जोएल

जोएल

जोएल गूरै खोज़ी दी गल्‍ला

भेत

लिखणैं आल़अ: जोएल

सन: 835 का 600 ईसा आजी

जोएल थिअ बिधातो गूर। तेऊए बारै निं खास्सअ थोघ आथी। जोएल खोज़ा आप्पै कि सह आसा पतूएलो शोहरू अर तेऊ खोज़अ यहूदा मुल्खे परज़ा लै कि तिन्‍नां लै आजू किज़ै हणअ। ऐहा कताबा दी लागा हाम्हां का थोघ कि जोएल गूरा आसा एरुशलेम नगरीओ खास्सअ फिकर, तेऊ आसा बिधाते भबनै च़ाकरी करनै आल़ै प्रोहते बारै बी गल्‍ला खोज़ी दी, तेता का लागा थोघ कि सह त बिधाते भबने च़ाकरी करने बिधी-बधानो बी खास्सअ ज़ाणकार।

तेऊ ज़मानै त फारसी राज़। तेऊ ज़मानै छ़ाडै तै फारसी राज़ै थोल़ै यहूदी तिन्‍नें देशा लै बापस अर एरुशलेम हेरअ त बिधातो भबन भिई च़िणीं अर जोएल गूर बी ज़ाणा त बिधाते भबने बारै पठी।

जोएल गूरा का शुझुअ सुपनै कि इज़राईल मुल्खै भर्हुऐ सारै दी रैट्टै ई रैट्टै अर तिन्‍नैं किई साल-फसल पठी बरैबाद। तिन्‍नां रैट्टैओ मतलब त इहअ कि आजू करनअ दुशमण सैना इज़राईल देशै बनाश। पर अह निं खास्सी बडी गल्‍ल आथी ती, एता का बडी गल्‍ल थिई एही कि तैहा धैल़ी किज़ै हणअ ज़ेभै बिधाता नसाफ करनअ। तेभै लागणअ सोभी देशा बिधाता सेटा खल़ै हणअ अर ज़ुंण बी तिन्‍नें लोगै किअ तेतो फल भुगतणअ। ज़ुंण दोशी निखल़े, तिन्‍नां भेटणीं घोर सज़ा।

“फैंसलै करने खागै आसा हज़ारो-लाखों लोग झाल़्हुऐ दै! तिंयां आसा तिधी आऐ दै कि सह धैल़ी गई एछी ज़ेभै बिधाता नसाफ करनअ। तेभै फिरनअ सुरज़ अर ज़ोथ न्हैरै, अर तारै दी निं किछ़ च़मक रहणीं। बिधाता पाणीं सियोन धारा का क्रुंगा, एरुशलेम नगरी का शुण्हनै तेऊए बोल गुल़ूबिज़ल़ू ज़िहै। तेता करै हणीं सारै भ्रमंडै ज़ाज़री, पर बिधाता करनी आपणीं परज़े फाज़त, सह हणअ तिन्‍नां लै उछ़टै गहल़ा ज़िहअ ज़ेथ पिछ़ू इज़राईली शरण लआ।”

(3:14-16)

कताबे बांड

रैट्टै अर दुशमणे सैना 1:1—2:17

बिधाता दैणीं आपणीं परज़ा लै बर्गत 2:18-32

बिधाता दैणी सोभी देशा लै सज़ा 3:1-21