिसरे ईज रही तीरु बाती भाल़ी न्हैल़ी लागी,
सह रही पल्दै पिछ़ू का लेरा लाई बोल्दी,
“तेऊ एछणा एतरी बल़ैग किल्है पाई?
तेऊए रथे घोल़ै किल्है लागै होए इहै सुलै हांढदै?”
तेसे अक्ली आल़ी साथणीं दैनअ तैहा लै ज़बाब,
सह रही आप्पू लै भिई-भिई इहअ बोल्दी लागी,
“सिसरा अर तेऊए सैना हणीं आप्पू मांझ़ै बांडणां लै खज़ानैं लोल़ै अर
तिन्नां मांझ़ै हरेकी लै कुंआरी शोहरी, या हई सका दूई-दूई पै आणे,
सिसरा लै किम्मती झिकल़ै अर
बेटल़ी लै बेल-बूटै पाऐ दै रंग-बरंगै झिकल़ै लोल़ै लागै दै।”
हे बिधाता, “इहै ई मूंऐं तेरै कई दुशमण,
पर तेरी परज़ा ज़हा लै तूह झ़ूरा, तिन्नां का निखल़अ सुरज़ा ज़िहअ धुप्पअ।”
तधा पोर्ही रही आजू च़ाल़्ही साला तैणीं तेऊ देशै शांती।4
Source notes (4)
- Cross-reference इब्रा. 12:26
- Footnote नगरी आपणीं नगरीए प्रऊल़ी सेटा लै
- Cross-reference प्रका. 16:16
- Cross-reference प्रका. 1:6
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.