Kulvi Outer Seraji Bible
जोएल 2
ईंयां रैट्टै आसा चतैनगी
सियोन धारा बाज़ा नर्शिंगै!
पबित्र धारा बस्सै दै मणछा लै दैआ चतैनगी!
यहूदा मुल्खै बस्सै दै सोभी लोगा लोल़ी दर्छ़णअ छ़ुटअ,
किल्हैकि बिधाते धैल़ी आई नेल़, सह धैल़ी गई पुजी।
तैहा धैल़ी हणअ नटिप्प न्हैरअ!
तैहा धैल़ी घोर्हनै घणैं काल़ै बादल़।
एक बडी सैना एछणी, तिन्नां करै हणीं धार भरी,
ज़िहअ दोत्ती धुप्पअ धारा छिंघिआ।
एतरी खास्सी सैना निं पैहलकै ज़मानै बी कधि भाल़ी अर
नां आजू एछणैं आल़ी कोही पोस्ती दी कधू हणीं।
तिन्नैं पाऐ आगी ज़िहै डाल़ी-बुटी खाई।
तिन्नां आजू आसा ज़ैगा अदने बागा ज़ेही अर
तिन्नां पिछ़ू हआ सह ज़ैगा उज़र रेगीस्ताना ज़ेही।
तेथ निं तिन्नां का किछ़ छ़ुटदअ।
तिंयां शुझिआ घोल़ै ज़िहै अर
तिंयां ठुर्हा जुधे घोल़ै ज़िहै छ़ेक्कै।1
धारा तिन्नें छ़ाहल़ा दैणें छ़ेल़ ज़ाण्हिंआं खास्सै रथा घुर्हनै ज़ेही,
अर आगीए बडै कूंडा दी चटराल़्हदी झ़ुका ज़ेही।
तिंयां ज़ाण्हिंआं बडी भारी खास्सी सैना ज़िहै ज़ुंण जुधा लै हआ तैर्हुई दी।
ज़हा बी देशा का तिंयां शुझिआ, तिन्नां छ़ुटा दर्छ़णअ,
सोभिए मुंह फिरा तिन्नां भाल़ी न्हैरै!
तिंयां पल़ा जोधै ज़िहै चुटी, अर सपाही ज़िहै उखल़ा तिंयां गहल़ा प्रैंदा लै।
तिंयां रहा एकी लगैगा दी हांढदै लागी।
तिंयां निं आपणीं लगैगा छ़ाडी ओर्ही-पोर्ही डेऊंदै अर
नां तिंयां एकी-दुजै लै धाक्कअ दैंदै।
तिंयां रहा सोभ आज़रै हांढदै लागी।
तिन्नां आजू ज़ै किज़ै शस्त्र बी डाहे,
तज़ी बी रहा तिंयां एकी लगैगा दी आज़रै हांढदै लागी।
नगरी दी पल़ा तिंयां सारै दी चुटी।
तिंयां ठुर्हा गहल़े दुआली प्रैंदै,
तिंयां उखल़ा उझै घअरे भित्ती बाती संघा डेओआ
च़ोरा-डाकू ज़िहै ताकि बाती भितरा लै।
तिन्नां आजू हआ धरती दी ज़ाज़री,
सुरज़ अर ज़ोथ फिरा न्हैरी अर तारे च़मक मुक्का पठी।2
बिधाता दैआ आजू का आपणीं सैना लै हुकम ज़ेही गुल़ूबिज़ल़ूए छ़ेल़ हआ।
सैना ज़ुंण बिधातो हुकम मना, तिंयां आसा एतरी खास्सी ज़ेता कुंण गणी निं सकदअ।
बिधाते सह धैल़ी भाल़ा केही बलबान अर डरैऊंणी हणीं।
तैहा धैल़ी निं कोह ज़िरी सकदअ।3
बिधाता करा झींण
बिधाता बोला इहअ, ‘ब्रतू रही, लेरा लांदी अर
शोग करदी फिरा मुंह सेटा लै तत्त दिला का बापस।
सिधै घेरीए झिकल़ै धेल़ी निं दुख रहैऊंदै लागा,
मुखा लोल़ी शुझुअ कि तम्हैं आसा दिला का दुखी।’
आपणैं परमेशर बिधाता बाखा फिरा!
सह आसा खास्सअ झ़ूरनै अर झींण करनै आल़अ।
सह करा सबर अर आपणीं ज़बान करा सह पूरी।
सह निं झ़ट च़ारै रोश्श करदअ, हाम्हां लै आफ़त पल़दी भाल़ी हआ सह बी दुखी।
झ़ाणीं बिधाता माल़ी च़ेती हेरे अर आपणीं सोठ बदल़े अर
तम्हां लै खास्सी बर्गत दैए?
तेखअ सका तम्हैं तेऊ लै नाज़ो हूम करी अर अर्घअ दैई।
सियोन धारा बाज़ा नर्शिंगै, सोभी लोगा लै बोला ब्रतू रहा,
सोभै करा आपणीं शुधी संघा करा बिधाता सेटा झाल़अ!
सारी परज़ो करा झाल़अ,
तिन्नां सोभिए करा पबित्र सभा करना लै शुधी।
सोभी सैणैं शादा, सोभी शोहरू माठै बी शादा अर
च़ूई झुटणैं आल़ै लान्हैं बी आणा शादी।
सोभी मर्धा-बेटल़ी आणा तिन्नें घअरा का शादी
च़ाऐ ज़सरअ बैह एभै पै होए हुअ द, तिंयां बी एछा सोभ आपणैं घअरा का।
प्रोहत ज़ुंण भबने प्रऊल़ी अर बेदी मांझ़ै खल़्हुई बिधाते च़ाकरी करा,
तिंयां लाऐ ज़रूर लेरा संघा करै एही अरज़,
‘बिधाता, हाम्हां तेरी परज़ा लै कर झींण!
हाम्हां निं होरी देशा जैंदरी हास्सणां अर सुहांगा लै दैई हणैं कि तिंयां हाम्हां लै बोले,
“थारअ परमेशर आसा किधी?”’
बिधाता दैआ ज़ैगा-ज़िम्मीं लै भिई बर्गत
तेखअ दैणअ बिधाता आपणीं ज़ैगा लै धैन
अर तेऊ करनी आपणीं परज़ा लै झींण।
बिधाता दैणअ आपणीं परज़ा लै ज़बाब अर तेऊ बोल़णअ इहअ,
‘ऐबै लाई मंऐं तम्हां लै नाज़, दाखे रस अर जैतूने तेले एही खास्सी बर्गत दैई कि
तम्हैं दैणैं मुंह तेता करै रज़ैऊई।
ऐबै निं आजू तम्हैं होरी देशा जैंदरी कधि शर्मिंदै हणैं।
उतर दिशा बाखा आऐ दै रैट्टे सैना करनी मुंह तम्हां सेटा का दूर,
तिंयां दरल़ाऊंणै मुंह शुक्कै अर शुन्नैं रेगीस्ताना लै,
तिन्नों आगलअ दल डबेऊंणअ मुंह खार समुंदरै अर
पिछ़लअ दल डबेऊंणअ मुंह मांझ़ समुंदरै।
तिन्नें ल्हासा का लागणीं बास्स-शल़ैन्ह,
किल्हैकि मंऐं बिधाता किऐ बडै महान काम!
मेरअ देश! तूह निं डरी आथी, तूह मनाऊं खुशी अर नंद,
ज़ुंण मंऐं बिधाता महान काम किऐ, तेता लै रह तूह निहंचै।
बणें ज़ीबो, तम्हैं बी निं डरी आथी।
घैहणीं जाणअ हरअ घाह लागी,
डाल़ा-बूटा दी जाणै फल़ लागी,
दाख अर फेडू हणैं बतेर्है।
सियोन बस्सै दै लोगो, तम्हैं हआ तेता लै खुश
ज़ुंण तम्हां लै मंऐं थारै परमेशर बिधाता किअ।
मंऐं बरशाऊअ तम्हां लै ज़ेतरअ लोल़ी तेतरअ पाणीं।
मंऐं दैनअ पैहलै ज़िहअ हिंऊंद अर भराल़ हणैं।
थारी ताटी हणीं नाज़ा करै भरी,
दाखे रसा अर जैतूने तेला करै रहणीं कोफरी टिरा बहूंदी।
ज़ेतरी साला मेरी डैअ दैणैं आल़ी, पटिक्कल़ै दैणैं आल़ी,
करोप्पी अर च़लोऊई करै खाणैं आल़ी मेरी रैट्टे सैना थारी साल-फसल खाई,
सह दैणीं मुंह तम्हां लै दुगणीं बापस।
ऐबै हणीं तम्हां का ज़िणस बतेर्ही अर रज्ज़ी खाणां लै।
तम्हां करनअ मेरअ आपणैं परमेशर बिधातो शूकर अर ज़ै-ज़ैकार
ज़ुंणी तम्हां लै नुआहरै काम किऐ।
ऐबै निं मेरी परज़ा कधि बेइज़त हणीं।
तेखअ लागणअ तम्हां इज़राईली का थोघ कि हुंह आसा तम्हां जैंदरी,
हुंह आसा बिधाता अर हुंह ई आसा परमेशर
अर मुखा सुआई निं होर कोह आथी।
तेखअ निं मेरी परज़ा कधि बेइज़त हणीं।
बिधाते धैल़ी
इना गल्ला हणैं बाद दैणीं मुंह आपणीं आत्मां सोभी लै,
थारै शोहरू-शोहरी करनी मेरी गल्ला प्रगट,
थारै प्रोढै मणछा हणैं सुपनै
अर ज़ुआन मणछा हणैं धैन।
तेऊ ज़मानै ज़ुंण दास अर दासी बी होए,
तिन्नां लै बी दैणीं मुंह आपणीं आत्मां।
सरगै अर धरती दी करनै मुंह चतैनगी दैणा लै च़मत्कार,
मुंह छ़ाडणैं लोहू, आग अर धूँए बादल़।
ज़ेभै मुंह बिधाते सह महान अर डरैऊंणी धैल़ी एछणी,
सुरज़ फिरनअ न्हैरअ अर ज़ोथ हणीं लोहू ज़ेही लाल।5
तेभै ज़ुंण बी मुंह बिधाता का मज़त मांगे, सह जाणअ बच़ी,
ज़िहअ मंऐं बिधाता आसा बोलअ द कि
एरुशलेम नगरी का जाणैं थोल़ै बच़ी,
ज़ुंण मंऐं आसा छ़ांटै दै, तिंयां रहणैं ज़िऊंदै।’”6
Source notes (6)
- Cross-reference प्रका. 9:7-9
- Cross-reference प्रका. 8:12
- Cross-reference प्रका. 6:17
- Cross-reference शधा. 2:17-21
- Cross-reference मोत्त. 24:29; मार्क. 13:24,25; लूक. 21:25; प्रका. 6:12,13
- Cross-reference रोम. 10:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.