Kulvi Outer Seraji Bible
आयूब 31
मंऐं निं किछ़ै पाप-दोश किअ
“मंऐं आसा आपणीं आछी लै बी बधान डाहअ द कि मुंह निं कधि
च़ंदरी सोठ डाही कहा शोहरी भाल़ै लागणअ।
तेखअ मुंह परमेशरा का किज़ै फल च़ाल्लअ भेटी?
महान परमेशर ज़हा का सारअ बल आसा ज़ुंण स्वर्गै सोभी का उझै आसा, तेऊ म्हारै हेस्सै किज़ै दैणअ?
ज़ुंण पाप करा तिन्नां लै छ़ाडणीं तेऊ
आफ़त अर बरैबादी ई।
परमेशरा का हआ सोभी गल्लो थोघ कि हुंह किज़ै करा।
सह हआ मुंह गंईं-गंईं दी भाल़अ लागअ द।
हुंह खाआ सोह कि मंऐं निं कधि इहै कदुष्ट काम किऐ
नां मंऐं कहा लै कधू धोखअ किअ।
परमेशरै लोल़ी त हुंह धर्में तराकल़ी दी तोलअ
अर तेखअ हेरनअ तेऊ भाल़ी कि हुंह आसा नर्दोश।
ज़ै हुंह कधू उंबल़ी बाता डेऊअ होए,
ज़ै कधू मेरी आछी भाल़णैं करै मेरअ दिल तेता लै लोभणूंअ होए अर होर बी मुल्है किज़ै पाप करनैओ दोश होए,
तै लोल़ी मेरी साल-फसल बरैबाद हुई,
मेरी बऊई दी फसल लोल़ी कुंणी होरी खाई।
ज़ै हुंह मेरै साथी-संघीए लाल़ी लै लोभणूंअ होए अर
तैहा घअरै कल्ही रहणें मोक्कै न्हैल़अ लागअ होए,
तै लोल़ी मुल्है बी तिहअ ई हुअ अर
मेरी आपणीं बेटल़ी बी लोल़ी कुंणी पराऐ मणछै भ्रष्ट किई।
इहै घोर पापा पिछ़ू लोल़ी ज़रूर सज़ा भेटी।
कंज़रैई हणीं ती मुल्है एही आगी ज़ेही ज़ेता करै हुंह पठी बरैबाद सका त हई,
ज़ुंण मुखा आसा सह दझ़णअ त तेथ पठी।
ज़ेभै मेरै नोकर-च़ाकरै मुखा खरी खोज़ी होए अर
तेथ मंऐं तिन्नां लै नसाफ नांईं किअ होए,
तै ज़ेभै परमेशर मेरअ नसाफ करदअ एछे, तेभै कै करूं?
तेभै मुंह तेऊ लै किज़ै ज़बाब दैणअ?
सह ई परमेशर आसा सोभी लै एक्कै
ज़ुंणी हुंह अर मेरअ नोकर दुहै आसा बणाऐं दै।
मंऐं निं कोहै ठगै आथी
हुंह निं रैनै-गरीबे मज़त करनै का पिछ़ू हटअ आथी,
नां कहा बिधबा बेटल़ीए आशा चोल़ी।
नां मंऐं कधू इहअ किअ कि आप्पू खाई रोटी अर
छ़ुटै-मुक्कै दै लान्हैं आसा भुखै!
ज़धा ओर्ही हुंह ज़ाणदअ हुअ, तधा ओर्ही
करा हुंह बिधबा अर छ़ुटै मुक्कै दै मणछे हेर-सभाल़ ईजा-बाबा ज़ेही।
ज़ेभै बी मंऐं कुंण गरीब मणछ भाल़अ कि
सह निं आप्पू लै झिकल़ै बी लई सकदअ,
तिन्नां लै दैनै मंऐं नैत्तै झिकल़ै
ज़ुंण मंऐं आपणीं भेडे ऊना का हआ तै बणाऐं दै।
तिंयां मणछ बी करा तै दिला का मेरी सर्राफी।
हुंह निं दालता दी कधि छ़ुटै-मुक्कै दै लान्हैं च़िक्कदअ उझ़ुअ
कि पांच़ बी आसा मेरै पक्षा लै।
तै लोल़ी मेरी बाह चुटी अर
सह लोल़ी घंफरा का धरनीं अल़ी।
हुंह डरा परमेशरे सज़ा का,
इहै काम निं हुंह कधि करी ई सकदअ त।
हुंह निं कधि सुन्नैं-च़ंदीए आसरै रहंदअ त,
नां मुंह आपणैं सेठ हणैंओ घमंड आथी त कि
मुखा आसा खास्सी ज़ैदात।
मंऐं निं कधि सरगै सुरज़ अर
ज़ोथा भाल़ी तेते पूज़ा किई।
ज़ै हुंह इहअ करदअ, तै लोल़ी ती मुंह एते सज़ा भेटी,
किल्हैकि एतो मतलब हुअ इहअ कि
मंऐं छ़ाडअ परम प्रधान परमेशरो अदर करनअ।
हुंह निं कधू आपणैं दुशमणे बरैबादी लै बी खुश हुअ,
नां हुंह कधू तिन्नां लै आफ़त पल़ी भाल़ी राज्ज़ी हुअ।
नां मंऐं इहअ पाप किअ कि
मंऐं बाही बिधाता सेटा एही कारी कि तिंयां लोल़ी मूंऐं।
मेरै काम करनै आसा सोभ ऐहा गल्ले शाजत कि
मेरै घअरा का निं कोहै मणछ भुखअ डेऊअ आथी।
हांढदै-फिरदै पाखलै मणछ बी आणै मंऐं आपणैं घअरा लै ताकि
तिन्नां बागै शेल़ै-ठांढै निं पल़े रहणअ।
मंऐं निं होरी आदमी ज़िहअ किअ, ज़ुंण पाप करी टवारअ करा।
हुंह निं कधि डरअ कि लोगा किज़ै बोल़णअ,
हुंह निं पांडा भितरी च़ुप्पी बेशी रहअ
कि लोगा करनअ मेरअ सुहांग।
मेरी गल्ला शुणनै आल़अ कोहै निं आथी?
हुंह काढा सोह कि मेरै हरेक बैण आसा शुचै।
परमेशर ज़हा का सारअ बल आसा, तेऊ लोल़ी त मेरी गल्लो ज़बाब दैनअ।
ज़ै तेऊ का मेरै खलाफ किज़ै दोश होए बी
सह लोल़ी त तेऊ लिखी दैनअ ताकि हुंह तेता भाल़ी सकूं,
तेता डाहूं हुंह आपणीं कान्हा च़की ताकि सोभी का शुझिए,
तेता बणाऊं हुंह साफै ज़ेही आपणैं मुंडे शोभा।
मुंह खोज़णीं ती परमेशरा का पठी गल्ला कि मंऐं किज़ै-किज़ै किअ।
तेऊ सेटा डेऊणअ त मुंह सैणैं ज़िहअ बाझ़ी डरै।
ज़ै मंऐं ज़िम्मींए घाल़ च़ोरी डाही होए,
अर घाल़ी बऊंणैं आल़ैओ हक मारअ होए,
ज़ै मंऐं तैहा ज़िम्मीं का ढब्बै मज़दूरी नांईं दैई फसल खाई होए
अर मालक भुखै मारै होए,
तै लोल़ी मेरै खेचै ज़ौआ कणके बदल़ै
सिधै झ़िंझ़रअ अर छ़ैण-छ़णिथू ई पज़ै!”
इहअ बोली मुक्कअ आयूब गल्ला करी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.