Kulvi Outer Seraji Bible
आयूब 24
आयूबे खरी
परमेशर ज़हा का सारअ बल आसा तेऊ इहअ बगत किल्है निं आथी डाहअ द खोज़ी
ज़हा धैल़ी तेऊ आपणीं दालता दी बेशी नसाफ करनअ?
ताकि धर्मीं मणछ बी भाल़ी सकदै कि
पापी मणछा भेटी सज़ा।
कई लोग रहा आपणीं सिऊंआं का आजू सिक्की होरीए खेचा गिम्मदै
अर होरीए हेल़्ही का डागै-चैणैं च़ोरी रहा तिंयां इहै फुआल बणी कि तिंयां आसा तिन्नें आपणैं!
तिंयां पाआ छ़ुटै-मुक्कै दै लान्हें गाधै ठगी करै आप्पू लै,
बिधबा बेटल़ीओ बाछ़ू डाहा तिंयां आप्पू का
ज़ांऊं तैणीं सह ऋण भरी निं मुक्के!
ज़ुंण गरीबो हक आसा तिंयां निं तिन्नां तेता बी करनै दैंदै,
रैनै-गरीबा लागा तिन्नें डरै लुक्की रहणअ!
गरीब हुऐ बणें गाधै ज़िहै,
ज़ुंण शुक्कै रेगीस्तानै आपणैं बच्च़ै लै घाह-पाचा लोल़ै रहा लागी,
एता का सुआई निं तिंयां होर्ती किधी डेऊई सकदै!
कि लागा तिन्नां होरीए खेचै धरनीं छ़ुटी दी फसल
आप्पू लै झाल़णीं कि धख खाणां लै होए!
संघा लागा तिन्नां कहा सेठे दाखे बागा का दाख च़ोरी पाणीं।
हिंऊंदै धैल़ै लागा तिन्नां झिकल़ै बाझ़ी राच काटणी,
किल्हैकि तिन्नां का निं प्रैंदै छ़ैणां लै च़ादरू तोही हंदअ।
धारा लागा इहअ भराल़ कि तिंयां हआ भिज़ी-भिज़ी छ़ल़ूह,
नैत्तै हणां लै रहा तिंयां डुआरै बडी टोल्हे नील़ै शरण लई च़ैहनूई
किल्हैकि तिन्नां का निं रहणा लै घअर ई हंदअ!
कदुष्ट मणछ दैआ गरीबा लै ऋण, ज़ै तिन्नें मरनै का आजी नांईं भर्हुअ,
तेता पिछ़ू निंयां तिंयां तिन्नें छ़ुटै-मुक्कै दै च़ूई झुटदै शोहरू तोही
माए हाथा का आपणैं गलाम बणाणां लै छ़ड़ैऊई।
गरीबा लागा ज़ोरा-ज़ोरी लोगे खेचै मारी-मारी नाज़े भरै बुल़्हणै,
नां तिन्नैं घेरी झिकल़ै हंदै बान्हैं दै अर
नां तिन्नैं पेटै रोटी हंदी खाई दी।
तिंयां दैआ कोफरी जैतूनो तेल काढी,
अर दाखो रस काढी पर
तिन्नां निं कुंण पाणीं बी दैंदै झुटणैं।
तिंयां रहा नगरी-नगरी दाहै धकदै अर
लेर-पकार पाई परमेशरा का मज़त मांगदै लागी,
पर तज़ी बी निं परमेशर तिन्नां बाखा धैन ई दैंदअ!
कई आसा प्रैश्शै संघै ज़ीद
“कई आसा इहै लोग बी ज़ुंण प्रैश्शै ई निं मंदै!
तिंयां रहा तेता छ़ाडी उंबल़ी ई बाता लागी हांढदै।
सान्ह पल़ी निं कि, तेतरी जाआ ईंयां हत्या करनै आल़ै
रैनै-गरीबा मारदै निखल़ी,
राची निखल़ा ईंयां ई च़ोरी करदै।
कंज़रै न्हैल़ा सिधी राच पल़दी,
तिंयां डेओआ न्हैरै आपणअ मुंह च़ोरी
होरीए बेटल़ी या मर्धा सेटा,
तिंयां सोठा इहअ कि एथ निं हाम्हैं कोही लाऐ भाल़ी।
च़ोर रहा धैल़ी पांडा भितरी सुत्ती,
तिन्नैं निं कधू धैल़ी धुप्पअ भाल़अ ई
राची निखल़ा तिंयां कसरै घअरे मेटा दी खाढ पाई च़ोरी करदै।
ज़िहै होर राची, तिहै डरा तिंयां धैल़ी बागै निखल़णैं का,
राची आसा तिंयां भैस्सुई गऐ दै,
तेथ निं तिंयां नटिप्प न्हैरै बी बागै निखल़णां लै डरदै।
ईंयां इहै पापी हआ पाणीं प्रैंदै शेफा ज़िहै,
तिंयां घ्रोहल़णै दूर अर ज़ुंण ज़ैगा-ज़िम्मीं तिन्नें नाओंऐं होए
तेथ लाणअ परमेशरा फिटक अर तेथ निं फसल हणीं।
तिंयां डरनै आपणीं दाखे बागा डेऊणैं का बी।
ज़िहअ गरमीं अर धुप्पै करै हिंअं गल़ा,
तिहै हणैं पापी मणछ बी चिजी शल़ी खतम।
तिन्नें ईज बी जाणीं तिन्नां छ़ेक्कै बिस्सरुई।
तिंयां हणैं इहै खतम ज़िहै ढिश-बागरी करै ढूल़ै दै
बूटा सूल़ी करा खाई पठी खतम।
तिन्नां लै हणअ ई इहअ किल्हैकि, तिन्नैं किअ बिधबा बेटल़ी संघै बूरअ बर्ताअ,
नां तिन्नां बेटल़ी लै झींण किई ज़सरअ हुअ-ज़ाअ निं आथी।
पर परमेशर करा आपणैं महान
ज़ोरा करै बडै-बडै जोधै खतम,
परमेशर ज़ै कामां करदअ लागी गअ,
तेखअ निं कदुष्ट ज़िऊंदअ बच़दअ।
परमेशर दैआ तिन्नां हणैं अर
तिन्नां का ज़ाण्हिंआं इहअ कि तिंयां आसा निहंचै,
पर परमेशर हआ कबल्लअ तिन्नां भाल़अ लागअ द कि तिंयां किज़ै करा।
थोल़ी घल़ी हआ कदुष्ट खास्सै सफल अर मशूर,
तेतरी जाआ तिंयां झ़ट च़ारै खतम हई,
तिंयां अल़ा तेखअ शुक्कै दै फूले पाचा ज़िहै धरनीं।
मेरी इना गल्ला लै कुंण इहअ बोली सका कि इहअ निं हंदअ?
इहअ आसा कुंण ज़हा का मेरी गल्ला बृथा ज़ाण्हिंआं? तै खोज़ा सह कि किहअ हआ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.