Kulvi Outer Seraji Bible
आयूब 12
आयूबै दैनअ सोपरा लै टोक्की करै ज़बाब
आयूबै दैनअ आपणैं साथी लै इहअ ज़बाब,
“सोभी लोगे हंदै किई तंऐं एकी ज़ण्हैं गल्ला,
तेरै मरनै बाद निं तेखअ देशै अक्ली आल़अ मणछ ई रहणअ!
ज़िहअ तूह बोला, तेतरअ जाआ हुंह बी समझ़ी,
हुंह निं किछ़ू गल्ला लै ताखा घट आथी,
इहअ निं कोहै आथी ज़हा का तेरी इना गल्लो थोघ निं आथी।
मंऐं ज़िऊई हर बगत धर्मीं ज़िन्दगी,
परमेशरै बी किई आझ़ तैणीं ज़ेही मंऐं अरज़ किई तेही ई पूरी।
पर ऐबै आसा मेरै साथी-संघी मुल्है हास्सदै अर मेरै सुहांगा करदै लागै दै।
ज़ेभै तैणीं आप्पू निं पल़ी तेभै तैणीं करा,
तेऊओ सुहांग सोभै ज़हा आफ़त हुई पल़ी दी,
ज़ुंण बधल़ूई च़ाल्लअ तेऊ लै धाक्कअ दैणअ बी हआ सान।
च़ोरा-डाकू अर पापी मणछ रहा आपणैं डेरै राज्ज़ी-राम्बल़ै,
तिंयां बोला इहअ कि,
परमेशर आसा म्हारी मुठी दी।
ज़ै शिखल़णअ च़ाहा तै शिखल़ा
ज़ै कुंण शिखल़णअ च़ाहे,
सह सका बणें ज़ीबा अर च़ेल्लू-पखीरू का बी शिक्षा लई।
धरती अर समुंदरे पाणीं जैंदरे
ज़ीबा अर म्हाछ़ली का बी भेटा शिक्षा।
तिंयां बी समझ़ा ऐहा गल्ला कि
तिंयां आसा बिधाता आप्पै बणाऐं दै।
सोभी ज़ीबे ज़िन्दगी आसा परमेशरे हाथै,
मणछा लै शाह बी दैआ सह ई।
ज़ेही ज़िभ सुआद परखणां लै हआ,
तिहै ई हआ कान गल्ला परखणां लै।
प्रोढै मणछा हआ अक्ल अर सुंबल़ी सोर,
पर असली अक्ल अर ज़ोर आसा बिधाता का,
असली समझ़ अर सलाह बी भेटा तेऊ ई का।
ज़ुंण परमेशरै ढोल़ी हेरअ, तेऊ निं कोहै भिई च़िणीं सकदअ,
ज़ुंण तेऊ आप्पै कैद करी हेरअ, तेऊ बी निं कोहै तेता का छ़ड़ैऊई सकदअ।
ज़ै सह सरग हणैं निं दैए सारी धरती हणीं रेगीस्ताना ज़ेही शुक्की,
ज़ांऊं सह पाणीं छ़ाडी हेरा, तेखअ सका सारी धरती दी पाणीं प्रल़या करी।
परमेशर का आसा सारअ बल, तेऊ निं कोहै हारी सकदअ,
धोखै खाणैं अर धोखै करनै आल़ै आसा दुही प्रैंदै सह ई राज़अ।
बडै-बडै बज़ीरे अक्ल बी निं तेऊ सेटा काम करदी,
अर मशूर पांच़ बी हआ तेऊ सेटा ऐडै।
सह बशैल़ा बडै-बडै राज़ै बी राज़गाद्दी का धरनीं,
संघा दैआ तिन्नां शांघल़ी लोहै पाई गलामी दी डेऊणैं।
सह काढा प्रोहता बी तिन्नें पदबी का पोर्ही,
ज़ुंण बडै-बडै जोधै फिरा, तिन्नां बशैल़ा सह ठुंईऐं।
तेऊ सेटा हआ मशूर सलाहकार च़ुप्पी,
सैणें गल्ला बी निं तेऊ सेटा काम करदी।
बडै-बडै महान राज़ै बी करा सह शर्मिंदै,
तेऊ सेटा निं बडै-बडै जोधै बी ज़ोर-ज़ाहण रहंदै।
न्हैरै दी हुऐ दै गुप्त भेद बी करा सह प्रगट,
नटिप्प न्हैरै दी बी पजैल़ा सह प्रैश्शअ।
देशा-देशा करा सह ई बलबान अर मशूर,
तिन्नां हारनै अर गलामी दी पाणै आल़अ बी आसा सह ई।
तिन्नां प्रैंदै राज़ करनै आल़ेए करा सह सोर-समझ़ ई खतम,
संघा पाआ तिन्नां एही करबैऊंणीं ज़ैगा लै कबाता
ज़ेथ दूर-दूर तैणीं कुंण मणछ निं भेटदअ।
तेऊ न्हैरै दै हांढदी लागा तिन्नां
शराबी ज़िहै धाक्कै फर्नैक्कै।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.