Kulvi Outer Seraji Bible
आयूब 25
परमेशरा का लागा डरनअ
शूही मुल्खे बिल्दादै दैनअ इहअ ज़बाब,
परमेशरा का आसा महान बल,
सोभी मणछा लागा तेऊए डरा हेठै रहणअ।
सह करा स्वर्गा का राज़ अर मेल़-ज़ोल़।
तेऊ का आसा स्वर्ग दूते एतरी खास्सी सैना, तिन्नां निं कुंण गणी सकदअ।
एही निं कुंण ज़ैगा आथी ज़िधी तेऊओ प्रैश्शअ निं पुजदअ।
तेखअ किहअ करै सका मणछ तेऊ सेटा धर्मीं हणैंओ दखाअ करी?
इहअ कुंण आसा ज़ुंण परमेशरा सेटा शुचअ निखल़े?
परमेशरा सेटा आसा ज़ोथ बी न्हैरी,
तेऊ सेटा फिरा तारै बी धुंमधुंमै।
तेखअ मणछ ज़ुंण किल़ै-मकोल़ै ज़िहअ आसा,
तेऊए परमेशरा सेटा किज़ै मुर्त-मल़ाई आसा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.