Kulvi Outer Seraji Bible
आयूब 32
एलीहू बोलअ इहअ
तेखअ छ़ुटी एलीपज, बिल्दाद अर सोपरा का छ़ाड़ अर तिन्नैं निं आयूबा लै ज़बाब दैणें कोशिश किई किल्हैकि आयूब त निहंचै कि सह आसा पठी नर्दोश।
तिधी त बारकेलो1 शोहरू एलीहू2 ज़ुंण बूज़ खिंबा का रामे3 टोली का थिअ। तेऊए निं रोश्श ज़िर्हुऐ, किल्हैकि आयूबै लाई सारी गलती परमेशरा लै अर आप्पू फिरअ पठी नर्दोश। आयूबे तिन्नां चिई साथी लै बी आई तेऊ खास्सी रोश्शै, किल्हैकि तिंयां निं आयूबा लै ज़बाब दैई बोल़ै, तिहअ करै लागी परमेशरा लै गलती। किल्हैकि एलीहू त तिन्नां चिई का अमरा होछ़अ, सह थिअ न्हैल़अ लागअ द कि आयूब लोल़ी सोभै गल्ला करी मुक्कअ। ज़ांऊं एलीहू भाल़अ कि तिंयां चिही निस्सी आयूबा लै समझ़ पल़ी कि किज़ै ज़बाब दैणअ, तेऊ आई रोश्शै संघा लागअ बारकेलो एलीहू इहअ बोल्दअ,
एलीहू
“तम्हैं आसा प्रोढै अर हुंह आसा तम्हां का
अमरा खास्सअ होछ़अ,
तैहा ल्हैज़ी निं मंऐं तम्हां का आजी आपणैं बच़ार खोज़ै।
हुंह सोठा त इहअ कि प्रोढै आदमी लागा गल्ला लै आजू डाहणैं
ताकि तिंयां होरी का अक्ल खोज़े।
पर मणछा दी आसा परमेशरे आत्मां आप्पै
परमेशर ज़हा का सारअ बल आसा तेऊओ शाह दैआ हाम्हां लै समझ़।
सिधअ बडी अमरे हई बी निं अक्ल एछदी अर
प्रोढै बी निं कई बारी नसाफ समझ़ी सकदै।
ऐबै शूणां तम्हैं मेरी,
हुंह खोज़ूं तम्हां का मेरी राऐ।
हुंह त थारी गल्ला राम्बल़ै करै शूणअ लागा द कि तम्हां केही गल्ला करनी,
हुंह त न्हैल़अ लागअ द कि तम्हां आयूबा लै किहअ ज़बाब दैणअ।
हुंह त राम्बल़ै करै शूणअ लागअ द,
पर तम्हां मांझ़ै निं एकी बी राम्बल़अ ज़बाब दैनअ,
ज़ुंण आयूबे गल्ला काटी सके!
तम्हैं किहअ करै सका बोली तम्हां गई अक्ल भेटी?
तेऊए गल्लो ज़बाब दैणअ परमेशरा आप्पै, तम्हैं निं आयूबा का गल्ला लै ज़िती बोल़ै।
आयूबै निं मुल्है किछ़ै बोलअ,
सह थिअ तम्हां लै लागअ द बोल्दअ,
पर हुंह निं एऊ लै तम्हां ज़िहअ ज़बाब दैंदअ।
आयूब, ऐबै निं इना चिही समझ़ पल़ी कि
ताल्है किज़ै ज़बाब दैणअ।
ऐबै आसा ईंयां च़ुप्पी खल़्हुऐ दै, हुंह कै न्हैल़अ रहूं लागी?
ईंयां ता ऐबै खाखा बैण निस्सै काढी?
मुंह लणअ ताल्है ज़बाब दैई खोज़ी कि हुंह कै सोठा।
मुखा आसा बोल़णा लै खास्सी गल्ला,
हुंह निं बोल़णैं बाझ़ी रही सकदअ।
मुंह आसा भितरा का बोल़णा लै बुआल़ लागै दै, ज़ै हुंह नांईं बोलूं,
हुंह च़ाल्लअ नऊंऐं दाखे रसा करै भरै दै पराणैं खाल्हल़ै ज़िहअ फुटी।
मुंह हुअ बोल़णअ ताकि मुंह शांती भेटे।
मुंह नां आपणीं गल्ला करै कहा मणछो पक्ष लणअ अर
नां मुंह कहा आर्ही सराहंदै लागणअ।
किल्हैकि मुंह निं च़ोपल़ लागी गल्ला करनी एछदी,
नांईं ता परमेशरा हेरनी ती मुल्है तेभी सज़ा दैई।”
Source notes (3)
- Footnote बारकेलो परमेशरै दैनी बर्गत
- Footnote एलीहू मतलब सह मेरअ परमेशर
- Footnote रामे मतलब बडअ, उछ़टअ
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.