Kulvi Outer Seraji Bible
याकब 4
संसारा संघै साथ
तम्हैं हआ आप्पू मांझ़ै झ़घल़दै-च़िखदै लागै दै। तम्हां थोघ बी आसा कि इहअ किल्है हआ? अह हआ तेता करै ज़ुंण थारै मन्नैं झाख आसा पल़अ द। तम्हैं च़ाहा इहअ सोठी बूरअ करनअ कि एता करै भेटणीं तम्हां खुशी। तम्हां आसा कई च़िज़ा डाहणेंओ च़ाअ पर तम्हां निं तिंयां भेटदी तिन्नां पाणें तैणीं करा तम्हैं दुजे हत्या बी। तम्हैं च़ाहा तिन्नां च़िज़ा ज़ुंण होरी का आसा। तम्हैं हआ एकी-दुजै संघै लल़दै-झ़घल़दै लागै दै किल्हैकि तम्हां निं तिंयां च़िज़ा भेटदी ज़ुंण होरी का आसा। तम्हां निं तै भेटदअ किल्हैकि तम्हैं निं परमेशरा का मांगदै। पर ज़ेभै तम्हैं परमेशरा का मांगा बी, तम्हां निं तैबी भेटदअ किल्हैकि थारै मांगणै पिछ़ू आसा थारी बूरी सोठ ताकि तम्हैं तेता आल-मस्ती दी छेभी सके।
ओ कंज़री बेटल़ी ज़िहै विश्वास घाती मणछो! तम्हां का इहअ थोघ बी निं आथी कि संसारे गल्ला संघै साथ डाहणीं आसा परमेशरा संघै ज़ीद करनी? ज़ुंण बी संसारे संगती डेऊणअ च़ाहा, सह हआ आप्पू ई परमेशरो दुशमण।1
तम्हैं कै इहअ समझ़ा कि पबित्र शास्त्रा दी लिखी दी ईंयां गल्ला आसा बृथा? ज़ुंण इहअ बोला, “परमेशरे आत्मां बस्सा हाम्हां दी।” सह बी च़ाहा इहअ कि हाम्हैं सिधै तेऊ लै झ़ूरी करे ज़ेही एकी मर्धा एही ज़ल़ण हआ कि तेऊए बेटल़ी लोल़ी ती सिधी तेऊ संघै झ़ूरी किई? पर परमेशर आसा सर्वशक्तिमान अर सह दैआ हाम्हां लै जश ताकि हाम्हैं बूराई करने आल़ी च़ाहा ज़िहै पाप करनै का दूर रहे, तैही आसा पबित्र शास्त्रा दी लिखअ द,
“परमेशर करा घमंडी मणछो बरोध
पर ज़ुंण घमंड निं करदअ तेऊ लै करा झींण।”
तैही रहा परमेशरे डरा हेठै। राख्सो करा बरोध, तै ठुहर्नअ सह तम्हां सेटा का दूर। परमेशरा नेल़ एछा, तै एछणअ सह तम्हां नेल़ बी, ओ पापी मणछो, पाप करनअ छ़ाडा, ओ दोगल़ै लोगो, आपणैं दिल करा शुचै।2
तम्हैं किअ पाप, ऐबै हआ दुखी, शोग करा अर लेरा लाआ। थारी खुशी बधल़णीं शोगा दी अर थारअ नंद रहणअ बदल़णअ दुखा दी। तम्हैं प्रभू सम्हनै निं घमंड करी ताकि सह तम्हां खास बणाईं करै ठीक मोक्कै दी बढाओए।
भाई लै दोश लाणअ
भाईओ, एकी दुजे बदनामीं निं करा, ज़ुंण आपणैं भाईए बदनामीं करा, या आपणैं भाई लै दोश लाआ, सह करा बधाने बदनामीं, अर बधाना दी लाआ सह दोश, तै निं तूह परमेशरे बधाना मनणै आल़अ आथी अर तै हुअ तूह सिधअ बधानो बरोध करनै आल़अ। बधाना दैणैं आल़अ अर नसाफ करनै आल़अ आसा एक्कै परमेशर, बच़ाऊंणै अर बरैबाद करने शगती बी आसा तेऊ एकी का। तूह कुंण आसा? ज़ुंण होरी मणछो नसाफ करदअ फिरा?
घमंडे खलाफ चतैनगी
तम्हैं ज़ुंण इहअ बोला कि आझ़ या काल्ला काटणी हाम्हां कहा होरी नगरी डेऊई तिधी एक साल होर अर कोई बपार करी खटणै हाम्हां ढब्बै। पर इहअ निं तम्हां का थोघै आथी किई काल्ला किज़ै हणअ? शूणीं, लआ, थारी ज़िन्दगी आसा थोल़ी ज़ेही, तम्हैं, भाफा ज़िहै आसा, ज़ुंण थोल़ी घल़ी, शुझिआ अर तेखअ लूका सह बागरी दी।3
असली लोल़ी त तम्हैं एता लै इहअ बोलअ, “ज़ै प्रभू च़ाहे तै रहणैं हाम्हैं ज़िऊंदै अर अह काम बी हेरनअ हाम्हां करी।” पर ऐबै करा तम्हैं आपणीं काल्ला धैल़ीए बारै सेखी मारी करै घमंड, इहअ घमंड करनअ हआ पाप।
तैही ज़ुंण भलाई करनअ ज़ाणा अर तेता नांईं करदअ, तेऊ लै आसा अह पाप।
Source notes (3)
- Cross-reference जोह. 2:15-16
- Cross-reference जक. 1:3; मला. 3:7
- Cross-reference सैणीं. 27:1
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.