Kulvi Outer Seraji Bible
आयूब 7
ज़िऊंणअ इहअ कठण किल्है आसा
“मणछे ज़िन्दगी आसा बेघै कठण
हाम्हां लागा मज़दूरा ज़ेही ज़ोरा-ज़ोरी मैन्थ करनी,1
हाम्हैं आसा चटाक्क धुप्पै दी कामां करदै गलामा ज़िहै
ज़ुंण छ़ैल्ली लोल़ै हआ लागै दै अर
हाम्हैं आसा मज़दूरा ज़िहै ज़ुंण आपणीं मज़दूरी न्हैल़ै रहा लागी।
हुंह बी आसा भिन्नैं दर भिन्नैं थोघै बाझ़ी ज़िऊंदअ लागअ द,
राची का बाद राची एछा मुल्है शोग ई।
च़ैन्नै सुत्ती करा हुंह एही अरज़ कि राच लोल़ी ती छ़ेक्कै भैई,
पर सह ज़ाण्हिंआं मुखा होर बी लाम्मी,
सारी राची रहा हुंह पाशल़ी बधल़दअ न्हैल़अ लागी कि राच केभै भैणीं।
मेरी सारी घेरी आसा फिमशी, दुखणैं अर किल़ै पल़ै दै,
दुखणैं का आसा पाक लागअ द निटरदअ।2
ज़ेतरअ छ़ेक्कै राछ़े नल़पी दी भरअ द धाग्गअ मुक्का, तेता का छ़ेक्कै आसा मेरै धैल़ै लागै दै बितदै,
मेरै धैल़ै रहा बितदै लागी अर मेरी आशा बी रहा चुटदी लागी।
बिस्सरी निं आथी!
हे परमेशर, तूह निं बिस्सरी आथी,
मेरी ज़िन्दगी आसा बागरीए झ़लारै ज़ेही,
ऐबै निं मुंह आजू खुशी भाल़णीं भेटणीं।
हुंह हणअ ऐबै सोभिए आछी का दूर,
हुंह निं आजू कोही का शुझणअ,
ताखा बी निं हुंह शुझुई च़ाल्लअ।
ज़िहअ हांढदअ बादल़ निखल़ी लुक्का,
तिहै निं हाम्हैं मणछ बी मरी करै भिई फिरी एछदै।
तेखअ निं हाम्हैं कोही लाऐ आद डाही।
तैही निं हुंह ऐबै च़ुप्पी च़ाल्लअ रही,
मुंह खोज़णअ आपणैं दिलो दुख खुल्ही करै,
मुंह आसा भितरी बुआल़ लागै दै अर मुंह लणअ बोली।
तंऐं किल्है आसा मुल्है इहअ पहरअ पाअ द?
हुंह कै समुंदर आसा कि समुंदरो बडअ ज़ीब आसा?
ज़ेभै बी हुंह इहअ सोठा कि मुंह सुत्तणअ निंजा,
च़ैन्नै सुत्ती झ़ाणीं मुंह मेरी दाह का राम जाए भेटी,
तेभै पै डरैऊआ तूह मुंह
डरैऊंणै सुपनै रहैऊ करै!
होर ता होर, मेरअ शाह बोला केभै फांसी दैणा लै,
ऐहा दाह ज़िरनै का आसा मरनअ भलअ।
मुंह हुई आपणीं ज़िन्दगी का नफरत मेरअ निं ज़िऊंणेंओ शाह ई करदअ।
मुंह छ़ाडा कल्ही, मेरी आसा ज़िन्दगी ई बृथा।
ताह कै ज़रुरत आसा मणछे,
कि ताह लागा म्हारै बारै खास्सअ सोठणअ?
तूह करा मणछे ज़ाच़-भाल़ धैल़ अर
हर घल़ी रहा तूह हाम्हां परखदअ लागी।
तूह आसा कबल्लअ मुंह भाल़अ लागअ द,
तूह निस्सअ मुल्है थिह घुटणेंओ बगत बी दैई।
ज़ै मंऐं पाप बी किअ होए, तैबी बी निं मंऐं तेरअ किछ़ै बूरअ किअ,
हे मणछे पहरै करनै आल़ैआ,
तेरी नदर किल्है आसा सिधी मुल्है लागी दी,
हुंह कै ताल्है खास्सअ बोझ़ आसा।
तूह मेरै पाप माफ अर मेरअ कशूर दूर किल्है निं करदअ?
ऐबै जाणअ हुंह तेतरी मरी,
तेखअ निं हुंह ताह लोल़ी करै बी भेटी च़ाल्लअ।”
Source notes (2)
- Cross-reference आयू. 15:5; 13; 14
- Cross-reference ईशा. 14:11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.