Kulvi Outer Seraji Bible
पांच़ 18
मिका अर दान गोत्र फिरै मुहुर्ती पूज़ा बाखा
तेऊ ज़मानै निं इज़राईलीओ कोहै राज़अ आथी त। दान गोत्रे लोग तै आप्पू बस्सणा लै ज़ैगा लोल़ै लागै दै किल्हैकि तिन्नें टोली निं इज़राईली मांझ़ै अज़ी तैणीं आपणैं हेस्सै दी कबज़अ भेटअ आथी त।1 तेता लै छ़ांटै दान गोत्रे लोगै आप्पू मांझ़ा का पांज़ ज़ाण-प्रबीण आदमी संघा छ़ाडै अशतोल अर सोरा नगरी भाल़ै-हेरै अर तिन्नां का डाहअ बोली, “तम्हैं एछै ऐहा ज़ैगो भेख लई।” ज़ांऊं तिंयां एप्रैम गोत्रे धारा बाखे मुल्खै पुजै, तिंयां रहै बैल़ी मिके घअरै। किल्हैकि तेऊए घअरा नेल़ शूणअ तिन्नैं सह ज़ुआन लेबी गल्ला करदअ अर तिन्नैं हेरअ सह तेऊए बोली का बछ़ैणीं कि सह आसा दखणा बाखा। तिन्नैं पुछ़अ सह, “लै तूह कै करा एथ? तूह कुंणी आणअ इधा लै?”
तेऊ लेबी दैनअ तिन्नां लै ज़बाब, “हुंह डाहअ द इधी मिका प्रोहत अर तेता लै दैआ सह मुल्है सालकी मज़दूरी बी।” तिन्नैं बोलअ तेऊ लेबी लै इहअ, “ज़ीबाण, तै पुछ़ परमेशरा का इहअ हैनूं, हाम्हैं आपणीं ऐहा हांढा दी सफल बी हणैं कि नांईं?” प्रोहतै दैनअ तिन्नां लै ज़बाब, “तम्हैं रहा निहंचै, बिधाता डाहणअ थारअ धैन-खैल आप्पै।”
तेखअ लागै तिंयां पांज़ आदमी तिधा का हांढदै संघा डेऊऐ उंधै लैश नगरी बाखा लै। तिन्नैं भाल़अ कि तिधे लोग रहा सदोनी लोगा ज़िहै निहंचै। तिंयां आसा शांत, मौज़ी अर नां तेऊ देशै कोई राज़अ आथी ज़ुंण तिन्नां किज़ू का रोक्के! तिंयां थिऐ सदोन आपणैं देशा का खास्सै दूर बस्सै दै अर तिन्नैं निं होरी कोही लोगा संघै किछ़ै बभार आथी त डाहअ द।
ज़ांऊं तिंयां पांज़ अशतोल अर सोरा नगरी का बापस फिरी पुजै, तिन्नां का पुछ़अ होरी भाई-बंधै, “किज़ै खबर आसा?”
तिन्नैं पांज़ा ज़ण्हैं बोलअ, “च़ाल्ला, हाम्हां करनअ लैश देशा दी हामलअ। हाम्हैं भाल़ी सह ज़ैगा अर सह आसा बधिया। इधी निं रहा बल़ैघदै लागी, एछा हाम्हां करनअ सह देश आपणैं कबज़ै! तिधी पुजी भाल़णैं तम्हां तिधे लोग निहंचै पल़ै दै, अह आसा बडअ देश अर एऊ देशै आसा ज़रुरतीए सोभै गल्ला अर परमेशरै दैनअ अह देश तम्हां लै।”
तेखअ लागै दान गोत्रे छ़ह शौ मर्ध अस्त्र-शस्त्र पाई अशतोल अर सोरा का जुधा लै हांढदै। तिंयां डेऊऐ तिधा का उझै संघा पाऐ यहूदा मुल्खै किर्यात-ज़रीम डेरै। तैहा ज़ैगा नाअं आसा आझ़ तैणीं बी दानो डेरअ पल़अ द। अह ज़ैगा आसा किर्यात-ज़रीम पछ़मा बाखा। तिधा का डेऊऐ तिंयां आजू संघा पुजै एप्रैम गोत्रे धारा बाखे मुल्खै मिके घअरा तैणीं।
तेखअ तिंयां पांज़ मणछ ज़ुंण लैश नगरी भेख लंदै तै आऐ दै, तिन्नैं बोलअ आपणैं तिन्नां होरी साथी लै, “इना मांझ़ै एकी घअरै आसा च़ंदी करै महल़ी दी काठे मुहुर्ती अर प्रोहतो च़ोल़अ अर कुल़ज देअए मुहुर्ती अर होरी देअए मुहुर्ती। तम्हैं कै बोला तेता लै किज़ै करनअ?”
तिंयां डेऊऐ मिके घअरा लै ज़िधी सह ज़ुआन लेबी रहा त, संघा पुछ़ी तेऊ का राज्ज़ी-खुशी। पिछ़ू तै नगरीए प्रऊल़ी नेल़ छ़ह शौ दानी सपाही जुध छ़ेल़णा लै तैर खल़्हुऐ दै। तिन्नां मांझ़ै तिंयां पांज़ ज़ुंण तेऊ देशो भेख लई डेऊऐ तै, तिंयां पेठै मिके घअरै। तिन्नैं च़की सह च़ंदी करै महल़ी दी काठे मुहुर्ती, च़ोल़अ अर कुल़ज देअए मुहुर्ती अर सह प्रोहत त प्रऊल़ी सेटा तिन्नां छ़ह शौआ आदमी सेटा खल़्हुअ द। ज़ांऊं सह ज़ुआन प्रोहत भितरा लै डेऊअ, च़ंदी करै महल़ी दी काठे मुहुर्ती अर प्रोहतो च़ोल़अ अर कुल़ज देअए मुहुर्ती अर होरी देअए मुहुर्ती तिन्नां पांज़े हाथै च़की दी। तेऊ प्रोहतै पुछ़अ तिन्नां का, “तम्हैं अह किज़ै लाअ करी?”
तिन्नैं बोलअ तेऊ लै, “च़ुप्पी रह, एक बैण बी निं काढी। ऐबै च़ाल्ल तूह हाम्हां संघै, तेखअ बण म्हारअ बाबा ज़िहअ अर प्रोहत। तूह भाल़ आप्पै ताल्है फाईदअ केथ आसा, एकी टोलो प्रोहत रहणअ कि इज़राईली मांझ़ै सारै दान गोत्रो प्रोहत हणअ?” ऐहा गल्ला शूणीं हुअ सह प्रोहत खुश, तेऊ च़की मुहुर्ती, च़ोल़ै अर पूज़ा-गाज़ा करने सोभ च़िज़ा संघा लागअ तिन्नां संघै हांढदअ।
तेखअ फिरै तिंयां पिछ़ू संघा लागै आपणैं लान्हैं, डागै-चैणैं आजू छ़ेल़्ही हांढदै। ज़ांऊं तिंयां मिके घअरा का खास्सै दूर गऐ डेऊई, मिका किऐ आपणैं गराऊंए सोभ लोग कठा। तिंयां डेऊऐ तिन्नां पिछ़ू संघा हेरै तिंयां ठिमकी। तिन्नैं लाई दान गोत्रे लोगा लै ज़ोरै-ज़ोरै हाक्का। तेखअ दैनअ दानी मिका लै पिछ़ू फिरी ज़बाब, “ताह कै हुअ, तूह किल्है आअ एचल़अ बडअ छ़ुंढ लई पिछ़ू झ़घल़दअ?”
मिका दैनअ ज़बाब, “ताखा निं थोघै कै हुअ? तंऐं पाऐ मंऐं बणाऐं दै देअ-देबी च़ोरी अर मेरअ प्रोहत बी निंयं! तेखअ पुछ़ा तूह मुखा इहअ कि ताह कै हुअ?”
दान गोत्रा आल़ै बोलअ मिका लै इहअ, “तेरअ भलअ आसा एथ कि हाम्हां संघै खास्सी हठ करी रोश्श ठैऊंदअ निं लागै, नांईं ता तूह अर तेरै खिंबा मांझ़ै निं एक बी ज़िऊंदअ बच़णअ।” तेखअ रहै दान गोत्रा आल़ै आजू हांढदै लागी। मिका हेरअ ज़ाणीं कि इना संघै निं म्हारै पुगदी अर सह डेऊअ आपणैं घअरा लै बापस फिरी।
इहअ करै निंयैं दान गोत्रा आल़ै मिका बणाईं दी च़िज़ा अर प्रोहत, संघा लागै लैश नगरी बाखा हांढदै सह देश थिअ बेथ-राहोब खागै नेल़। लैश नगरी निं बच़ाअ करना लै किछ़ै आथी त अर सदोना का बी थिई सह नगरी दूर कि तिंयां मज़त करदै। ओर्ही-पोर्ही होरी नगरी संघै बी नांईं त तिन्नों किछ़ै बभार आथी। दान गोत्रे दैनअ तिन्नां लै नच़ानक फेर-फिरदअ गोट अर तिंयां पाऐ सोभ मारी अर सारी नगरी चैल़ी आग। तेखअ बस्साऊई तिन्नैं सह नगरी भिई संघा बस्सै तिधी।
तिन्नैं डाहअ तैहा नगरी नाअं आपणैं मूल़ गोत्रे नाओंऐं दान ज़ुंण इज़राईलो शोहरू थिअ, पर पैहलै आसा तअ तैहा नगरी नाअं लैश।
ज़ुंण सह मुहुर्ती तिन्नैं आप्पू संघै आणी ती, तिन्नैं डाही सह एकी ज़ैगा पूज़ा-गाज़ा करना लै। मोसा गूरो पोचअ, गर्शोमो शोहरू जोनातान रहअ दान गोत्रो प्रोहत बणी। आजू रहै तेऊए आद-लुआद बी तेभै तैणीं तिन्नें प्रोहत ज़ांऊं तैणीं आजू तिंयां गलामी दी निं डेऊऐ। ज़ेभै तैणीं शिलोह बिधातो खिम्भ रहअ, तेभै तैणीं रहै तिंयां मिका बणाईं दी मुहुर्तीए बी पूज़ा करदै।
Source notes (1)
- Cross-reference ज़ैह. 19:47
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.