Kulvi Outer Seraji Bible
ज़ैहसू 16
कनान देशै एप्रैम अर पछ़मा बाखा मनिश्शे आधै गोत्रा लै बांड
कनान देशे दखणा बाखे सिऊंआं दी दैनी परच़ी पाई युसुफे खिंबा लै जरदण नदी जेरिहो नगरी नेल़ पुर्बा बाखे छ़ोआ पोर्ही दखण रेगीस्ताना तैणीं। जेरिहो नगरी का धारा बाखे मुल्खा बाती बेतेल तैणीं। बेतेल ज़ुंण लूज नगरी आसा, तिधा का डेऊई तिन्नें सिअं अतारोत नगरी तैणीं तेऊ मुल्खा बाती ज़िधी अरेकी लोग तै बस्सै दै। पछ़मा बाखा होथी तिन्नें सिअं तेऊ मुल्खा बाती ज़ेथ जपलेती लोग तै बस्सै दै, निऊल़ै बेथ-हारोन सिऊंआं बाती गज़ेर नगरी तैणीं मांझ़ समुंदरे बाढै हुई खतम।
जरदण पछ़मा बाखा कनान देशे एतरी ज़ैगे मालक हुऐ युसुफे खिंबा का एप्रैम अर मनिश्शे गोत्रा मांझ़ै आधै लोग।
एप्रैम गोत्रा लै बांड
ज़ुंण ज़ैगा एप्रैम गोत्रे बांडै आई, तेते सिअं हुई पुर्बा बाखा का शुरू करी अत्रोदार नगरी बाती उझलै बेथ-हारोन तैणीं अर पछ़मा बाखा मांझ़ समुंदरा तैणीं। उतरा बाखा रही तिन्नें सिअं मिकमतात नगरी अर तिधा का फिरी पुर्बा बाखा तानतशीला नगरी तैणीं अर तेस्सी बाती पुजी आनोह तैणीं। आनोहा का डेऊई तिन्नें सिअं अतारोत संघा होथी उंधै नारा जेरिहो नगरी नेल़ा बाती हुई जरदण नदीए बाढै खतम। तेखअ फिरी सह ई सिअं तपूहा नगरी का पछ़मा बाखा कानाह गाडा बाखा अर मांझ़ समुंदरा तैणीं। अह एतरी ज़ैगा दैनी एप्रैम गोत्रे बांडै कि तिंयां ऐहा सिऊंआं भितरी बस्से। एता संघै दैनी धख नगरी अर गराअं एप्रैम गोत्रे लोगा तेऊ मुल्खा का ज़ुंण मनिश्शे गोत्रे बांडै त आअ द। पर तिन्नैं निं गज़ेर नगरी बस्सै दै कनानी तेता पोर्ही काढै अर तिंयां आसा आझ़ तैणीं बी एप्रैमी मांझ़ै बस्सै दै। पर तिंयां कनानी बणाऐं तिन्नैं आपणैं गलाम।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.