Kulvi Outer Seraji Bible
पांच़ 10
तोला पांच़
अबीमोलका मरनै का बाद निखल़अ इस्साकार गोत्रा का तोला नाओं मणछ ज़ुंणीं इज़राईली छ़ड़ैऊऐ। सह थिअ पूहो शोहरू अर तेऊए दादू नाअं त डोडो। तोला रहा त एप्रैम गोत्रे धारा बाखे मुल्खै शामीर नगरी। सह रहअ त्रेई साला तैणीं इज़राईलीओ पांच़। तेखअ मूंअ सह संघा डाहअ सह शामीर नगरी दाबी।
याईर पांच़
तोला बाद निखल़अ गलाद मुल्खा का याईर अर सह रहअ बाई साला तैणीं सोभी इज़राईलीओ पांच़। तेऊए तै तिह शोहरू अर तिंयां शोहरू करा तै तिह गाधे शुंआरी। गलाद मुल्खै ती तिन्नें तिह नगरी बी, तिन्नां नगरी लै बोला आझ़ तैणीं बी याईरे गराअं। ज़ांऊं याईर मूंअ, सह डाहअ कमोन नगरी दाबी।
इज़राईलीओ पाप
तेखअ हेरअ भिई इज़राईली तिहअ ई पाप करी ज़ेता का बिधाता नफरत करा। तिंयां लागै बिधाता छ़ाडी बाल देअ, अशतरोत देबी अर अराम, सदोनी, मोआबी, अमोनी, पलिश्ती लोगे देअआ पूज़दै। इहअ करै रुश्शअ बिधाता इज़राईली का पठी अर तिन्नां दैनअ पलिश्ती अर अमोनीए गलामी दी डेऊणैं। ज़धू याईर मूंअ, तैहा ई साला पोरी रहै पलिश्ती अर अमोनी जरदण नदी पार गलाद मुल्खै अमोरी देशे ज़ैगा बस्सै दै इज़राईली ठारा साला तैणीं हंतदै लागी। अमोनी लोग पुजा तै यहूदा, बिन्यामीन अर एप्रैम गोत्रा आल़ै संघै जरदण नदी पार बाखा झ़घल़दै। इज़राईली लै आणी तिन्नैं गल़ै तैणीं घाटी। तेखअ पाई खिरी इज़राईली बिधाता सेटा इहअ बोली लेर-पकार, “हे बिधाता, हाम्हैं किअ तेरी आछी सम्हनै पाप! ए म्हारै परमेशर, हाम्हैं लागै ताह छ़ाडी बाल देअआ पूज़दै।”
बिधाता दैनअ इज़राईली लै इहअ ज़बाब, “मंऐं छ़ड़ैऊऐ तम्हैं मिसरी, अमोरी, अमोनी, पलिश्ती लोगा का! तेखअ हंतै तै तम्हैं सदोनी, अमोलकी अर माओनी1 लोगै खास्सै, तम्हैं पाई मुंह सेटा लेर-पकार, मंऐं कै तम्हैं तिन्नां का बच़ाऊऐ निं आथी? पर तज़ी बी लागै तम्हैं मुंह छ़ाडी होरी देअआ पूज़दै! तैही निं हुंह ऐबै तम्हां भिई बच़ाऊंदअ आथी। तिन्नां देअआ सेटा पाआ लेर-पकार ज़हा तम्हैं मना, आपणीं खरी दी करा तिन्नां का अरज़ कि तम्हां छ़ड़ैऊआ!”2
पर इज़राईली किई बिधाता सेटा एही अरज़, “हाम्हां का ज़ाण्हुंअ ऐबै कि हाम्हैं किअ घोर पाप, ज़िहअ तूह च़ाहा, हाम्हां लै कर तूह तिहअ, पर ज़ीबाण, आझ़ बच़ाऊ हाम्हां।” इज़राईली काढी आप्पू मांझ़ा का तिंयां पराऐ देअ-देबते मुहुर्ती पोर्ही, संघा लागै बिधाते च़ाकरी करदै। बिधाता फिरी इज़राईले खरी भाल़ी तिन्नां लै झींण।
अमोनी लोग हुऐ इज़राईली संघै जुधा लै कठा संघा पाऐ तिन्नैं गलाद आपणैं डेरै। इज़राईली बी हुऐ सोभ कठा अर तिन्नैं पाऐ मिज़पा नगरी आपणैं डेरै। गलाद बस्सै दै इज़राईली अर तिन्नें सैणैं लागै आप्पू मांझ़ै एही गल्ला करदै, “अमोनी संघै मकाबलै लै इज़राईली मांझ़ै सोभी का आजू कहा डेऊणअ? सह ई हणअ बादा का सारै गलाद मुल्खै सोभी प्रैंदै प्रधान।”
Source notes (2)
- Footnote माओनी दुजअ नाअं आसा मिद्यानी
- Cross-reference जेर. 11:12
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.