Kulvi Outer Seraji Bible
ज़ैहसू 15
यहूदा गोत्रा लै बांड
यहूदा गोत्रे सोभी टोली भेटी परच़ी पाई दखणा बाखा सीन रेगीस्तानै एदोम सिऊंआं तैणीं।
दखणा बाखा अह सिअं डेऊई खार समुंदरे दखणा बाखे पुंझ़ा पोर्ही दखणा ई बाखा अक्रबीम नाओंए कुआल़ी बाती सीन तैणीं। तिधा का डेऊई दखण कादेश-बर्ना बाती, हिस्रोन अर अदार नगरी बाती फिरी उझै कर्की नगरी बाखा लै। तिधा का डेऊई सिअं अज़मोन नगरी बाती नाल़ो-नाल़ मिसर देशे सिऊंआं दी मांझ़ समुंदरा तैणीं। तिधी हुई यहूदा गोत्रे मुल्खे दखणा बाखा सिअं खतम।
पुर्बा बाखा सिअं हुई खार समुंदरा ई का शुरू अर उतर दिशा बाखे सिअं हुई जरदण नदीए मोहरे आल़ी का शुरू
अर तिधा का डेऊई बेथ ओगल़ी बाती उझै बेथ-अराबा उतरा दिशा बाखा उखल़ी बोहन 1नाओंए पात्थरा तैणीं। अह सिअं डेऊई आजू आकोर नाओंए खागा पोर्ही दबीर तैणीं अर फिरी उतर दिशा बाती गिलगाल बाखा ज़ुंण तेऊ खागै दखण बाखा सऊंऐं मुल्खै अदुमीम कुआल़ी सम्हनै आसा। तिधा का डेऊई आजू अनेशमेश नाओंए सोबल़ा बाती अनरोगल़ तैणीं। तिधा का डेऊई सह सिअं हिनोम खागा बाती दखणा बाखे धारा तैणीं एरुशलेम नगरी ज़िधी जबेशी तै बस्सै दै। तिधा आजू डेऊई सह सिअं दखणा बाखे हिनोम धारे च़ुंडी बाती रपाई खागे उतरा बाखा च़ुंडी तैणीं। तिधा का डेऊई तिन्नें सिअं एप्रोन धारे नगरी नेल़ नपतूह सोबल़ा तैणीं। तिधा का फिरी बाला बाखा लै ज़ेता लै किर्यात-ज़रीम बी बोला। बाला का फिरी सिअं पछ़मा बाखा लै सेईर धारा तैणीं, संघा जारीम धारे ज़ेता लै कसलोन बी बोला, उतरा बाखे पुंझ़ा बाती उंधै बेथ-शमेश तैणीं अर तिधा का डेऊई तिम्ना बाती। तिधा का डेऊई सिअं धारो-धार अक्रोन नगरी उतरा बाती शिकरोन नगरी तैणीं अर तिधा का फिरी बाला धारा बाती जबनेल नगरी बाखा मांझ़ समुंदरे बाढै तैणीं। पछ़मा बाखे सिऊंओ पुंझ़ बी हुअ मांझ़ समुंदरे बाढा का शुरू अर कनान देशै ज़ुंण यहूदा गोत्रे बांडै आअ तिंयां बस्सै इना सिऊंआं भितरी।
कालेबै गिम्मी हेब्रोन अर दबीर नगरी
(पांच़ 1:11-15)
ज़िहअ बिधाता हुकम त किअ द, तेते साबै दैनी ज़ैहसू यपुन्नें शोहरू कालेबा लै यहूदा गोत्रे हेस्सै आई दी ज़ैगा मांझ़ै किर्यात-अराबा नगरी ज़ेता लै हेब्रोन बोला, अराब त अनाको बाब। कालेबै काढै तिधा का शेशै, आहीमान अर तलमाई नाओंए अनाके चिही शोहरूए खिंब दरल़ाऊई। तिधा का डेऊअ कालेब दबीर नगरी लै संघा पल़ै तिन्नां मारदै चुटी। दबीर नगरीओ पराणअ नाअं थिअ किर्यात-सेपर। तिधी डाहअ कालेबै आपणैं लोगा लै इहअ बोली, “ज़ुंण किर्यात-सेपर नगरी ज़िती तेथ कबज़अ करना लै सफल होए, तेऊ संघै करनअ मुंह आपणीं शोहरी अकसो बैह।” अह काम किअ कालेबे कान्हैं भाई कनजीए शोहरू ओतनिएलै पूरअ अर तेऊ किअ तैहा सारी नगरी कबज़अ। संघा किअ कालेबै आपणीं शोहरी अकसो बैह तेऊ संघै। बैहे धैल़ी ज़ांऊं अकसा तिन्नें रबाज़े साबै ओतनिएला सेटा आई, तेऊ डाही सह शगरेऊई कि तूह मांग आपणैं बाबा का धख ज़िम्मीं। सह होथी आपणैं गाधे शुंआरी का उंधै अर तेसे बाब कालेबै पुछ़अ तैहा का, “ऐबै किज़ै बोला तूह?” तैहा बोलअ आपणैं बाबा लै इहअ, “बाबा ज़ुंण तंऐं दखण रेगीस्तानै ज़ैगा दैनी, तेथ संघै लोल़ी तै मुंह पाणींए कुहै बी।” कालेबै दैनै हेब्रोन नगरी नेल़ उझलै अर उंधलै कुहै तैहा लै।
यहूदा गोत्रा लै नगरी
यहूदा गोत्रे बांडै ज़ुंण नगरी तिन्नें खिंब अर टोलीए साबै आई: कनान दखण रेगीस्ताने पुंझ़ा बाखा एदोमे सिऊंआं नेल़ बस्सी दी नगरी कबसेल, एदेर, आगूर, कीना, दमोना, अदादा, कादेश, हसोर, जितनान, जीप, तेलेम, बालोत, हासोर्हदत्ता, करियोसरोरन ज़ेता लै हसोर बी बोला, अमाम, शेमा, मोलदा, हसर्गदा, हेशमोन, बेथ-पलेत, हसर्शूआल़, बेर्शेबा, बिजोत्या, बाला, अईम, एसेम, एलतोलद, कसील, होर्मा, सकाल़ग, मदमन्ना, सनसन्ना, लबाओत, शिल्हीम, ऐन अर रिमोन। ईंयां नगरी ती पठी गणी करै णत्ती अर एता संघे गराअं तै लाऊआ।
ज़ुंण नगरी सऊंऐं मुल्खै पछ़मा बाखा थिई, तिंयां ती अशतोल, सोरा, अशना, जानोह, एनगनीम, तपूह, एनीम, अर्मूत, अदुलाम, सोको, अज़ेका, शारेम, अदीतैम, गदेरा ज़हा लै गदरतैम बी बोला। ईंयां नगरी ती पठी गणी करै च़ौदा अर इना संघै गराअं तै लाऊआ।
होर तै सनान, हदाशा, मिगदलगाद, दलान, मिज़पे, जोकथेल, लकीश, बोसकत, एगलोन, कबोन, लहमास, कितलीश
गदरोत, बेथ-दगोन, नामाह, अर मकेदा। ईंयां थिई सोल़ा नगरी अर एता संघै गराअं थिऐ लाऊआ।
होर ती लिब्ना, एतेर, आशान,
इप्ताह, अशना, नसीब,
केलाह, अकज़ीब अर मारेशा ईंयां ती नौ नगरी अर इना संघै गराअं तै लाऊआ।
अक्रोन मुल्ख बी त तेते सारी नगरी अर गराऊंआं संघी,
अशदोद नेल़ पठी नगरी अर गराअं तै अक्रोन पोर्ही मांझ़ समुंदरा तैणीं।
अशदोद अर गाज़ा, बी थिऐ तेते नगरी अर सोभी गराऊंआं संघी मिसर देशे सिऊंआं गाडा ओर्ही मांझ़ समुंदर दरैऊए बाढै तैणीं।
धारा बाखे मुल्खै थिऐ शामीर, जतीर, सोको,
दन्ना, किर्यत्सन्ना ज़ेता लै दबीर बी बोला,
अनाब, एश्तमो, आनीम,
गोशेन, होलोन अर गीलो। ईंयां ती गैरा नगरी अर एते गराअं थिऐ लाऊआ।
तेखअ त अराब, दूमा, एशान,
यानीम, बेथ-तपूह, अपेका,
हुमता, किर्यात-अराबा ज़ेता लै हेब्रोन बी बोला, अर सिओर। ईंयां ती नौ नगरी अर इना का लाऊआ तै इना नगरीए होर गराअं बी।
होर ती मिऊन, कर्मेल, जीप, युता,
जज्रेल, जोकदीम, जानोह,
कैन, गिबा, अर तिम्ना नगरी। ईंयां ती दस नगरी अर इना का लाऊआ तै इना नगरीए होर गराअं बी।
होर ती हलहूल, बेथ-सूर, गदोर,
मरात, बेथ-नाथ अर एलतकोन। ईंयां ती छ़ह: नगरी अर इना का लाऊआ तै इना नगरीए होर गराअं बी।
इना संघै ती किर्यातबाल ज़ेता लै किर्यात-ज़रीम बी बोला अर रबाह, ईंयां ती दूई नगरी अर इना का लाऊआ तै इना नगरीए होर गराअं बी।
रेगीस्ताने बस्सी दी नगरी थिई बेथ-अराबा, मिद्दीन, सकाका,
निबशान, लूंणे नगरी अर एनगादी, ईंयां ती छ़ह: नगरी अर इना का लाऊआ तै इना नगरीए होर गराअं बी।
ज़ुंण जबेशी ज़ातीए लोग एरुशलेम नगरी तै बस्सै दै, तिन्नां निं यहूदी पोर्ही काढी सकै, तैही आसा जबेशी एरुशलेम नगरी आझ़ तैणीं बी यहूदी संघै रहंदै लागै दै। 2
Source notes (2)
- Footnote बोहन बोहन थिअ रूबेनो शोहरू, तेऊए नाओंऐं थिअ अह पात्थर
- Cross-reference 2 शमू. 5:6
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.