Kulvi Outer Seraji Bible
आयूब 8
बिल्दाद लागअ झेठी करदअ
शूही मुल्खो बिल्दाद लागअ आयूबा लै इहअ बोल्दअ,
“तेरी निं गल्ला ई मुक्कदी!
तेरी गल्ला आसा ढिश-बागरी ज़ेही!
ज़हा परमेशरा का सारअ बल आसा तेऊ का कै नसाफ आथी निं?
तेऊए ज़ाणैं कै बूरअ हई सका?
तेरै शोहरू-माठै किअ हणअ ज़रूर किज़ै पाप,
तैही दैनी परमेशरै तिन्नां लै सज़ा, ज़ुंण तिन्नां भेटणीं ती।
पर ज़ै तूह आझ़ परमेशरा का प्राथणां करे,
बिधाता ज़हा का सारअ बल आसा, ज़ै तूह तेऊ सेटा लेर-पकार पाई अरज़ करे,
ज़ै तूह मानदार अर शुचअ आसा,
तै जाणअ परमेशर तेरी मज़त करना लै एछी,
तै हेरनअ तेऊ तूह बच़ाऊई अर
तेखअ हणअ तेरअ घअर-बण भिई ज़िहअ कै तिहअ।
आजू हणीं तेरी ज़िन्दगी होर बी सफल,
ज़ुंण ताखा थिअ, सह निं तेता सेटा किछ़ बी आथी ज़ुंण आजू ताल्है परमेशरा दैणअ।
म्हारै दाद-बाब तै अक्ली आल़ै
धख शिखल़ आपणैं दादा-बाबा का,
तिन्नां भाल़ केही अक्ल थिई।
हाम्हैं निं तिन्नां सेटा किछ़ बी आथी
अर म्हारी अमर आसा ई केतरी!
पृथूई का डेओआ हाम्हैं छ़ैल्ली ज़िहै।
दादा-बाबा का भेटणीं ताह राम्बल़ी शिक्षा,
तिन्नें गल्लो कर बच़ार कि तिन्नैं किज़ै आसा बोलअ द,
‘कछैरो घाह निं पणैल्ही ज़ैगा छ़ाडी होर्ती लागदअ,
नां नगाल़ै प्राल़ी ज़ैगा बझ़दी ज़िधी शुक्कअ होए।
ज़ै पाणीं शुक्के, तिंयां जाआ सोभी घाह का बी आजी शुक्की,
च़ाऐ तिंयां अज़ी काटणा लै बी निं हुऐ होए।’
ज़ुंण परमेशरा बिस्सरी पाआ तिन्नें हालत बी हआ एही ई।
इहै पापी मणछे हआ आशा ई खतम।
ज़ेथ तिंयां भरोस्सअ करा,
सह हआ तिन्नां लै जांगूए जगोल्हा ज़िहअ।
सह च़ाऐ तेथ ज़ेतरअ बी नील़ लाए, सह निं पाक्कअ आथी,
अर सह तेता ज़िहअ बी पिड्डअ ढाकी डाहे, सह निं टेक्कदअ आथी।
कदुष्ट मणछ हआ प्राल़ी ज़ैगा लागी दी एही बेला ज़िहअ,
ज़हा धुप्पअ अर पाणीं पुगतअ भेटा,
सह बेल सल्ला सारी बागा सारै दी।
तेते ज़लैल़ै शाचा कोडी-बिल्ला
द्रटा अर पात्थरे रूल़ा दी पाक्कै।
पर ज़ांऊं तिन्नां पोर्ही पेच़ा, तेखअ निं कोही का इहअ थोघ रहंदअ
कि एथ बी थिअ होए किज़ै इहअ लागअ द।
इधी हआ तेते ज़िन्दगी खतम अर
तेते ज़ैगा लागा तेखअ किज़ै होर घाह! कदुष्ट मणछे बी हआ एही ई दशा।
पर नर्दोश मणछा निं परमेशर शोटी डाहंदअ अर
नां सह तेऊ छ़ाडी कदुष्ट मणछे मज़त करदअ।
तेऊ सका अज़ी बी ताल्है खुश हणैंओ मोक्कअ दैई,
अर तेरै होठा का निखल़णैं ज़ै-ज़ैकारे बोल।
पर ज़ुंण ताह संघै ज़ीद डाहा, तिंयां हणैं शर्मिंदै,
अर कदुष्ट मणछे डेरै हणैं सदा लै बरैबाद।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.