Kulvi Outer Seraji Bible
आयूब 13
मुखा आसा थोघ अर हुंह जाआ समझ़ी
“साथीओ, ज़ुंण गल्ला तम्हैं बोली,
तिंयां आसा मंऐं बी शूणीं दी, हुंह जाआ इना सोभी गल्ला समझ़ी,
तम्हां का निं इहअ किछ़ै आथी ज़ेतो मुखा थोघ निं होए।
हुंह निं किछ़ी गल्ला लै तम्हां का घट आथी।
पर हुंह निं तम्हां लै आथी बोल्दअ लागअ द, मेरी हठ आसा परमेशरा संघै ज़हा का सारअ बल आसा,
मुंह करनी तेऊ संघै गल्ला कि मेरअ निं किछ़ै कशूर आथी।
पर तम्हैं बोला शुची गल्ला दाबणा लै झ़ुठअ,
तम्हैं आसा इहै बैईद ज़सरी दुआई करै रोगी राम ई निं हंदअ।
असली अक्लीए गल्ल हणीं ती थारी एही कि तम्हैं च़ुप्पी रहंदै!
अर मेरी गल्ला धैन दैई शुणदै कि
हुंह किज़ू गल्ले हठ करदअ आसा लागअ द।
तम्हैं कै सोठा, झ़ुठअ बोली अर लोगा लै धोखअ दैई
कै तम्हैं परमेशरे मज़त करदै आसा लागै दै?
तम्हैं कै परमेशरे बकील आसा?
दालता दी करनी तम्हां तेऊए पक्षा दी हठ?
ज़ै परमेशर तम्हां राम्बल़ै करै ज़ाच़े-भाल़े, तेऊ का तम्हां दी
किज़ै भली गल्ला शुझुई जाणीं? तम्हैं कै इहअ सोठा कि ज़िहै
तम्हैं मणछा ठगा, तिहअ तम्हां सह परमेशर बी ठगणअ?
तेऊ निं तम्हैं ठगी सकदै, ज़ै तम्हैं च़ुप्प-च़ुप्पै बी धोखअ किअ होए
तेऊ फरेऊंणी तम्हां लै तेते बी सज़ा दैई आद अर
ज़ांऊं तेऊ आपणअ महान ज़ोर रहैऊंणअ,
तम्हां छ़ुटणअ दर्छ़णअ।
थारी सैणीं गल्ला हणीं छ़ारा ज़ेही बृथा,
थारी हठ हणीं माट्टे भांडै ज़ेही काच़ी।
ऐबै शूणां ठुंईऐं बेशी मेरी गल्ला
ऐबै लआ च़ुपच़ाप रही मेरी गल्ला शूणीं,
तेखअ च़ाऐ मुल्है ज़िहअ होए सह लागे हंदअ।
एतो नतिज़अ मुल्है ज़िहअ बी होए,
तेतो ज़िम्मैंबार आसा हुंह आप्पै।
मंऐं आसा हेरी दी एही आशा चोल़ी,
तेखअ परमेशर मुंह मारी बी पाए, तैबी किज़ै?
मुंह लणी आप्पू बाखा तेऊ सेटा आपणीं गल्ला खोज़ी।
हई सका कि इहअ करै हुंह बच़ी बी जाए,
किल्हैकि हुंह आसा नर्दोश,
किल्हैकि कदुष्ट मणछ निं तेऊ सम्हनै डेऊई सकदअ।
ऐबै शूणां मेरी गल्ला कान खोल्ही करै।
ऐबै लाअ मंऐं आपणअ पक्ष परमेशरे दालता दी डाही,
तम्हैं लागै भाल़ै हुंह निखल़णअ शुचअ।
ऐहा गल्ला लै कहा करनी मुंह संघै पांच़ी?
ज़ै मुंह दी खोट निखल़े, तै पाणीं मुंह बोल़णें छ़ाड़
अर हुंह आसा मरना लै बी तैर।
हुंह पुछ़ा सिधी दूई गल्ला
हे परमेशर, तूह दै मुल्है सिधी दूई गल्ले ज़ाज़त,
तै एछणी मुंह ताह सम्हनै गल्ला करने हिम्मत।
एक, कर ऐबै मुल्है सज़ा दैणा लै हुअ,
दुजअ इहअ कि ऐबै मुंह डरैऊई बी निं आथी।
हे परमेशर, कि पुछ़ तूह मुखा अर हुंह दैंऊं तेतो ज़बाब,
कि दैऐ मुंह बोल़णैं संघा दैऐ तूह तेतो ज़बाब।
तूह खोज़ मुखा मंऐं किज़ै पाप किऐ? मंऐं किज़ै-किज़ै कशूर किअ?
ताकि मुखा इहअ थोघ लागे कि मेरै आसा इहै पाप-दोश।
तंऐं किल्है आसा मुंह बाखा पिठ फरेऊई दी?
तूह किल्है करा मुंह संघै दुशमणा ज़िहअ बभार।
तूह मुंह डरैऊंदअ आसा लागअ द? हुंह आसा डाल़ा का अल़ै दै शुक्कै पाचा ज़िहअ,
तूह आसा शुक्की डिंढी पिछ़ू पल़अ द।
तंऐं डाहै मुल्है आपणीं नसाफे बही दी
बेघै बूरी सज़ा लिखी!
तंऐं डाहअ हुंह तेते सज़ा भुगतदअ लाई ज़ुंण
मेरी खारकी अमरा भूल-च़ूक हुई!
तंऐं डाहै मेरै खूर शांघल़ी करे काठा दी बान्हीं, संघा रहा तूह हर घल़ी मुंह भाल़अ लागी,
तूह करा राम्बल़ै करै ज़ाच़-भाल़ कि मेरै धरनीं मेरै खूरे नछ़ैण किनी लागै।
हुंह हुअ सूल़ी खाऐ दै काठा अर
ल्हऐ खाऐ दै च़ादरू ज़िहअ।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.